மாதவரத்தில் ஆவின் புதிய ஆய்வகம் திறப்பு..!

முதலமைச்சர் விஜய் இன்று (7.10.2026) சென்னை, மாதவரத்தில் தமிழ்நாடு பால் உற்பத்தியாளர்கள் கூட்டுறவு இணையத்தின் சார்பில் 2 கோடியே 23 இலட்சம் ரூபாய் செலவில் புதிதாகக் கட்டப்பட்டுள்ள ஆவின் மாநில, மத்திய ஆய்வகத்தின் துணைக் கட்டடத்தைத் திறந்து வைத்தார். மேலும், மாதவரம் பால் பண்ணையின் செயல்பாடுகளைப் பார்வையிட்டதோடு, புதிய பால் பண்ணையின் கட்டுமானப் பணிகளையும் பார்வையிட்டு ஆய்வு செய்தார்.

மாதவரம் பால் பண்ணையானது மிகப் பழமையான பால்பதன நிறுவனமாகும். இந்நிறுவனம் 1963-ஆம் ஆண்டு, அரசு மற்றும் யுனிசெஃப் (UNICEF) ஆகியவற்றின் கூட்டுத் திட்டத்தின் மூலம் மாதவரம் பால் பண்ணை வளாகத்தில் நாளொன்றுக்கு 50,000 லிட்டர் பால் பதப்படுத்தும் திறனுடன் நிறுவப்பட்டது. இதன் உள்கட்டமைப்பு வசதிகள் தொடர்ந்து மேம்படுத்தப்பட்டு, தற்போது நாளொன்றுக்கு சுமார் 4.50 இலட்சம் லிட்டர் பாலைப் பதப்படுத்தும் திறன் பெற்றுள்ளது.

இந்திய தர நிர்ணய ஆணையம் (Bureau of Indian Standards), இந்திய உணவுப் பாதுகாப்பு மற்றும் தர நிர்ணய ஆணையத்தின் (FSSAI) தரநிலைகளின்படி குடிநீர் சோதனைகள், தமிழ்நாடு மாசு கட்டுப்பாட்டு வாரியத்தின் (Tamil Nadu Pollution Control Board) விதிமுறைகளின்படி கழிவுநீர் சோதனைகள் செய்வதற்காக, சென்னை, மாதவரத்தில் 2 கோடியே 23 இலட்சம் ரூபாய் செலவில் அதிநவீன கருவிகளுடன் அமைக்கப்பட்டுள்ள ஆவின் மாநில மத்திய ஆய்வகத்தின் துணைக் கட்டடத்தை முதலமைச்சர் விஜய் இன்று திறந்து வைத்தார்.

இந்த ஆய்வகமானது, நவீன உபகரணங்களின் உதவியுடன், தமிழ்நாடு பால் உற்பத்தியாளர்கள் கூட்டுறவு இணையம் மற்றும் மாவட்ட பால் உற்பத்தியாளர்கள் கூட்டுறவு ஒன்றியங்களின் தேவைகளுக்கான அனைத்துத் தரப் பரிசோதனைகளைத் துல்லியமாகவும், விரைவாகவும், சர்வதேச தரநிலைகளுக்கு இணங்கவும் மேற்கொள்ளும் வகையில் அமைக்கப்பட்டுள்ளது.
மாதவரம் பால் பண்ணையில் பால் கையாளும் மற்றும் விநியோகப் பணிகளைப் பார்வையிடுதல், மாதவரம் பால் பண்ணையில் நாளொன்றுக்கு சுமார் 4.50 இலட்சம் லிட்டர் பால் கையாளப்பட்டு, நுகர்வோரின் பால் தேவையைப் பூர்த்தி செய்யும் வகையில், சராசரியாக 120 வாகனங்கள் மூலம் வடசென்னைப் பகுதிகளில் பால் விநியோகப் பணிகள் திறம்பட மேற்கொள்ளப்பட்டு வருகின்றன.

மாதவரம் பால் பண்ணையில் நடைபெற்றுவரும் பால் கையாளும் மற்றும் பால் விநியோகப் பணிகளை முதலமைச்சர் விஜய் இன்று நேரில் பார்வையிட்டு ஆய்வு மேற்கொண்டார்.
செய்தல் சென்னை மாநகர மக்களின் எதிர்கால பால் தேவையைப் பூர்த்தி செய்யும் வகையில், மாதவரத்தில் நாளொன்றுக்கு 7 இலட்சம் லிட்டர் பால் கையாளும் திறன் கொண்ட புதிய பால் பண்ணை 152 கோடியே 26 இலட்சம் ரூபாய் மதிப்பீட்டில் கட்டப்பட்டு வருகிறது. இது முழுமையான வசதிகளுடன் தானியங்கி தொழில்நுட்பத்துடன்கூடிய நவீன பால் பண்ணையாக அமைக்கப்பட்டு வருகிறது.

இதனைத்தொடர்ந்து முதலமைச்சர் மாதவரத்தில் நடைபெற்றுவரும் புதிய பால் பண்ணையின் கட்டுமானப் பணிகளை நேரில் பார்வையிட்டு ஆய்வு செய்து, பணிகளின் முன்னேற்றம் குறித்து அலுவலர்களிடம் கேட்டறிந்ததோடு, இப்பணிகளை துரிதப்படுத்தவும் அறிவுறுத்தினார். இந்நிகழ்ச்சியில், பால் மற்றும் பால்வள மேம்பாட்டுத் துறை அமைச்சர் விஜயலக்ஷ்மி, சட்டமன்ற உறுப்பினர்கள் விஜய் பிரபு, செந்தில் குமார், தமிழ்நாடு வீட்டு வசதி வாரியத் தலைவர் சிவா, கால்நடை பராமரிப்பு, பால்வளம், மீன்வளம் மற்றும் மீனவர் நலத்துறை செயலாளர் அனு ஜார்ஜ், பால்வளத்துறை இயக்குநர் மற்றும் ஆவின் மேலாண்மை இயக்குநர் சிவராசு மற்றும் அரசு உயர் அலுவலர்கள் கலந்து கொண்டனர்.