அரசு கலை, அறிவியல் கல்லூரிகளில் சேர இன்று முதல் விண்ணப்பிக்கலாம்..!

தமிழகம் முழுவதும் உள்ள 181 அரசு கலை மற்றும் அறிவியல் கல்லூரிகளில் இளநிலை பட்டப்படிப்புகளில் (UG) முதலாம் ஆண்டில் சேர விரும்பும் மாணவர்கள் இன்று முதல் விண்ணப்பிக்கலாம். கல்லூரிக் கல்வி ஆணையர் இ.சுந்தரவல்லி வெளியிட்டுள்ள அறிவிப்பின்படி, மாணவர்கள் www.tngasa.in என்ற இணையதளம் வாயிலாக ஆன்லைனில் தங்களது விண்ணப்பங்களைப் பதிவு செய்யலாம்.

விண்ணப்பத் தொடக்க நாள்: மே 7, 2026 (இன்று)

விண்ணப்பிக்க கடைசி நாள்: மே 29, 2026

இணையதள வசதி இல்லாத அல்லது கிராமப்புறங்களில் உள்ள மாணவர்கள் சிரமமின்றி விண்ணப்பிக்கும் வகையில், அனைத்து அரசு கலை மற்றும் அறிவியல் கல்லூரிகளிலும் சேர்க்கை உதவி மையங்கள் (Admission Assistance Centres) அமைக்கப்பட்டுள்ளன. மாணவர்கள் இந்த மையங்களை அணுகி தங்களது பதிவுகளை மேற்கொள்ளலாம்.

விண்ணப்பக் கட்டணம் மற்றும் பதிவுக் கட்டணம் குறித்த விவரங்கள் பின்வருமாறு:

பொதுப்பிரிவினர்: விண்ணப்பக் கட்டணம் மற்றும் பதிவுக் கட்டணமாக மொத்தம் ரூ. 50 செலுத்த வேண்டும்.

எஸ்.சி./ எஸ்.டி. பிரிவினர்: இவர்களுக்கு விண்ணப்பக் கட்டணம் (ரூ. 48) கிடையாது. வெறும் பதிவுக் கட்டணம் ரூ. 2 மட்டும் செலுத்தினால் போதுமானது.

டெபிட் கார்டு, கிரெடிட் கார்டு, நெட் பேங்கிங் அல்லது UPI (GPay, PhonePe) ஆகிய ஆன்லைன் முறைகளைப் பயன்படுத்தி கட்டணத்தைச் செலுத்தலாம்.

தமிழகத்தில் உள்ள 181 அரசு கல்லூரிகளில் மொத்தம் 159 பாடப்பிரிவுகள் கற்பிக்கப்படுகின்றன. இந்த ஆண்டு சுமார் 1.27 லட்சம் இடங்களுக்கு மாணவர்கள் சேர்க்கப்பட உள்ளனர். பிளஸ் 2 பொதுத்தேர்வு முடிவுகள் வெளியாக உள்ள நிலையில், மாணவர்கள் தங்களுக்கு விருப்பமான கல்லூரிகள் மற்றும் பாடப்பிரிவுகளைத் தேர்ந்தெடுத்து விண்ணப்பிக்குமாறு அறிவுறுத்தப்பட்டுள்ளனர்.