வாக்காளர் அட்டை இருந்தும் பட்டியலில் பெயர் இல்லை!

ஆந்திரப் பிரதேச மாநிலம், அனந்தபூர் மாவட்டம் கடிகனிகல்வா (Katiganikalva) கிராமத்தைச் சேர்ந்த 22 முதல் 77 வயதுக்குட்பட்ட 16 பேரின் பெயர்கள் வாக்காளர் அடையாள அட்டைகள் இருந்தும் வாக்காளர் பட்டியலில் இருந்து நீக்கப்பட்டுள்ளன. இதையடுத்து, அவர்களின் விண்ணப்பங்களைச் சரிபார்த்து, கிராமப் பஞ்சாயத்து தேர்தலுக்கான அறிவிப்பு வெளியிடுவதற்கு முன்பாகப் பெயர்களைப் பட்டியலில் சேர்ப்பது குறித்து உரிய நடவடிக்கை எடுக்க வேண்டும் என்று மாநிலத் தேர்தல் ஆணையத்துக்கு ஆந்திரப் பிரதேச உயர் நீதிமன்றம் உத்தரவிட்டுள்ளது.

இந்த வழக்கை நீதிபதி கிரண்மயீ மண்டவா விசாரித்தார். ஆந்திரப் பிரதேச அரசு, மாநிலத் தேர்தல் ஆணையம் உள்ளிட்ட அதிகாரிகளுக்கு எதிராக 16 கிராம மக்கள் இந்த மனுவைத் தாக்கல் செய்திருந்தனர். வரவிருக்கும் கிராமப் பஞ்சாயத்து தேர்தலுக்காக வெளியிடப்பட உள்ள வாக்காளர் பட்டியலில் தங்களது பெயர்களைச் சேர்க்க உத்தரவிட வேண்டும் என்று அவர்கள் கோரியிருந்தனர். ஆந்திரப் பிரதேசத்தில் கிராமப் பஞ்சாயத்து தேர்தல்கள் நவம்பர் 26, 29 மற்றும் டிசம்பர் 2, 2026 ஆகிய தேதிகளில் மூன்று கட்டங்களாக நடைபெற உள்ளன.

இந்த மனுவை விசாரித்த உயர் நீதிமன்றம், நவம்பர் 5-ம் தேதி பிறப்பித்த உத்தரவில், “மனுதாரர்களின் விண்ணப்பங்களை மாநிலத் தேர்தல் ஆணையம் சரிபார்த்து, கிராமப் பஞ்சாயத்து தேர்தலுக்கான அறிவிப்பு வெளியிடப்படுவதற்கு முன்பாக அவர்களின் பெயர்களை வாக்காளர் பட்டியலில் வெளியிடுவது தொடர்பாக விரைந்து உத்தரவுகளைப் பிறப்பிக்க வேண்டும்” என்று தெரிவித்தது.

கடிகனிகல்வா கிராமத்தின் வாக்காளர் பட்டியலில் 2025-ம் ஆண்டு வரை தங்களது பெயர்கள் இடம்பெற்றிருந்ததாக மனுதாரர்கள் நீதிமன்றத்தில் தெரிவித்தனர். ஆனால், எந்தவித முன்னறிவிப்பும் இன்றி பின்னர் தங்களது பெயர்கள் நீக்கப்பட்டதாகக் கூறினர். இதையடுத்து, மீண்டும் விண்ணப்பங்களைச் சமர்ப்பித்து, தேர்தல் புகைப்பட அடையாள அட்டைகளையும் (EPIC) பெற்றுள்ளனர். இருப்பினும், கிராம வாக்காளர் பட்டியலில் தங்களது பெயர்கள் இடம்பெறவில்லை என்று அவர்கள் தெரிவித்தனர்.

வாக்காளர் பட்டியலில் இருந்து தங்களது பெயர்கள் நீக்கப்பட்டிருப்பதைக் கண்டறிந்ததும் சம்பந்தப்பட்ட அதிகாரிகளை அணுகியதாக மனுவில் தெரிவிக்கப்பட்டுள்ளது. வாக்காளர் பட்டியலில் பெயர்களைச் சேர்ப்பதற்கான நிர்ணயிக்கப்பட்ட படிவமான படிவம் VI-ஐ (Form VI) அவர்கள் சமர்ப்பித்துள்ளனர். இந்த விண்ணப்பங்கள் பரிசீலிக்கப்பட்டு, தேர்தல் புகைப்பட அடையாள அட்டைகளும் தயாரிக்கப்பட்டதாக மனுதாரர்கள் நீதிமன்றத்தில் தெரிவித்தனர்.

ஆனால், விண்ணப்ப நடைமுறைகளை நிறைவு செய்து அடையாள அட்டைகளைப் பெற்ற பிறகும் வாக்காளர் பட்டியலில் தங்களது பெயர்கள் இடம்பெறவில்லை. இதுகுறித்து அதிகாரிகளிடம் விசாரித்தபோது, பிப்ரவரி 6, 2026 தான் கடைசி தேதி என்றும், அந்தத் தேதி வரை வாக்காளர் பட்டியலில் இடம்பெற்ற பதிவுகளே புகைப்பட வாக்காளர் பட்டியலை வெளியிடும்போது கணக்கில் எடுத்துக்கொள்ளப்படும் என்றும் தெரிவிக்கப்பட்டதாக மனுவில் கூறப்பட்டுள்ளது.

எந்த நேரத்திலும் கிராமப் பஞ்சாயத்து தேர்தலுக்கான அறிவிப்பு வெளியாகலாம் என்பதால், அதற்கு முன்பாகத் தங்களது பெயர்கள் வாக்காளர் பட்டியலில் இடம்பெறாமல் போய்விடும் என்று மனுதாரர்கள் அச்சமடைந்தனர். இதையடுத்து உயர் நீதிமன்றத்தை அணுகிய அவர்கள், தேர்தல் அறிவிப்பு வெளியிடப்படுவதற்கு முன்பாகத் தங்களது பெயர்களை வாக்காளர் பட்டியலில் சேர்க்க அதிகாரிகளுக்கு உத்தரவிட வேண்டும் என்று கோரினர்.

தேர்தல் புகைப்பட அடையாள அட்டைகள் வழங்கப்பட்டிருந்தும், கிராம வாக்காளர் பட்டியலில் பெயர்களைச் சேர்ப்பதற்கான விண்ணப்பங்கள் தீர்வு காணப்படாமல் இருந்ததே இந்த வழக்கின் முக்கியப் பிரச்சினையாக அமைந்தது.இந்த வழக்கை விசாரித்த உயர் நீதிமன்றம், 1994-ம் ஆண்டின் ஆந்திரப் பிரதேச பஞ்சாயத்து ராஜ் சட்டத்தின் 11-வது பிரிவில் இடம்பெற்றுள்ள விதியை ஆய்வு செய்தது. வாக்காளர் பட்டியலில் திருத்தங்கள் மேற்கொள்வது தொடர்பான இந்தப் பிரிவின்படி, தேர்தல் அறிவிப்பு வெளியிடப்படும் தேதி வரை வாக்காளர் பட்டியலில் பெயர்களைச் சேர்ப்பது, ஏற்கெனவே இடம்பெற்றுள்ள பதிவுகளை வேறு இடத்துக்கு மாற்றுவது அல்லது நீக்குவது உள்ளிட்ட மாற்றங்களைச் செய்ய முடியும்.

மேலும், இந்த நடைமுறையின் கீழ் புதிதாகச் சேர்க்கப்படும் பெயர்கள், சம்பந்தப்பட்ட கிராமப் பஞ்சாயத்தின் கடைசி வார்டுக்கான வாக்காளர் பட்டியலில் இடம்பெற வேண்டும் என்றும் அந்தச் சட்டப் பிரிவு குறிப்பிடுகிறது. இந்தச் சட்ட விதிகளைக் கவனத்தில் கொண்ட நீதிமன்றம், 16 மனுதாரர்களும் தங்களது மனுவுடன் சமர்ப்பித்த விண்ணப்பங்களின் தற்போதைய நிலையையும் பரிசீலித்தது.

இதன் அடிப்படையில், 16 பேரின் விண்ணப்பங்களையும் சரிபார்த்து, அவர்களது பெயர்களை வாக்காளர் பட்டியலில் வெளியிடுவது தொடர்பாக உரிய உத்தரவுகளைப் பிறப்பிக்குமாறு மாநிலத் தேர்தல் ஆணையத்துக்கு உயர் நீதிமன்றம் உத்தரவிட்டது. கிராமப் பஞ்சாயத்து தேர்தலுக்கான அறிவிப்பு வெளியிடப்படுவதற்கு முன்பாக இந்தப் பணியை விரைந்து முடிக்க வேண்டும் என்றும் நீதிமன்றம் குறிப்பிட்டது.அதேநேரத்தில், 16 பேரும் தானாகவே வாக்காளர் பட்டியலில் சேர்க்கப்படுவதற்கு உரிமை பெற்றவர்கள் என்று நீதிமன்றம் அறிவிக்கவில்லை. அவர்களது பெயர்களை எந்தவித நிபந்தனையுமின்றிப் பட்டியலில் சேர்க்க வேண்டும் என்றும் உத்தரவிடவில்லை.