திருவாடானை அரசு கல்லூரியில் கௌரவ விரிவுரையாளர்கள் வகுப்புகளை புறக்கணித்து போராட்டம்: 5 அம்ச கோரிக்கைகளை வலியுறுத்தி முழக்கம்
திருவாடானை அரசு கலை மற்றும் அறிவியல் கல்லூரி முன்பாக, கௌரவ விரிவுரையாளர்கள் பல்வேறு கோரிக்கைகளை வலியுறுத்தி இன்று வகுப்புகளை புறக்கணித்து வாயில் முன்பு 5 அம்ச கோரிக்கைகளை வலியுறுத்தி அரசிற்கு எதிராக கண்டனமுழக்கப் போராட்டத்தில் ஈடுபட்டனர்.
போராட்டத்தில் ஈடுபட்ட விரிவுரையாளர்கள் பின்வரும் 5 அம்ச கோரிக்கைகளை முன்வைத்தனர்: பல்கலைக்கழக மானியக் குழு (UGC) நிர்ணயம் செய்தபடி மாத ஊதியமாக ₹57,800 வழங்க வேண்டும்.ஆண்டு முழுவதும் (12 மாதங்கள்) தடையின்றி ஊதியம் வழங்க வேண்டும்.
அனைத்து விரிவுரையாளர்களுக்கும் வருங்கால வைப்பு நிதி (EPF) பிடித்தம் செய்யப்பட வேண்டும்.பெண் விரிவுரையாளர்களுக்கு ஊதியத்துடன் கூடிய மகப்பேறு விடுப்பு வழங்க வேண்டும்.
ஓய்வு பெற்ற கௌரவ விரிவுரையாளர்களுக்கு ₹25 லட்சம் பணிக்கொடை (Gratuity) வழங்க வேண்டும். உயர்கல்வித்துறை வழிகாட்டுதலின்படி, 1996 முதல் 2025 வரை பல்வேறு காலகட்டங்களில் இப்பணியில் நியமிக்கப்பட்டுள்ள விரிவுரையாளர்கள், தங்களின் நீண்ட கால கோரிக்கைகள் நிறைவேற்றப்படாததால் தற்போது வகுப்பு புறக்கணிப்புப் போராட்டத்தை கையில் எடுத்துள்ளனர்.
இதன் தொடக்கமாக இன்று கல்லூரி வாயில் முன்பாக நடைபெற்ற போராட்டத்திற்கு, கிளைத் தலைவர் பேராசிரியர் ராமமூர்த்தி தலைமை தாங்கினார். இதில் 20-க்கும் மேற்பட்ட கௌரவ விரிவுரையாளர்கள் கலந்துகொண்டு, தமிழக அரசுக்கு எதிராக கண்டன முழக்கங்களை எழுப்பினர். நிறைவாக, கிளைச் செயலாளர் பேராசிரியர் சரவணன் அனைவருக்கும் நன்றி தெரிவித்தார். தங்களின் வாழ்வாதாரக் கோரிக்கைகளை அரசு உடனடியாக நிறைவேற்ற வேண்டும் என அவர்கள் வலியுறுத்தியுள்ளனர்.
