பா.ஜ.க.வின் வாஷிங்மெஷின் இப்போது த.வெ.க.விடம்… – இயக்குநர் அமீர்

தமிழகத்தில் சட்டமன்றத் தேர்தல் முடிவடைந்த பிறகும் அரசியல் களம் ஓயவில்லை. தேர்தல் விறுவிறுப்பை விட, நிலையான அரசை அமைப்பதற்கும், பெரும்பான்மையை நிரூபிப்பதற்கும் தமிழக வெற்றிக் கழகம் மேற்கொண்டு வரும் அரசியல் நகர்வுகள் தமிழகத்தில் பெரும் பரபரப்பை ஏற்படுத்தியுள்ளன.

தமிழகத்தில் ஆட்சி அமைக்க 118 எம்.எல்.ஏ.க்களின் ஆதரவு தேவை என்ற நிலையில், த.வெ.க. 108 எம்.எல்.ஏ.க்களுடன் நின்றது. இந்தச் சூழலில், த.வெ.க.வுக்கு முதல் திருப்பமாக காங்கிரஸ் கட்சியின் ஆதரவு கிடைத்தது. தி.மு.க. உடனான கூட்டணி உடன்படிக்கையில் போட்ட கையெழுத்து காய்வதற்குள், அமைச்சர் பதவி என்ற நிபந்தனையுடன் காங்கிரஸ் கட்சி, த.வெ.க.வுடன் கரம் கோர்த்தது. தி.மு.க. கூட்டணியில் இருந்த மற்ற கட்சிகளும் த.வெ.க. பக்கம் மாறுவதற்கான ஒரு நுழைவு வாயிலாக அமைந்தது.

இதற்கிடையே, அ.தி.மு.க.-வின் (25 பேர் குழுவில்) முக்கிய நிர்வாகிகளான மரகதம் குமாரவேல், சத்யபாமா, ஜெயக்குமார், இசக்கி சுப்பையா ஆகிய 4 எம்.எல்.ஏ.க்கள் திடீரென தங்களது பதவியை ராஜினாமா செய்தனர். இவர்களது ராஜினாமா கடிதங்களை சபாநாயகர் உடனடியாக ஏற்றுக் கொண்டதோடு, அந்த 4 தொகுதிகளும் காலியானதாக அரசிதழில் வெளியிடப்பட்டு, இந்திய தேர்தல் ஆணையத்திற்கும் தகவல்கள் அனுப்பி வைக்கப்பட்டுவிட்டன. இதன் மூலம் அ.தி.மு.க-வின் பலம் 21 ஆகக் குறைந்துள்ளது. மேலும் 3 எம்.எல்.ஏ.க்கள் அடுத்த வாரம் ராஜினாமா செய்யக்கூடும் எனத் தகவல்கள் வெளியாகியுள்ளன.

இந்த அதிரடி நகர்வுகளைத் தொடர்ந்து, அ.தி.மு.க. பொதுச்செயலாளர் எடப்பாடி பழனிசாமி தரப்பினர் ஆளுநரைச் சந்தித்து, த.வெ.க.வுக்கு எதிராக ‘குதிரை பேரம்’ (நாடாளுமன்ற/சட்டமன்ற உறுப்பினர்களை விலைக்கு வாங்குதல்) புகாரை அளித்துள்ளனர். இது இந்த விவகாரத்தை நீதிமன்றத்திற்குக் கொண்டு செல்வதற்கான முதற்கட்ட நடவடிக்கையாகப் பார்க்கப்படுகிறது.

அ.தி.மு.க எம்.எல்.ஏ.க்கள் ராஜினாமா செய்துவிட்டு த.வெ.க.வில் இணைந்ததற்குப் பிரபல திரைப்பட இயக்குநர் அமீர் கடும் கண்டனம் தெரிவித்துள்ளார். இது குறித்து அவர் பேசியதாவது; அ.தி.மு.க. எம்.எல்.ஏ.க்கள் பதவியை ராஜினாமா செய்துவிட்டு, தலைமைச் செயலகத்திலே த.வெ.க.வில் இணைந்தது குதிரை பேரம் மட்டுமல்ல, அது ஒரு அயோக்கியத்தனம். இவர்கள் என்ன மாநில உரிமைக்காகவா ராஜினாமா செய்தார்கள்? கால் கடுக்க வெயிலில் நின்று இவர்களுக்கு ஓட்டுப் போட்ட மக்கள் என்ன முட்டாளா?

இவர்களை மீண்டும் தேர்தலில் போட்டியிட வைத்தால், அது மிகப்பெரிய ஜனநாயகப் படுகொலை. இதற்கு முன்னால் பாஜகதான் இதுபோன்ற வேலைகளைச் செய்து வந்தது. இப்போது, பா.ஜ.க.வின் அந்த ‘வாஷிங் மெஷின்’ த.வெ.க.விடம் சிக்கியுள்ளது.” என இயக்குநர் அமீர் மிகக் காரசாரமாகச் சாடியுள்ளார். ஆட்சி அமைப்பதற்கான பெரும்பான்மையைப் பெற த.வெ.க. முயலும் வேளையில், எதிர்க்கட்சிகளின் புகார்களும், அரசியல் விமர்சகர்களின் சாடல்களும் தமிழக அரசியலில் புதிய உச்சக்கட்ட விறுவிறுப்பை ஏற்படுத்தியுள்ளன.