ஓசூரில் விமான சேவை மற்றும் மெட்ரோ ரயில் திட்டம் விரைவில்..!

கிருஷ்ணகிரி மாவட்டம் ஓசூரில் வருவாய்த்துறை, மாற்றுத்திறனாளித்துறை உள்ளிட்ட பல்வேறு அரசு துறை சார்பில் பயனாளிகளுக்கு நலத்திட்ட உதவிகள் வழங்கும் விழா நடைபெற்றது. இந்த நிகழ்வு ஓசூரில் உள்ள தனியார் மண்டபத்தில் வைத்து நடத்தப்பட்டது.

அந்த விழாவில் 563 பயனாளிகளுக்கு 1,15,28,000 ரூபாய் மதிப்பிலான நலத்திட்ட உதவிகள் வழங்கப்பட்டது. அந்த விழாவிற்கு கைத்தறி மற்றும் துணி நூல் அமைச்சர் காந்தி வருகை தந்து பயனாளிகளுக்கு நலத்திட்ட உதவிகளை வழங்கினார்.

அதன் பின்னர் செய்தி மக்கள் தொடர்பு துறை சார்பில் தமிழ்நாடு அரசு இரண்டு ஆண்டு நிறைவு பெற்றதை ஒட்டி ஈடில்லா ஆட்சி ஈராண்டே சாட்சி என்ற சாதனை மலர் புத்தகத்தை அமைச்சர் காந்தி வெளியிட்டார். அப்போது மாவட்ட ஆட்சியர் தீபக் ஜேக்கப், நாடாளுமன்ற உறுப்பினர் செல்லகுமார், சட்டமன்ற உறுப்பினர்கள் ஒய். பிரகாஷ், ராமச்சந்திரன், மேயர் சத்யா ஆகியோர் முன்னிலை வகித்தனர்.

அதைத் தொடர்ந்து அமைச்சர் காந்தி பேசும்போது, தமிழ்நாடு முதல்வர் மு. க. ஸ்டாலின் கொரோனா காலகட்டத்தில் பதவியேற்ற நாள் முதல் நோய் தடுப்பு மேற்கொண்டதுடன், பொதுமக்களுக்கு நிவாரணம் மற்றும் அத்தியாவசிய பொருட்கள் வழங்கி அவர்களின் வாழ்வாதாரத்தை பாதுகாத்தார்.

மக்களை தேடி மருத்துவம், மகளிர்க்கு கட்டணம் இல்லா பேருந்து வசதி, காலை உணவு திட்டம், புதுமைப் பெண், நான் முதல்வர் திட்டம், உங்கள் தொகுதியில் முதலமைச்சர் திட்டம், இலவச மின்சாரம் என்னற்ற திட்டங்களை கொண்டு வந்துள்ளார்.

மலர் ஏற்றுமதி, காய்கறி உற்பத்தியில் தன்னிறைவு பெற்று விளங்கும் இந்த பகுதியில் சாலை வசதி, மெட்ரோ ரயில் திட்டம், விமான போக்குவரத்து சேவை விரைவில் தொடங்க தமிழக முதல்வர் தலைமையில் நடவடிக்கை எடுத்து வருகிறது என தெரிவித்தார். இந்நிகழ்சியில் உதவி ஆட்சியர் சரண்யா, மாநகராட்சி ஆணையர் சினேகா,துணை மேயர் ஆனந்தய்யா மற்றும் பல்வேறு துறை சார்ந்த அதிகாரிகள் உள்ளிட்டோர் பலர் கலந்துகொண்டனர்.