இனி ஏர்போர்ட்டிலேயே இமிகிரேஷன்..!

மதுரை விமான நிலையம் சர்வதேச அந்தஸ்தைப் பெற்றுள்ளதால், பயணிகள் இனி மதுரையிலேயே ‘இமிகிரேஷன்’ (குடிவரவு) உள்ளிட்ட அனைத்து சர்வதேச நடைமுறைகளையும் முழுமையாக முடித்துக்கொள்ளலாம் என மத்திய விமானப் போக்குவரத்து அமைச்சர் ராம்மோகன் நாயுடு தெரிவித்தார்.

லோக்சபாவில் நடைபெற்ற கேள்வி நேரத்தின் போது தமிழக காங்கிரஸ் எம்.பி. மாணிக்கம் தாகூர் எழுப்பிய கேள்விக்குப் பதிலளித்த அவர், மதுரையை சர்வதேச விமான நிலையமாக உயர்த்துவது தென் தமிழக மக்களின் நீண்டநாள் கோரிக்கையாக இருந்ததை நினைவுகூர்ந்து, அதை நிறைவேற்றியதில் மத்திய அரசு பெருமிதம் கொள்கிறது என்றார்.

மேலும், மதுரையில் இருந்து வெளிநாடுகளுக்கு நேரடி விமான சேவைகளை அதிகரிக்கவும், இருதரப்பு விமான சேவை ஒப்பந்தங்களில் மதுரையை முக்கிய மையமாக இணைக்கவும் நடவடிக்கை எடுக்கப்படும் எனவும் உறுதியளித்தார். இதன் மூலம் சுற்றுலா துறை வளர்ச்சி, தொழில் முதலீடுகள் அதிகரிப்பு, ஏற்றுமதி வாய்ப்புகள் விரிவு மற்றும் வேலைவாய்ப்பு உருவாக்கம் போன்ற பல்வேறு பொருளாதார முன்னேற்றங்கள் ஏற்படும் என எதிர்பார்க்கப்படுகிறது.

அதேபோல், மதுரையிலேயே குடிவரவு சோதனைகள், சுங்கச் சோதனைகள் போன்றவை முடிந்துவிடுவதால், பயணிகள் பின்னர் பெங்களூரு, மும்பை, ஹைதராபாத் போன்ற பெரிய மைய விமான நிலையங்களுக்கு சென்றாலும், அங்கிருந்து மீண்டும் சர்வதேச முனையத்திற்குள் செல்ல வேண்டிய அவசியம் இல்லாமல் தங்களது பயணத்தை எளிதாகத் தொடர முடியும்.

இது பயண நேரத்தை குறைப்பதுடன், இடைநிலை சிக்கல்களையும் தவிர்க்க உதவும். மேலும், மதுரை விமான நிலையத்தில் பயணிகள் வசதிகளை மேம்படுத்தும் வகையில் புதிய முனைய கட்டிடங்கள், விரிவான ரன்‌வே, கூடுதல் பார்க்கிங் வசதிகள், மேம்பட்ட பாதுகாப்பு மற்றும் டிஜிட்டல் சேவைகள் போன்றவை உருவாக்கும் பணிகளும் கட்டத்திற்குக் கட்டம் முன்னெடுக்கப்பட்டு வருகின்றன.

இதன் மூலம் தென் தமிழகத்தின் முக்கிய நகரமாக உள்ள மதுரை, சர்வதேச விமானப் போக்குவரத்து வரைபடத்தில் தனித்த அடையாளம் பெறும் என்றும், உலக நாடுகளுடன் நேரடி தொடர்பு ஏற்படுத்தும் முக்கிய வாயிலாக மாறும் என்றும் அதிகாரிகள் தெரிவித்துள்ளனர்.