மத்திய அரசு ஊழியர்களுக்கு வெளியாகப்போகும் ஜாக்பாட்..!

மத்திய அரசு ஊழியர்கள் மற்றும் ஓய்வூதியதாரர்கள் மத்தியில் 8-வது ஊதியக் குழுவின் (8th Pay Commission) பரிந்துரைகள் மற்றும் புதிய ஊதிய மேட்ரிக்ஸ் பற்றிய எதிர்பார்ப்பு நாளுக்கு நாள் அதிகரித்து வருகிறது. குறிப்பாக, புதிய ஊதியக் குழுவில் ஃபிட்மென்ட் ஃபேக்டர் (Fitment Factor) எவ்வளவு நிர்ணயிக்கப்படும் என்பது அனைவரது மத்தியிலும் பெரும் கேள்வியாக உருவெடுத்துள்ளது.

ஃபிட்மென்ட் ஃபேக்டர் என்பது தற்போதைய ஊதியக் குழுவின் அடிப்படைச் சம்பளத்தை (Basic Pay), புதிய ஊதியக் குழுவின் திருத்தப்பட்ட அடிப்படைச் சம்பளமாக மாற்றுவதற்குப் பயன்படுத்தப்படும் ஒரு முக்கியப் பெருக்கல் காரணியாகும் (Multiplier). கடந்த 7-வது ஊதியக் குழுவில் 2.57 என்ற ஃபிட்மென்ட் ஃபேக்டர் பயன்படுத்தப்பட்டதன் மூலம் குறைந்தபட்ச அடிப்படைச் சம்பளம் ரூ. 7,000-லிருந்து ரூ. 18,000 ஆக உயர்ந்தது குறிப்பிடத்தக்கது.

தற்போது 7-வது ஊதியக் குழுவில் பின்பற்றப்பட்ட அதே 2.57 ஃபிட்மென்ட் ஃபேக்டர் முறையே மீண்டும் 8-வது ஊதியக் குழுவிலும் பயன்படுத்தப்பட்டால், பல்வேறு பிரிவு அரசு ஊழியர்களின் சம்பள அமைப்பில் பிரம்மாண்ட மாற்றங்கள் ஏற்படும். உதாரணமாக, குரூப்-டி மற்றும் எம்.டி.எஸ் (Level-1) ஊழியர்களின் தற்போதைய அடிப்படைச் சம்பளமான ரூ. 18,000, 2.57 காரணியால் பெருக்கப்படும் போது ரூ. 46,260 ஆக உயரும்.

இதன் மூலம் அவர்களின் மாதாந்திர அடிப்படைச் சம்பளத்தில் மட்டும் ரூ.28,260 வரை உயர்வு கிடைக்கும். இதேபோல, பட்டதாரி ஆசிரியர்களுக்கான (Level-7) அடிப்படைச் சம்பளம் ரூ. 44,900-லிருந்து உயர்ந்து தோராயமாக ரூ. 1,15,400 வரை எட்டும். மேலும், வகுப்பு-1 அரசிதழ் பதிவுபெற்ற அதிகாரிகளின் (Level-10) அடிப்படைச் சம்பளம் ரூ. 56,100-லிருந்து உயர்ந்து சுமார் ரூ. 1,44,200 ஆக அதிகரிக்க வாய்ப்புள்ளது.

புதிய அடிப்படைச் சம்பளம் நிர்ணயிக்கப்பட்ட பிறகு, தற்போது நடைமுறையிலுள்ள அகவிலைப்படி (DA) மீண்டும் பூஜ்ஜியம் (0%) என்ற நிலைக்கு மாற்றப்படும். அதைத் தொடர்ந்து, பணியாளர்களின் நகர்ப்புற வகைப்பாட்டிற்கு ஏற்ப புதிய அடிப்படைச் சம்பளத்தின் அடிப்படையில் வீட்டு வாடகைப்படி (HRA) மற்றும் போக்குவரத்துப் படி (TA) போன்றவை கணக்கிடப்பட்டு வழங்கப்படும்.

நிதி ஆய்வாளர்கள் மற்றும் தொழிற்சங்கங்கள் 1.92 முதல் 2.86 வரை பல்வேறு ஃபிட்மென்ட் ஃபேக்டர்களுக்கான சாத்தியக்கூறுகளை வெளிப்படுத்தி வருகின்றன. ஒருவேளை 2.57 ஃபிட்மென்ட் ஃபேக்டர் அமல்படுத்தப்பட்டால், ஏற்கனவே உள்ள அகவிலைப்படி புதிய அடிப்படைச் சம்பளத்துடன் இணைக்கப்படுவதன் மூலம் ஊழியர்கள் கைக்குக் கிடைக்கும் மொத்தச் சம்பளத்தில் (Take-home Salary) சுமார் 20% முதல் 30% வரை உண்மையான உயர்வு இருக்கக்கூடும். இருப்பினும், இவை அனைத்தும் தற்போதைய கணிப்புகளே என்பதால், 8-வது ஊதியக் குழுவின் அதிகாரப்பூர்வ அறிக்கைக்குப் பிறகே இறுதி விவரங்கள் தெரியவரும்.