அதிமுக-பாமக கூட்டு! *திடுதிடுப்பென இபிஎஸ்-ஐ சந்தித்த அன்புமணி..* ராமதாஸ், ஓபிஎஸ், டிடிவி தினகரன் நிலை என்ன?

தமிழக அரசியல் களம் எப்போதும் பரபரப்புக்குப் பஞ்சமில்லாததுதான். ஆனால், தேர்தல் தேதி அறிவிப்புக்கு இன்னும் சில மாதங்களே உள்ள நிலையில், இன்று (ஜனவரி 7) நடந்த ஒரு சந்திப்பு ஒட்டுமொத்த தமிழகத்தின் கவனத்தையும் ஈர்த்துள்ளது. ‘அதிமுக – பாமக கூட்டு!’ என்னும் இந்த அதிரடி அறிவிப்பு, தமிழகத்தின் தேசிய ஜனநாயகக் கூட்டணியில் ஒரு பெரிய பாய்ச்சலைக் காட்டியிருக்கிறது.

சட்டமன்றத் தேர்தலுக்கு இன்னும் மூன்று அல்லது நான்கு மாதங்களே இருக்கும் நிலையில், அரசியல் கட்சிகள் தங்களது கூட்டணி வியூகங்களை வகுப்பதில் தீவிரம் காட்டி வருகின்றன. இந்தச் சூழலில், சென்னை கிரீன்வேஸ் சாலையில் உள்ள அதிமுக பொதுச்செயலாளர் எடப்பாடி பழனிசாமி வீட்டுக்கு, பாமக தலைவர் அன்புமணி ராமதாஸ் திடுதிடுவெனச் சென்று பேச்சுவார்த்தை நடத்தியதுதான் இன்றைய ஹாட் நியூஸ். இந்தச் சந்திப்பு நீண்ட நேரம் நீடிக்கவில்லை. ஆனால், அதன்பிறகு இரு தலைவர்களும் கூட்டாக வெளியிட்ட அறிவிப்பு, பெரும் அதிர்வலைகளை ஏற்படுத்தியிருக்கிறது.

“அதிமுக கூட்டணியில் பாமக இணைந்துள்ளது” – இதுதான் எடப்பாடி பழனிசாமியும், அன்புமணி ராமதாஸும் இணைந்து அறிவித்த செய்தி. தொகுதிப் பங்கீடு குறித்த முடிவுகள் பின்னர் அறிவிக்கப்படும் என்று இபிஎஸ் அறிவிக்க, அன்புமணி ராமதாஸ் இன்னும் ஒரு படி மேலே போய், இது ‘வலுவான கூட்டணி’ என்றும், “மக்கள் விரோத, சமூக நீதிக்கு எதிரான திமுக ஆட்சியை வீட்டுக்கு அனுப்ப வேண்டும் என்பதற்காகவே இணைந்துள்ளோம்” என்றும் முழங்கினார். பாமக தொண்டர்கள் எதிர்பார்த்த கூட்டணி இது என்றும் அவர் குறிப்பிட்டது, இந்த முடிவு பாமகவின் தலைமை மட்டத்தில் ஒருமித்த கருத்துடன் எடுக்கப்பட்டதையே காட்டுகிறது.

இந்தக் கூட்டணியில் ஒரு சிக்கல் இல்லாமலில்லை. பாமக நிறுவனர் ராமதாஸ் மற்றும் அன்புமணி தரப்பு என பாமகவில் இரண்டு பிரிவுகள் உள்ளன. இந்தக் கூட்டணி முடிவுக்கு ராமதாஸின் ஆசி இருக்கிறதா? அல்லது அன்புமணி தரப்பு மட்டும் இபிஎஸ்ஸுடன் கைகோர்த்துள்ளதா? என்பதே அரசியல் விமர்சகர்களின் தற்போதைய கேள்வி.

அதிமுக கூட்டணியைப் பொறுத்தவரை, ஓ. பன்னீர்செல்வம் (ஓபிஎஸ்) மற்றும் டிடிவி தினகரன் ஆகியோரின் நிலைமை என்ன என்ற கேள்வியும் இப்போது பூதாகரமாக எழுந்துள்ளது. அதிமுகவின் பிளவுபட்ட தலைவர்களாக இவர்கள் தனித்துக் களமாடி வந்தாலும், பாஜக இவர்களைக் கூட்டணியில் சேர்ப்பதற்கு மறைமுகமாக விரும்பியது. அதே நேர்ம, பாமகவின் திடீர் உள்ளீர்ப்பு, இபிஎஸ்ஸுக்கு மேலும் பலத்தைக் கொடுத்திருக்கிறது.

 

பாமகவின் வருகை, இபிஎஸ்ஸை இன்னும் அசைக்க முடியாத தலைவராக நிலை நிறுத்தியுள்ளது. வட மாவட்டங்களில் பாமகவின் குறிப்பிடத்தக்க வாக்கு வங்கியை இபிஎஸ் உறுதி செய்துள்ளதால், கூட்டணியின் மையப்புள்ளி இபிஎஸ்ஸின் கைகளில் இன்னும் உறுதியாகியிருக்கிறது. எனவே, ஓபிஎஸ் மற்றும் டிடிவி தினகரன் போன்றோர் இனி தேசிய ஜனநாயகக் கூட்டணியில் இணைவதற்கு, எடப்பாடி பழனிசாமியின் நிபந்தனைகளுக்குக் கட்டுப்பட்டே ஆக வேண்டும் என்ற நிலை உருவாகியுள்ளது.

ஒருவேளை இபிஎஸ்ஸை பகைத்துக்கொண்டு இவர்கள் தனித்துச் சென்றால், அது திமுகவுக்கு சாதகமாகிவிடும் என்று பாஜக தலைமை அறிந்தே இருக்கிறது. இந்தச் சூழலில், ஓபிஎஸ் மற்றும் டிடிவி தினகரனுக்கு கொடுக்கப்படும் முக்கியத்துவம் குறையவே வாய்ப்புள்ளது. இனி இவர்கள் இருவரும் இபிஎஸ்ஸிடம் ‘சரணடைவதா’ அல்லது தனித்துப் போட்டியிட்டு தங்கள் இருப்பைக் காட்டுவதா என்ற தர்மசங்கடமான நிலையில் உள்ளனர்.

அதிமுக, பாஜக, மற்றும் இப்போது பாமக என வலுவான ஒரு கூட்டு அமைந்திருப்பதால், 2026 சட்டமன்றத் தேர்தல் களம் மேலும் விறுவிறுப்பாகியுள்ளது. ஆளும் திமுகவுக்கு இந்த கூட்டணி ஒரு பெரும் சவாலை நிச்சயமாக அளிக்கும்.