புதுச்சேரி காமராஜ் நகர் தொகுதி இடைத்தேர்தலில் காங்கிரஸ் வேட்பாளர் ஜான் குமார் 7,171 வாக்குகள் வித்தியாசத்தில் வெற்றி பெற்றார். வாக்கு எண்ணிக்கை ஒரு மணி நேரத்தில் முடிவடைந்து முடிவு அறிவிக்கப்பட்டது.
தமிழகத்தில் விக்கிரவாண்டி, நாங்குநேரி மற்றும் புதுச்சேரி காமராஜ் நகர் ஆகிய 3 தொகுதிகளில் கடந்த 21-ந் தேதி இடைத்தேர்தல் நடைபெற்றது.
இந்த 3 தொகுதிகளிலும் பதிவான வாக்குகள் எண்ணும் பணி இன்று காலை 8 மணிக்கு தொடங்கியது. விக்கிரவாண்டி, நாங்குநேரி தொகுதிகளில் முதலில் தபால் வாக்கு எண்ணிக்கை நடந்தது. முதல் சுற்று வாக்கு எண்ணிக்கை முடிவு 9 மணி வரை அறிவிக்கப்படவில்லை.
ஆனால், சின்னஞ் சிறு தொகுதியான புதுச்சேரி காமராஜ் நகர் தொகுதியிலோ ஒரே ஒரு மணி நேரத்தில் 3 சுற்று வாக்கு எண்ணிக்கை முடிவடைந்து 9 மணிக்கு முடிவு அறிவிக்கப்பட்டது.
காமராஜ் நகர் தொகுதியில் காங்கிரஸ் சார்பில் ஜான் குமாரும், என்.ஆர்.காங்கிரஸ் சார்பில் புவனேஷ்வரனும் போட்டியிட்டனர். இன்று 3 சுற்று வாக்கு எண்ணிக்கை முடிவில் காங்கிரஸ் வேட்பாளர் ஜான் குமார் 14,782 வாக்குகள் பெற்று வெற்றி பெற்றார். எதிர்த்து போட்டியிட்ட என்.ஆர்.காங்கிரஸ் வேட்பாளர் புவனேஷ்வின் 7611 வாக்குகள் மட்டுமே பெற்று தோல்வியடைந்தார்.வாக்கு வித்தியாசம் 7 171 ஆகும். இந்த வெற்றியின் மூலம் காமராஜ் நகர் தொகுதியை காங்கிரஸ் தக்கவைத்துக் கொண்டது குறிப்பிடத்தக்கது.
