நீங்கள் முஸ்லீம்களுக்கு எதிரானவரா? – பிரதமர் மோடியின் பதில்..?

2024 மக்களவை தேர்தல் நாடு முழுவதும் பல கட்டங்களாக நடைபெற்று வரும் நிலையில், ‘காங்கிரஸ் ஆட்சிக்கு வந்தால், நாட்டின் செல்வத்தை ‘ஊடுருவுபவர்களுக்கும்’ ‘அதிக குழந்தைகளைப் பெற்றவர்களுக்கும்’ பங்கிட்டுக் கொடுக்கும்’ என பிரதமர் மோடி சமீபத்தில் பேசியது பெரும் பரபரப்பை ஏற்படுத்தியது. பிரதமர் மோடியின் இந்த கருத்து குறித்து தேர்தல் ஆணையத்திடமும் காங்கிரஸ் புகார் அளித்துள்ளது.

இந்த அறிக்கையால் ஏற்பட்ட சலசலப்புக்கு பிரதமர் மோடி பதிலளித்துள்ளார். முஸ்லீம்கள் மீதான அன்பை சந்தைப்படுத்தவில்லை என்றும் பிரதமர் மோடி கூறினார்.பிரதமர் மோடியுடனான உரையாடலில், ‘ஊடுருவுபவர்கள் மற்றும் மக்கள் அதிக குழந்தைகளைப் பெறுவது பற்றி ஏன் மேடையில் பேசுகிறீர்கள்?’ என கேட்கப்பட்ட கேள்விக்கு, பிரதமர் மோடி, ‘இது தவறு, நான் முஸ்லீம்களைப் பற்றி மட்டும் பேசவில்லை, ஒவ்வொரு ஏழைக் குடும்பத்தைப் பற்றியும் பேசினேன்.

அவர்களால் தங்கள் குழந்தைகளை படிக்க வைக்க முடியவில்லை. எந்த சமூகத்தில், ஏழைகள் இருக்கிறார்களோ, அங்கு குழந்தைகள் அதிகம். நான் இந்து என்றோ, முஸ்லீம் என்றோ எங்கும் சொல்லவில்லை. நான் அனைவரையும் சமமாக பார்க்கிறேன். இது என்னுடைய தீர்மானம்’ என்று தெரிவித்தார்.

பிரதமர் மோடியிடம் கேட்கப்பட்ட மற்றொரு கேள்வியில், ‘நீங்கள் முஸ்லீம்களுக்கு எதிரானவர் அல்ல என்ற கருத்தை உடைப்பதில் நீங்கள் ஏன் வெற்றிபெறவில்லை?’ என்று கேட்கப்பட்டது. அதற்கு பதிலளித்த பிரதமர் மோடி, ‘இது ஒரு முஸ்லிமின் கேள்வி அல்ல. தனிப்பட்ட முறையில், முஸ்லீம்கள் என்னை விரும்பலாம், ஆனால் 2002-க்குப் பிறகு, என் இமேஜ் கெட்டுவிட்டது. முஸ்லீம்களின் அன்பை நான் சந்தைப்படுத்தவில்லை’ என்றும் பிரதமர் மோடி கூறினார்.

இதுகுறித்து மேலும் பேசிய பிரதமர் மோடி, ‘நான் சிறுவயதில் முஸ்லீம் குடும்பத்தில் வாழ்ந்தேன். எனது நண்பர்கள் பலர் முஸ்லீம்கள்தான். எனது வீட்டுக்குப் பக்கத்தில்தான் எல்லா முஸ்லீம் குடும்பங்களும் குடியிருந்தன. பெருநாள் தினத்தில் எங்கள் இடத்தில் உணவு சமைக்கப்படாது. ஏனென்றால், எல்லா முஸ்லீம் குடும்பங்களில் இருந்தும் எங்கள் வீட்டிற்கு உணவு கொண்டுவந்து தரப்படும்.

கோத்ராவிற்குப் பிறகு, மாணிக் சௌக்கில் கடைக்காரர்கள் அனைவரும் முஸ்லீம்கள். அங்கு சென்று வாங்குவது இந்துக்கள்தான். தீபாவளியின் போது அங்கு கூட்டம் அதிகமாக இருக்கும். 2002-ல் அங்கு சிலரை அனுப்பி நான் ஒரு கணக்கெடுப்பு நடத்தினேன்.

அங்கு முஸ்லீம்கள் சொல்வார்கள்- மோடியின் பெயரை யாரும் எடுத்துக் கொள்ள முடியாது. மோடி இல்லையென்றால் குழந்தைகள் பள்ளிக்கு சென்றிருக்க மாட்டார்கள். மோடியின் வருகைக்குப் பிறகு குழந்தைகளின் வாழ்க்கையே மாறிவிட்டது என்று அங்குள்ள தாய்மார்கள் மகிழ்ச்சியடைவார்கள்’ என பிரதமர் மோடி கூறினார்.