ஆந்திராவுக்கு இடம்பெயர்ந்த ரூ1614 கோடி முதலீடு

ஆட்டோமொபைல் உதிரிபாக உற்பத்தித் துறையில் உலகளாவிய முதலீடுகளை ஈர்ப்பதில் ஆந்திரப் பிரதேசம் முக்கிய முன்னேற்றம் கண்டுள்ளது. ஹூண்டாய், கியா நிறுவனங்களுக்கு உதிரிபாகங்களை வழங்கும் மூன்று தென்கொரிய நிறுவனங்கள், தங்களது உற்பத்தி விரிவாக்கத்துக்குத் தமிழகத்தை விட ஆந்திரப் பிரதேசத்தைத் தேர்வு செய்துள்ளன. இதன் மூலம் அனந்தபூர் பகுதியில் மொத்தம் ரூ.1,614 கோடி முதலீடு செய்ய அந்த நிறுவனங்கள் உறுதியளித்துள்ளன.

தென்கொரிய நிறுவனங்களைத் தனது ஆட்டோமொபைல் உற்பத்தித் துறையில் ஈர்க்கவும், ஏற்கெனவே செயல்பட்டு வரும் நிறுவனங்களின் முதலீடுகளைத் தக்கவைக்கவும் தமிழ்நாடு முயற்சி மேற்கொண்டு வந்த நிலையில், இந்த முடிவு தமிழகத்துக்குப் பின்னடைவாக அமைந்துள்ளது. ஹ்வாஷின் (Hwashin), சியோயான் (Seoyon), இவாமெட் (Iwamet) ஆகிய மூன்று நிறுவனங்களும் அனந்தபூரில் உற்பத்தி ஆலைகளை அமைப்பதற்காக ஆந்திரப் பிரதேச அரசுடன் புரிந்துணர்வு ஒப்பந்தங்களில் கையெழுத்திட்டுள்ளன.

இதில், ஹ்வாஷின் நிறுவனம் ரூ.850 கோடி முதலீடு செய்யவுள்ளதாகவும், இதன் மூலம் 100 பேருக்கு வேலைவாய்ப்பு கிடைக்கும் என்றும் தெரிவிக்கப்பட்டுள்ளது. சியோயான் நிறுவனம் ரூ.514 கோடி முதலீட்டில் 918 பேருக்கு வேலைவாய்ப்பு வழங்க உள்ளது. இவாமெட் நிறுவனம் ரூ.250 கோடி முதலீடு செய்யவுள்ளதுடன், இதன் மூலம் 400 பேருக்கு வேலைவாய்ப்பு கிடைக்கும் என எதிர்பார்க்கப்படுகிறது. மூன்று நிறுவனங்களின் முதலீடுகள் மூலம் மொத்தம் 1,418 வேலைவாய்ப்புகள் உருவாகும் எனக் கணிக்கப்பட்டுள்ளது. இதன் மூலம் அனந்தபூர், வளர்ந்து வரும் ஆட்டோமொபைல் உற்பத்தி மையமாகத் தனது இடத்தை வலுப்படுத்தும் என எதிர்பார்க்கப்படுகிறது.

இந்த முதலீடுகளுக்கான முயற்சிகள், ஆந்திரப் பிரதேச தகவல் தொழில்நுட்பம், மின்னணுவியல் மற்றும் மனிதவள மேம்பாட்டுத்துறை அமைச்சர் நாரா லோகேஷ் ஜூலை மாதம் தென்கொரியா சென்றபோது தொடங்கின. அப்போது ஹூண்டாய் மற்றும் கியா நிறுவனங்களின் விநியோகச் சங்கிலியில் இடம்பெற்றுள்ள ஆட்டோமொபைல் உதிரிபாக உற்பத்தியாளர்களுடன் அவர் ஆலோசனைக் கூட்டம் நடத்தினார். இதில் மூன்று நிறுவனங்களின் பிரதிநிதிகளும் பங்கேற்றனர். இதைத் தொடர்ந்து, ஆந்திரப் பிரதேச பொருளாதார மேம்பாட்டு வாரியம் மூலம் அந்த நிறுவனங்களுடன் தொடர்ந்து பேச்சுவார்த்தை நடத்தப்பட்டு, முதலீட்டு உறுதிமொழிகள் பெறப்பட்டன.

இதுகுறித்து நாரா லோகேஷ், தி எகனாமிக் டைம்ஸ் நாளிதழிடம் கூறுகையில், “தென்கொரியாவுக்குச் சென்றிருந்தபோது, ஹூண்டாய் மற்றும் கியா நிறுவனங்களின் விநியோகச் சங்கிலியில் உள்ள ஆட்டோமொபைல் உதிரிபாக உற்பத்தியாளர்களைச் சந்தித்து ஆந்திரப் பிரதேசத்தில் முதலீடு செய்ய அழைப்பு விடுத்தோம். எங்கள் குழுவினர் தொடர்ந்து பேச்சுவார்த்தை நடத்தினர். அதன் விளைவாக, தற்போது ஹ்வாஷின், சியோயான், இவாமெட் ஆகிய நிறுவனங்கள் அனந்தபூரில் கணிசமான முதலீடுகளைச் செய்ய உறுதியளித்துள்ளன. ஆந்திரப் பிரதேசத்தின் மீது உலகளாவிய முதலீட்டாளர்கள் வைத்துள்ள நம்பிக்கையை இது காட்டுகிறது. இந்த நிறுவனங்களுக்குத் தேவையான அனைத்து உதவிகளையும் வழங்குவோம்” என்று தெரிவித்தார்.

தென்கொரிய முதலீடுகளைத் தக்கவைத்துக்கொள்வதற்கும், புதிய முதலீடுகளை ஈர்ப்பதற்கும் தமிழ்நாடும் தொடர்ந்து முயற்சிகளை மேற்கொண்டு வருகிறது. இந்த மூன்று நிறுவனங்களும் தமிழகத்தில் தங்களது உற்பத்தி ஆலைகளை அமைப்பது அல்லது ஏற்கெனவே உள்ள செயல்பாடுகளை விரிவுபடுத்துவது தொடர்பாக முந்தைய திமுக அரசுடன் பேச்சுவார்த்தை நடத்தியிருந்ததாக இந்த விவகாரம் குறித்து அறிந்த ஒருவர் தெரிவித்துள்ளார். இது தொடர்பாக தமிழகத்தின் முதலீட்டு ஊக்குவிப்பு அமைப்பான கைடன்ஸ் (Guidance) நிறுவனத்திடம் கேள்விகள் அனுப்பப்பட்டிருந்தன. ஆனால், ஞாயிற்றுக்கிழமை செய்தி வெளியிடப்படும் நேரம் வரை பதில் கிடைக்கவில்லை.

இதுகுறித்து அந்த நபர் கூறுகையில், “இவாமெட் நிறுவனம் தமிழகத்தில் ஏற்கெனவே ஒரு நிறுவனத்தைப் பதிவு செய்திருந்தது. ஹ்வாஷின் மற்றும் சியோயான் நிறுவனங்கள் ஸ்ரீபெரும்புதூர், கிருஷ்ணகிரி ஆகிய இடங்களில் ஏற்கெனவே செயல்பட்டு வருகின்றன. எனவே, தமிழகத்தில் தங்களது முதலீடுகளை இரட்டிப்பாக்குவது தொடர்பாகவே பேச்சுவார்த்தைகள் நடைபெற்றன” என்று தெரிவித்துள்ளார்.

ஆட்டோமொபைல், மின்சார வாகனங்கள், மின்னணுவியல், புதுப்பிக்கத்தக்க எரிசக்தி, கனரகப் பொறியியல் மற்றும் மேம்பட்ட உற்பத்தித் துறைகளில் தென்கொரியா, தமிழகத்தின் முக்கிய முதலீட்டுப் பங்காளியாக உருவெடுத்துள்ளது. இதற்கிடையில், ஏப்ரல் மாதம் நடைபெற்ற சட்டப்பேரவைத் தேர்தலுக்கு இரண்டு மாதங்களுக்கு முன்பு, பிப்ரவரியில், தென்கொரிய நிறுவனங்கள் தமிழகத்தில் முதலீடு செய்யவும், தங்களது செயல்பாடுகளை விரிவுபடுத்தவும் உதவும் வகையில் கைடன்ஸ் அமைப்பு பிரத்யேகமாக ‘கொரியா டெஸ்க்’ (Korea Desk) ஒன்றைத் தொடங்கியது.

இருப்பினும், மூன்று நிறுவனங்களும் தங்களது விரிவாக்கத்துக்கான இடமாக ஆந்திரப் பிரதேசத்தைத் தேர்வு செய்திருப்பது, தமிழகத்தின் ஏற்கெனவே நிறுவப்பட்டுள்ள தொழில்துறை கட்டமைப்புக்குப் போட்டியாக, நேரடி அரசியல் அணுகுமுறை மற்றும் இலக்கு சார்ந்த பேச்சுவார்த்தைகள் மூலம் ஆந்திரப் பிரதேசம் முதலீடுகளை ஈர்க்கும் திறனை வெளிப்படுத்துகிறது. தற்போது தமிழகத்தில் தவெக அரசு ஆட்சியில் உள்ள நிலையில், தென்கொரிய முதலீட்டாளர்களுடனான தொடர்புகளைத் தொடர்ந்து முன்னெடுத்து வருகிறது.ஜூன் மாதம் தமிழக தொழில்துறை அமைச்சர் எஸ். கீர்த்தனா தென்கொரியா சென்று மோட்டிவ்லிங்க் (MotiveLink) நிறுவனத்துடன் பேச்சுவார்த்தை நடத்தினார்.