வாக்காளர்களை மீட்டெடுக்க முடியவில்லை!

உச்ச நீதிமன்றத்தின் உத்தரவின் பேரில், நீக்கப்பட்ட 27 லட்சம் வாக்காளர்கள் உள்ளிட்ட எஸ்.ஐ.ஆர் மேல்முறையீடுகளை விசாரிப்பதற்காக மேற்கு வங்கத்தில் நியமிக்கப்பட்ட பத்துக்கும் மேற்பட்ட தீர்ப்பாயங்களின் நீதிபதிகள் , இந்தியத் தேர்தல் ஆணையத்தின் தகவல் தொழில்நுட்பப் பிரிவால் தங்களுக்காக அமைக்கப்பட்ட டிஜிட்டல் இணையதளத்தில் உள்ள பெரும் குறைபாடுகளைச் சுட்டிக்காட்டியுள்ளனர்.

போர்ட்டலில் உள்ள குறைபாடுகள் காரணமாக சம்பந்தப்பட்ட தரப்பினருக்கு நோட்டீஸ் அனுப்ப முடியாமல் மேல்முறையீடுகளைத் தீர்ப்பதில் காலதாமதம் ஏற்படுவதாக அவர்கள் குற்றம் சாட்டியுள்ளனர். தீர்ப்பாயங்கள் மேல்முறையீடு செய்த வாக்காளர்களிடமிருந்து கூடுதல் ஆவணங்களைப் பதிவேற்றவோ, விர்ச்சுவல் விசாரணைகளை நடத்தவோ அல்லது நீக்கப்பட்ட வாக்காளரை மீண்டும் பட்டியலில் சேர்க்கவோ இந்த போர்ட்டல் அனுமதிக்கவில்லை என்று அதிகாரப்பூர்வ ஆவணங்கள் காட்டுகின்றன. மேலும், மேல்முறையீட்டாளர்கள் தீர்ப்பாயத்தின் உத்தரவுகளைப் பதிவிறக்கம் செய்யக்கூட இந்த போர்ட்டல் வழிவகை செய்யவில்லை என்று நீதிபதிகள் தெரிவித்துள்ளனர்.

ஆகஸ்ட் 11 அன்று நடைபெற்ற 12-க்கும் மேற்பட்ட தீர்ப்பாய நீதிபதிகளின் (மொத்தம் 19 பேர்) கூட்டத்தின் அறிக்கையில் இவ்வாறு குறிப்பிடப்பட்டுள்ளது. இந்த கருத்துகள் இந்தியத் தேர்தல் ஆணையத்திற்கும், கொல்கத்தா உயர் நீதிமன்றத் தலைமை நீதிபதிக்கும் தெரிவிக்கப்பட்டுள்ளதாக ‘தி இந்தியன் எக்ஸ்பிரஸ்’ செய்தி நிறுவனம் அறிந்துள்ளது.

யார் வாக்களிக்கலாம், யார் வாக்களிக்க முடியாது என்பது தொடர்பான தொடர்ச்சியான முடிவுகளுக்கு 10 மாதங்களில் 2 தேர்தல் ஆணையர்கள் 14 ஆட்சேபனைகளைப் பதிவு செய்ததாக கடந்த மாதம் ’தி இந்தியன் எக்ஸ்பிரஸ்’ நடத்திய புலனாய்வில் தெரியவந்தது. வாக்காளர் பட்டியலை இறுதி செய்யும் கள அதிகாரிகளுக்கான அணுகலை, குடிமக்கள் மற்றும் அதிகாரிகளுக்கான தேர்தல் ஆணையத்தின் முதன்மை டிஜிட்டல் அமைப்பான இ.சி.ஐ.என்.இ.டி ‘ECINET’ கட்டுப்படுத்தியது அவர்கள் எழுப்பிய முக்கியக் கவலைகளில் ஒன்றாகும்.

அதைத் தொடர்ந்து, இ.சி.ஐ.என்.இ.டி அமைப்பை ஆய்வு செய்யவும், அது சட்டத்திற்கு உட்பட்டு உள்ளதா என்பதை இரட்டைச் சரிபார்ப்பு செய்யவும் ஒரு சுதந்திர நிபுணருடன் கூடிய குழு அமைக்கப்படும் என்று தேர்தல் ஆணையம் அறிவித்தது. இதேபோல், தீர்ப்பாய நீதிபதிகள் சுட்டிக்காட்டிய தடைகள், நீக்கப்பட்ட வாக்காளர்களுக்கான உரிய சட்ட நடைமுறைகளை உறுதி செய்வதில் குறுக்கீடாக அமைந்துள்ளன.

நீதிபதிகளின் இந்த கவலைகள் கவனத்தில் எடுத்துக்கொள்ளப்பட்டதா என்பது குறித்து அறிய அக்டோபர் 1 அன்று தி இந்தியன் எக்ஸ்பிரஸ் சார்பில் இந்தியத் தேர்தல் ஆணையத்திற்கும், கொல்கத்தா உயர் நீதிமன்றப் பதிவாளர் ஜெனரலுக்கும் மின்னஞ்சல்கள் அனுப்பப்பட்டன. ஆனால், அதற்கு எந்தப் பதிலும் வரவில்லை.

ஆகஸ்ட் 11 கூட்டறிக்கை நீதிபதிகள் எதிர்கொள்ளும் சவால்களைப் பதிவு செய்துள்ளது. அதாவது, நேரடியாகவோ அல்லது சரியான வழியிலோ தரப்பினருக்கு நோட்டீஸ் அனுப்பப் போர்ட்டலில் ஒரு பொதுவான மற்றும் சரியான அமைப்பை உருவாக்குமாறு பல கோரிக்கைகள் மற்றும் நினைவூட்டல்கள் அனுப்பியும் இதுவரை எந்த வழிமுறையும் உருவாக்கப்படவில்லை. மே 2026-ல் எங்களில் சிலர் தரப்பினருக்கு வழங்கப்பட வேண்டிய நோட்டீஸ் படிவத்திற்கு ஒப்புதல் அளித்தோம், ஆனால் அது இன்றுவரை நடைமுறைக்கு வரவில்லை.

பதிவேற்றப்பட்ட ஆவணங்கள் கணக்கெடுப்புப் படிவத்தின்படி இல்லை என்றோ அல்லது கூடுதல் ஆவணங்கள் தேவை என்றோ தீர்ப்பாயம் கருதும் போது, அதைப் பெறுவதற்கான எந்த வழிமுறையும் போர்ட்டலில் இல்லை. இத்தகைய வழிமுறை இல்லாததால், ஒவ்வொரு தீர்ப்பாயமும் சம்பந்தப்பட்ட மாவட்ட ஆட்சியர், மாவட்டத் தேர்தல் அதிகாரி மூலம் மின்னஞ்சல் வழியாக நோட்டீஸ் அனுப்ப முயல்கிறது, ஆனால் அதற்கான வரவேற்பு மிகவும் குறைவாகவே உள்ளது.

தரப்பினரை விசாரிக்கத் தீர்ப்பாயம் விரும்பினால், விர்ச்சுவல் விசாரணைகளை நடத்துவதற்கான எந்த அமைப்பும் இல்லை. ஒரு மேல்முறையீடு வாக்காளரை நீக்குதல் அல்லது சேர்த்தல் மூலம் தீர்க்கப்பட்ட பிறகு, நீதிமன்ற உத்தரவின் காரணத்தினாலோ அல்லது பிற காரணத்தினாலோ அதை மீண்டும் பழைய நிலைக்குக் கொண்டுவர வேண்டும் என்றால், போர்ட்டலில் அதைச் செய்ய முடியாது.

தங்கள் பெயர் ஏன் நீக்கப்பட்டது அல்லது சேர்க்கப்பட்டது என்பதற்கான காரணங்களை அறியத் தீர்ப்பாயத்தின் உத்தரவை நியமிக்கப்பட்ட போர்ட்டலில் இருந்து சான்றளிக்கப்பட்ட நகலாகப் பெறவோ அல்லது பதிவிறக்கம் செய்யவோ தரப்பினருக்கு எந்த நடைமுறையும் இல்லை. ஏப்ரல் 1 நாளிட்ட தனது உத்தரவில், மேல்முறையீடுகளைத் தீர்மானிப்பதற்கு முன் காரணங்களைத் தெரிவிக்க வேண்டும் என்றும், பதிவுகளை மீண்டும் ஆய்வு செய்ய வேண்டும் என்றும் உச்ச நீதிமன்றம் தீர்ப்பாயங்களைக் கேட்டுக் கொண்டிருந்ததால் இது மிக முக்கியமானதாகக் கருதப்படுகிறது.

மாவட்ட ஆட்சியர் / மாவட்டத் தேர்தல் அதிகாரிகளிடம் நேரடியாகப் பதிவு செய்யப்பட்ட மேல்முறையீடுகள் குறித்து நீதிபதிகள் நிச்சயமற்ற தன்மையைச் சுட்டிக்காட்டினர். இந்த மேல்முறையீடுகள் டிஜிட்டல் மயமாக்கப்படாததால், இவற்றின் பதிவுகளைப் பராமரிக்க சரியான அமைப்பு இல்லை. இவர்களின் மேல்முறையீடுகள் சரியான பாதைக்குக் கொண்டுவரப்படாவிட்டால், அந்த மக்களுக்கு அநீதி இழைக்கப்படும் என்று அவர்கள் கூறியுள்ளனர்.