மூக்குத்தி அம்மன் 2 பாக்ஸ் ஆஃபீஸ் வசூல் எவ்வளவு தெரியுமா?

சூர்யா நடித்துள்ள ‘சீன்’ மற்றும் நயன்தாராவின் ‘மூக்குத்தி அம்மன் 2’ ஆகிய திரைப்படங்கள் முதல் நாளில் எத்தனை கோடி வசூலித்துள்ளன என்பது குறித்து பார்ப்போம். தீபாவளியை முன்னிட்டு தமிழ் சினிமாவில் நட்சத்திர நடிகர்களின் படங்கள் திரையரங்குகளில் வெளியாகியுள்ளன. ‘ஆவேஷம்’ பட இயக்குநர் ஜீத்து மாதவன் இயக்கத்தில் சூர்யா நடித்துள்ள திரைப்படம் ‘சீன்’. இந்தப் படத்தில் நஸ்ரியா நாயகியாக நடித்துள்ளார். நஸ்லன் வில்லன் கதாபாத்திரத்தில் நடித்துள்ளார்.

இந்தப் படத்துக்கு சுஷின் ஷ்யாம் இசையமைத்துள்ளார். சூர்யா தனது ழகரம், 2டி என்டர்டெயின்ட்மென்ட் நிறுவனங்கள் மூலம் படத்தை தயாரித்துள்ளார். படம் தீபாவளியை முன்னிட்டு நேற்று (நவ.6) திரையரங்குகளில் வெளியானது. காமெடி, வித்தியாசமான திரைக்கதை மூலம் படம் பாசிட்டிவான விமர்சனங்களைப் பெற்று வருகிறது.

இதனால் படத்தின் வசூல் கூடும் என கணிக்கப்படுகிறது. அதன் படி, முதல் நாளான நேற்று சூர்யாவின் ‘சீன்’ திரைப்படம் உலகம் முழுவதும் ரூ.34.25 கோடி வசூலித்துள்ளது. இந்திய அளவில் படம் ரூ.20 கோடியை தாண்டி வசூலித்துள்ளதாக கூறப்படுகிறது. முதல் நாள் ஓப்பனிங் சூர்யாவின் பேக் டூ பேக் ஹிட்டுக்கு உறுதி செய்துள்ளது. இதன் மூலம் ஒரே ஆண்டில், ‘கருப்பு’, ‘விஸ்வநாத் அண்ட் சன்ஸ்’ என இரண்டு வெற்றிபடங்களை கொடுத்தவருக்கு ‘சீன்’ வெற்றிப்படமாக அமைந்துள்ளதாக தகவல் வெளியாகியுள்ளது.

தீபாவளியை முன்னிட்டு தமிழில் வெளியான மற்றொரு படம் ‘மூக்குத்தி அம்மன் 2’. சுந்தர்.சி இயக்கியுள்ள இந்தப் படத்தில் நயன்தாரா முதன்மை கதாபாத்திரத்தில் நடித்துள்ளார். ரெஜினா, யோகிபாபு, ஊர்வசி உள்ளிட்ட பலர் முக்கிய கதாபாத்திரத்தில் நடித்துள்ளனர். படத்தின் பட்ஜெட் ரூ.100 கோடி என கூறப்படுகிறது.

சுந்தர்.சியை பொறுத்தவரை அவரது ‘அரண்மனை’ சீரிஸ் படங்கள் கைகொடுத்தன. குறிப்பாக அவரது காமெடி ரசிகர்களை கவர்ந்தது. ஆனால், ‘மூக்குத்தி அம்மன் 2’ படத்தில் காமெடி கைகொடுக்கவில்லை என ரசிகர்கள் விமர்சித்து வருகின்றனர். இதனால் சீரியஸான படமாக இப்படம் கவரவில்லை என விமர்சனங்கள் வெளியாகியுள்ளன. இந்நிலையில், ‘மூக்குத்தி அம்மன் 2’ திரைப்படம் முதல் நாள் ரூ.2.15 கோடியை வசூலித்துள்ளதாக தகவல் வெளியாகியுள்ளது.