மாநிலங்களவையில் பலம் பெறும் என்.டி.ஏ – உறுப்பினர்கள் 141-ஆக உயர்வு

சமீபத்தில் நடைபெற்ற மாநிலங்களவைத் தேர்தல்கள் என்.டி.ஏ கூட்டணியை மேலும் வலுப்படுத்தியுள்ளன. 245 உறுப்பினர்களைக் கொண்ட அவையில் அதன் பலம் 135-லிருந்து 141-ஆக உயர்ந்துள்ளது. பாரதிய ஜனதா கட்சியின் தேர்ந்தெடுக்கப்பட்ட உறுப்பினர்களின் எண்ணிக்கை 98-லிருந்து 101-ஆக அதிகரித்துள்ள நிலையில், நியமன உறுப்பினர்கள் 12 பேரில் 5 பேர் கட்சியில் இணைந்துள்ளனர். இதன் மூலம் மேலவையில் பா.ஜ.க எம்.பி.க்களின் எண்ணிக்கை 106-ஆக உயர்ந்துள்ளது.

பா.ஜ.க 106, அ.தி.மு.க 5, ஜே.டி(யு) மற்றும் என்.சி.பி தலா 4, டி.டி.பி, சிவசேனா மற்றும் யு.பி.பி.எல் (UPPL) தலா 2. மேலும் ஆர்.எல்.டி, ஜே.டி(எஸ்), ஏ.ஜி.பி, ஆர்.பி.ஐ (அத்வாலே), ராஷ்டிரிய லோக் மோர்ச்சா, சுயேச்சை எம்.பி கார்த்திகேய சர்மா, எம்.என்.எஃப், என்.பி.பி மற்றும் பா.ம.க ஆகியவற்றில் தலா ஒரு உறுப்பினர் உள்ளனர். இதுதவிர, அரசு பரிந்துரைத்த இன்னும் கட்சி சார்பு அறிவிக்காத 7 நியமன உறுப்பினர்களும் உள்ளனர். இவை அனைத்தும் சேர்ந்து மொத்தம் 141 உறுப்பினர்கள் ஆகிறது.

பா.ஜ.க-வுக்கு எதிராக நிலைப்பாடெடுக்கக்கூடிய கட்சிகளில், காங்கிரஸின் பலம் 27-லிருந்து 29-ஆக உயர்ந்துள்ளது. திரிணாமுல் காங்கிரஸ் 13, ஆம் ஆத்மி 10, தி.மு.க 8, பி.ஜே.டி 6, சமாஜ்வாதி கட்சி 4 உறுப்பினர்களைக் கொண்டுள்ளன. நேஷனல் கான்பரன்ஸ், பி.ஆர்.எஸ், சி.பி.ஐ (எம்), ஆர்.ஜே.டி தலா 3 உறுப்பினர்களையும்; ஜே.எம்.எம், ஐ.யு.எம்.எல் மற்றும் சி.பி.ஐ தலா 2 உறுப்பினர்களையும் கொண்டுள்ளன. சிவசேனா (யு.பி.டி), என்.சி.பி (எஸ்.பி), ம.தி.மு.க, கேரளா காங்கிரஸ் (எம்), பி.எஸ்.பி மற்றும் தே.மு.தி.க ஆகிய கட்சிகளில் தலா ஒரு உறுப்பினர் உள்ளனர்.

இந்த ஆண்டில் காலியாகவுள்ள 71 இடங்களில், 33 இடங்களுக்கான தேர்தல் அடுத்தகட்டமாக நடைபெறவுள்ளது. இதில் 37 இடங்கள் ஏற்கனவே நிரப்பப்பட்டுவிட்டன (26 பேர் போட்டியின்றி தேர்வு). ஹரியானா, ஒடிசா மற்றும் பீகார் மாநிலங்களில் நடந்த தேர்தல்களில், எதிர்க்கட்சி உறுப்பினர்களின் குறுக்கு ஓட்டு மற்றும் வராத காரணத்தால் என்.டி.ஏ எதிர்பார்த்ததை விட அதிக இடங்களை வென்றது.

மே 21 முதல் ஜூன் 25 வரை 23 இடங்களும், நவம்பர் 25-க்குள் 11 இடங்களும் காலியாகவுள்ளன. முதல் கட்டத்தில் காலியாகும் 23 இடங்களில் 12 இடங்கள் தற்போது பாஜக வசமும், 4 இடங்கள் காங்கிரஸ் வசமும், 3 இடங்கள் ஒய்.எஸ்.ஆர்.சி.பி வசமும் உள்ளன. இதில் ஜே.டி(எஸ்) நிறுவனர் எச்.டி. தேவேகவுடா, மத்திய அமைச்சர் ரவ்னீத் சிங் பிட்டு ஆகியோரின் இடங்களும், எதிர்க்கட்சித் தரப்பில் காங்கிரஸ் தலைவர் மல்லிகார்ஜுன கார்கே மற்றும் திக்விஜய சிங் ஆகியோரின் இடங்களும் காலியாகின்றன.

என்.டி.ஏ-வின் பலம் அதிகரிப்பதன் மூலம், சாதாரண மசோதாக்களை இரு அவைகளிலும் எவ்வித சிக்கலுமின்றி நிறைவேற்ற முடியும். மக்களவையில் பாஜக-வின் பலம் 240-ஆகக் குறைந்தாலும், கூட்டணி கட்சிகளுடன் சேர்த்து என்.டி.ஏ பெரும்பான்மைக்கு மேல் உள்ளதால் ஆட்சிக்கு இதுவரை சிக்கல் எழவில்லை. மாநிலங்களவையிலும் தற்போது என்.டி.ஏ பெரும்பான்மையைத் தாண்டியுள்ளது.

இருப்பினும், அரசியலமைப்பு திருத்தங்களை மேற்கொள்வது அரசாங்கத்திற்கு இன்னும் சவாலாகவே உள்ளது. இதற்கு இரு அவைகளிலும் ‘சிறப்பு பெரும்பான்மை’ (Special Majority) தேவை. அதாவது, மசோதாவிற்கு ஆதரவான வாக்குகள் அவையின் மொத்த பலத்தில் பாதியாகவும், அவைக்கு வந்து வாக்களிப்பவர்களில் மூன்றில் இரண்டு பங்கிற்குக் (2/3) குறையாமலும் இருக்க வேண்டும்.

மக்களவையில் முழு பலத்தில் மூன்றில் இரண்டு பங்கு என்பது 362 ஆகும். மாநிலங்களவையில் இது 164 ஆகும். எனவே, வாக்களிக்கும் அன்று உறுப்பினர்கள் அதிகளவில் வராமல் இருந்தால் ஒழிய, என்.டி.ஏ-வுக்கு இந்த எண்ணிக்கை ஒரு சவாலாகவே இருக்கும். உதாரணமாக, ‘ஒரே நாடு ஒரே தேர்தல்’ போன்ற திட்டங்களுக்கு அரசியலமைப்பு திருத்தம் அவசியம். இதற்குத் தேவையான எண்ணிக்கை தற்போது என்.டி.ஏ வசம் இல்லை. மேலும், அரசியலமைப்பு திருத்த மசோதாவை இரு அவைகளின் கூட்டுக்கூட்டம் மூலம் நிறைவேற்ற முடியாது; இரு அவைகளிலும் தனித்தனியாக நிறைவேற்றப்பட வேண்டும்.