ஆப்கானிஸ்தானில் பல காலமாக உள்நாட்டுப் போர் நிலவி வருகிறது. நாட்டின் சில பகுதிகளில் ஆதிக்கம் செலுத்திவரும் தலிபான் பயங்கரவாதிகளை ஒழிக்கும் நடவடிக்கையில் அந்நாட்டு பாதுகாப்பு படையினர் ஈடுபட்டு வருகின்றனர்.
இந்த மோதல்களில் சில சமயங்களில் தங்கள் கட்டுப்பாட்டில் உள்ள பகுதிகளில் வசிக்கும் மக்களை குறி வைத்து அவர் பயங்கரவாதிகள் கொடூர தாக்குதல்களை அரங்கேற்றி வருகின்றனர். குறிப்பாக அரசு படையினருக்கு ஆதரவாக இருப்பவர்களையும் அரசு படையினருக்கு ரகசிய தகவல்கள் வழங்குபவர்களையும் ஈவு, இரக்கமின்றி தலிபான்கள் கொன்று குவித்து வருகின்றனர்.
இந்த நிலையில்தான் ஆப்கானிஸ்தான் அரசுக்கு ஆதரவு தெரிவித்து வந்த தனது தந்தை மற்றும் தாயை கொன்ற பயங்கரவாதிகளை 15 வயது நிரம்பிய சிறுமி சுட்டுக் கொன்று பழிதீர்த்த சம்பவம் அரங்கேறியுள்ளது. இந்த சம்பவம் கடந்த வாரம் நிகழ்ந்த போது தற்போது வெளிச்சத்திற்கு வந்துள்ளது.
15 வயது சிறுமி கோமர் குல். இவரது குடும்பத்தில் மொத்தம் நான்கு பேர் உள்ளனர். தாய் மற்றும் தந்தையுடன் அந்த சிறுமி வசித்து வந்துள்ளார். கிராம தலைவராக செயல்பட்டு வந்த கோமர் குல் தந்தை ஆப்கன் அரசுக்கு ஆதரவாகவும் செயல்பட்டு வந்துள்ளார். இதனால் ஆத்திரமடைந்த தலிபான்கள் அவரை கடந்த வாரம் வீட்டிலிருந்து வெளியே தரதரவென இழுத்து வந்து தந்தையையும், தாயையும் கடுமையாக தாக்கினர்.
இறுதியாக தந்தை மற்றும் தாய் வீட்டு வாசலில் வைத்து சகோதரரின் கண்முன்னே சுட்டுக் கொன்றுள்ளனர். எனவே ஆத்திரமடைந்து தனது தந்தை வைத்திருந்த ஏகே 47 ரக துப்பாக்கியை எடுத்துக் கொண்டு வீட்டிற்கு வெளியே வந்துள்ளார். தந்தை மற்றும் தாய் கொல்லப்பட்டு கிடப்பதை கண்ட அதிர்ச்சியில் பெற்றோரை கொன்றவர்களை பழிவாங்க வேண்டும் என்று அவருக்கு எண்ணம் வந்துள்ளது.
வீட்டு வாசலில் நின்றுகொண்டிருந்த தலிபான்களை கண்மூடித்தனமாக துப்பாக்கியால் சுட்டுள்ளார். இதில் இரண்டு தலிபான்கள் தலையில் குண்டு பாய்ந்து சம்பவ இடத்திலேயே உயிரிழந்துள்ளனர். பெற்றோர் உயிரிழக்க காரணமான தலிபான்களை குறிவைத்து சகோதரனும் தாக்குதல் நடத்தினான். அந்நாட்டு அதிபர் உள்பட அனைத்துத் தரப்பினரும் சிறுமிக்கும், சகோதரனுக்கும் பாராட்டை தெரிவித்துள்ளனர்.
