இன்ஸ்டாகிராம் நேரலையில் ராகுல் காந்தி குற்றச்சாட்டு

பிரதமர் நரேந்திர மோடி தனது தொலைபேசியை ஒட்டுக்கேட்பதாக மக்களவை எதிர்க்கட்சித் தலைவர் ராகுல் காந்தி வெள்ளிக்கிழமை (13.11.2026) குற்றம் சாட்டியுள்ளார். இன்ஸ்டாகிராம் சமூக வலைதளத்தில் நடைபெற்ற ‘என்னிடம் கேளுங்கள்’ (Ask Me) நேரலை உரையாடலின் போது பேசிய அவர், “எனது அனைத்துக் குற்றச்சாட்டுகளுக்கும் தேவையான ஆதாரங்கள் எனது போனில் உள்ளன, அதனைப் பிரதமர் ஒட்டுக்கேட்டு வருகிறார்” என்று கூறினார்.

தனது தொலைபேசி ஒட்டுக்கேட்கப்படுவது தொடர்பாகப் பல தகவல்கள் தனக்குக் கிடைத்துள்ளதாகக் கூறிய ராகுல் காந்தி, நேருக்கு நேர் விவாதம் நடத்தினால் யார் வெளிநாட்டு சக்திகளின் தூண்டுதலின் பேரில் செயல்படுகிறார்கள், யார் தேசவிரோதி, எவ்வளவு காலமாகத் தேசவிரோதச் செயல்களில் ஈடுபட்டு வருகிறார்கள் என்பது நிரூபணமாகிவிடும் என்று தெரிவித்தார். மேலும், “நான் உத்தரவாதம் அளிக்கிறேன்: அந்த விவாதத்திற்குப் பிறகு, ஒரு ராணுவ வீரரின் (ஜவான்) முன்னால் கூட நிற்கும் துணிச்சல் பிரதமருக்கு இருக்காது” என்றும் ராகுல் காந்தி குறிப்பிட்டார்.

நாடாளுமன்றத்தில் ஏற்கனவே விவாதத்திற்கான தளம் இருக்கும்போது, பொது விவாதத்தை ஏன் விரும்புகிறீர்கள் எனக் கேட்கப்பட்டதற்குப் பதிலளித்த அவர், அவையில் தன்னைப் பேச அனுமதிப்பதில்லை என்றும், தனது மைக் கூட அணைக்கப்பட்டு விடுவதாகவும் கூறினார்.வேளாண் சட்டங்கள், வாக்குத் திருட்டு, எஸ்.ஐ.ஆர், சீனா, ஜெனரல் நரவனேவின் புத்தகம், எப்ஸ்டீன் ஆகிய விவகாரங்கள் குறித்துப் பேச நீங்கள் என்னை அனுமதிக்கவில்லை. எனக்கு நேருக்கு நேர் விவாதம் தான் வேண்டும். நீண்ட உரைகளைக் கொண்ட விவாதம் எனக்குத் தேவையில்லை” என்று காங்கிரஸ் தலைவர் ராகுல் காந்தி தெரிவித்தார்.

“நரேந்திர மோடி என் மீது குற்றச்சாட்டுகளை வைக்க வேண்டும், நானும் அவர் மீது குற்றச்சாட்டுகளை வைப்பேன். அவர் வரலாம்; அங்கே ஒரு மேஜை இருக்கும், அதன் ஒரு பக்கத்தில் நரேந்திர மோடியும், மறுபக்கத்தில் நானும் இருப்பேன்” என்று கூறிய ராகுல் காந்தி, இந்த விவாதத்திற்கு அதானி குழுமத் தலைவர் கௌதம் அதானி அல்லது ஆர்.எஸ்.எஸ் தலைவர் மோகன் பகவத் ஆகியோரை நடுவர்களாக நியமித்தாலும் தனக்கு எந்த ஆட்சேபனையும் இல்லை என்றார்.

“ஆனால், என்னுடன் நேருக்கு நேர் விவாதம் நடத்திய பிறகு அவர் பிரதமராக நீடிக்க மாட்டார் என்பதற்கு நான் உத்தரவாதம் அளிக்கிறேன்” என்றும் ராகுல் காந்தி கூறினார். பிரதமர் மோடியைப் பொது விவாதத்திற்கு ராகுல் காந்தி அழைப்பது இது முதல் முறையல்ல; பிரதமர் ஒரு ‘துரோகி’ என்பதை நிரூபிக்கத் தனக்கு வெறும் ஐந்து நிமிடங்கள் போதும் என்று அவர் முன்னதாகக் கூறியிருந்தார்.

மறுபுறம், நாடாளுமன்ற விவாதங்களில் இருந்து ராகுல் காந்தி தப்பியோடுவதாகக் குற்றம் சாட்டி, அவரது விவாதச் சவாலை பா.ஜ.க தலைவர்கள் ஏற்கனவே நிராகரித்துள்ளனர். இது குறித்துப் பேசிய மத்திய நிதியமைச்சர் நிர்மலா சீதாராமன், விவாதத்திற்கான இடத்தைத் தேர்வு செய்யுமாறு பிரதமரிடம் ராகுல் காந்தி கேட்டுக் கொண்டிருக்கும் நிலையில், அதற்கான சரியான இடம் ஏற்கனவே நாடாளுமன்றத்தில் இருப்பதாகத் தெரிவித்தார். மேலும், மக்களவை எதிர்க்கட்சித் தலைவர் என்ற முறையில் ராகுல் காந்தி “சிறிது தீவிரத்தன்மையுடனும் பொறுப்புணர்வுடனும்” நடந்து கொள்ள வேண்டும் என்றும் அவர் வலியுறுத்தியுள்ளார்.