விமானப் பாதுகாப்பு சான்றிதழ் தர ரூ 2.5 லட்சம் லஞ்சம்!

தனியார் நிறுவனத்திற்கு சொந்தமான விமானத்தின் பறக்கும் தகுதிச் சான்றிதழ் வழங்கும் விஷயத்தில் முறையற்ற சலுகைகளை செய்து கொடுப்பதற்காக லஞ்சம் பெற்ற குற்றச்சாட்டில் சென்னையில் பணியாற்றி வந்த சிவில் விமானப் போக்குவரத்து இயக்ககத்தின் (DGCA) துணை இயக்குநர் சுஷீல் குமார் கார்க் மற்றும் ‘எக்வி ஏர் டிரெய்னிங் ஆர்கனைசேஷன் பிரைவேட் லிமிடெட்’ நிறுவனத்தின் இயக்குநர் சுஷீல் குமார் பானே ஆகியோரை சி.பி.ஐ கைது செய்துள்ளது.

தனியார் நிறுவனத்தால் இயக்கப்படும் விமானத்தின் பறக்கும் தகுதிச் சான்றிதழை புதுப்பித்துத் தருவதற்கோ அல்லது சலுகை வழங்குவதற்கோ கார்க் ரூ. 2.5 லட்சம் லஞ்சம் கோரிப் பெற்றதாக சி.பி.ஐ குற்றம் சாட்டியுள்ளது. தகவல்களின்படி, இந்த லஞ்ச பணம் ‘எக்வி ஏர் டிரெய்னிங் ஆர்கனைசேஷன் பிரைவேட் லிமிடெட்’ நிறுவனம் இயக்கும் விமானங்களின் பறக்கும் தகுதி தொடர்பான ஒழுங்குமுறை ஒப்புதல்களுடன் தொடர்புடையது எனத் தெரியவந்துள்ளது.

விமானங்கள் நிர்ணயிக்கப்பட்ட பாதுகாப்பு மற்றும் செயல்பாட்டுத் தரநிலைகளை பூர்த்தி செய்கின்றனவா என்பதை உறுதிப்படுத்துவதை நோக்கமாகக் கொண்ட மிக முக்கியமான ஒழுங்குமுறை செயல்முறையே இந்தப் ‘பறக்கும் தகுதிச் சான்றிதழ்’ ஆகும். கார்க் மற்றும் பானே தவிர, அந்தத் தனியார் நிறுவனம் மற்றும் அடையாளம் தெரியாத பிற நபர்களின் பெயர்களையும் சி.பி.ஐ இந்த வழக்கில் சேர்த்துள்ளதாக அதிகாரிகள் தெரிவித்துள்ளனர்.

இந்த வழக்கில் தொடர்புடைய மற்ற நபர்களின் பங்கை கண்டறியவும், லஞ்சப் பணம் கைமாறியது விமானப் போக்குவரத்து தொடர்பான ஒப்புதல்களில் ஈடுபட்டுள்ள ஒரு பெரிய கூட்டமைப்பின் பகுதியா என்பதை ஆராய்வது தொடர்பான விசாரணை தீவிரமாக நடைபெற்று வருவதாக சி.பி.ஐ தெரிவித்துள்ளது.

லஞ்சம் கேட்டது தொடர்பாக சி.பி.ஐ-க்குத் ரகசியத் தகவல் கிடைத்ததைத் தொடர்ந்து, முதல் தகவல் அறிக்கை பதிவு செய்யப்பட்டு சோதனை நடத்தப்பட்டதாக தகவல்கள் தெரிவிக்கின்றன. அதிகாரிகளின் கூற்றுப்படி, கார்க் ரூ.2.5 லட்சம் லஞ்சப் பணத்தைப் பெற்றுக் கொண்டதைத் தொடர்ந்து, அவரும் பானேவும் கைது செய்யப்பட்டனர். கைதான அதிகாரியைத் தேசியத் தலைநகரான டெல்லிக்கு அழைத்துச் சென்று விசாரணை நடத்துவதற்காக, அவரைச் சட்டப்படி அழைத்துச் செல்ல அனுமதி கோரி சி.பி.ஐ நீதிமன்றத்தை அணுகவுள்ளது.