காங்கிரஸ் கட்சி தன்னை 25 ஆண்டுகளாக பயமுறுத்த முயல்கிறது- பிரதமர் மோடி

நாட்டின் வளங்களை பயன்படுத்துவதில் இஸ்லாமியர்களுக்கு முன்னுரிமை வழங்கப்படுமென முன்னாள் பிரதமர் மன்மோகன் சிங் கூறிய வீடியோ ஒன்றை பாஜக வெளியிட்டுள்ள நிலையில், தன்னை பயமுறுத்தும் முயற்சியை கைவிடுமாறு காங்கிரஸ் கட்சிக்கு பிரதமர் நரேந்திர மோடி அறிவுறுத்தியுள்ளார்.

நாட்டின் வளங்களை பயன்படுத்துவதில் இஸ்லாமியர்களுக்கு முன்னுரிமை வழங்கப்படுமென முன்னாள் பிரதமர் மன்மோகன் சிங் கூறியதாக பிரதமர் மோடி அண்மையில் குற்றஞ்சாட்டியிருந்தார். இதனை மறுத்த காங்கிரஸ் கட்சி, பிரதமர் மோடி வெறுப்பு அரசியல் செய்து வருவதாக கடுமையாக விமர்சித்தது.

இந்நிலையில், 2009 ஆம் ஆண்டு இஸ்லாமியர்களுக்கு ஆதரவாக மன்மோகன் சிங் பேசிய வீடியோ ஒன்றை பாஜக தனது எக்ஸ் பக்கத்தில் வெளியிட்டது. இந்நிலையில், மேற்கு வங்கத்தில் தேர்தல் பரப்புரைக் கூட்டத்தில் கலந்து கொண்ட பிரதமர் மோடி இந்த வீடியோவை மேற்கொள் காட்டி காங்கிரஸ் கட்சிக்கு பதிலடி கொடுத்தார்.

இஸ்லாமியர்களுக்கு காங்கிரஸ் முன்னுரிமை கொடுப்பதைப் பற்றி பேசுவதால் தன்னை காங்கிரஸ் மற்றும் இந்தியா கூட்டணிக் கட்சியினர் வசைபாடுவதாக கவலை தெரிவித்தார். காங்கிரஸ் கூட்டணிக் கட்சியினர் 25 ஆண்டுகளாக தன்னை பயமுறுத்த முயன்றதாகவும், ஆனால் தோல்வியடைந்துவிட்டதாகவும் விமர்சித்தார். இனி இந்த முயற்சிகளை அவர்கள் நிறுத்திக் கொள்ள வேண்டும் என்றும் பிரதமர் மோடி சவால் விடுத்தார்.