அரியணை ஏறும் ‘ஜனநாயகன ! விஜய் சுனாமியில் சுருண்ட திமுக, அதிமுக.. காங். தயவில் கூட்டணி ஆட்சி அமைகிறது!

தமிழக அரசியல் வானில் வழக்கமான நட்சத்திரங்கள் மின்னி மறைந்த காலமெல்லாம் மலையேறிவிட்டது. ஏப்ரல் 23-ல் வாக்குப்பதிவு இயந்திரங்களுக்குள் முடங்கிக் கிடந்த தமிழ்நாட்டின் மூர்க்கமான மனநிலை, மே 4-ம் தேதி தேர்தல் முடிவுகளாக வெடித்தபோது, ஒட்டுமொத்த இந்தியாவே அதிர்ந்து போனது. கோடம்பாக்கத்தின் ‘தளபதி’ ஆளப்பிறந்த தலைவனாக அரசியல் களத்தில் தடம்பதித்த கதை, இப்போது தமிழகத்தின் புதிய அதிகார மையத்தை நிர்ணயிக்கும் சரித்திரமாக மாறியிருக்கிறது. ஆம், விஜய்யின் தமிழக வெற்றிக் கழகம், திராவிட அரசியலின் கோட்டைகளை இடித்துத் தரைமட்டமாக்கி, அதிகாரப் பீடத்தில் கம்பீரமாக அமர்ந்திருக்கிறது.

மண்ணைக் கவ்விய ‘மாண்புமிகு’கள்!

எதிர்பார்ப்புகளுக்கு விடை கொடுத்த அந்த மே 4-ம் தேதி, திமுக மற்றும் அதிமுக முகாம்களில் நிலவிய மௌனம் ஒருவிதமான மரண பயத்தை வெளிப்படுத்தியது. சென்னை கொளத்தூரில் பதிவான வாக்குகள், திமுகவின் அஸ்திவாரத்தையே அசைத்துப் பார்த்தன. முதல்வர் மு.க. ஸ்டாலின், தவெக வேட்பாளர் வி.எஸ். பாபுவிடம் 9,192 வாக்குகள் வித்தியாசத்தில் மண்ணைக் கவ்வியது, திராவிட இயக்க வரலாற்றிலேயே எழுதப்படாத கறுப்புப் பக்கம். 82,180 வாக்குகளைத் தவெக வேட்பாளர் அள்ளியபோது, கோட்டையின் காவலர் சரிந்ததை உணர்ந்தது தமிழகம்.

அதேபோல், காட்பாடியில் மூன்று தசாப்த கால சாம்ராஜ்யத்தை வைத்திருந்த துரைமுருகன், விடாமுயற்சியுடன் களம் கண்ட அதிமுகவின் வி. ராமுவிடம் வீழ்ந்தது, ‘காலம் யாரையும் விட்டு வைக்காது’ என்பதற்கான எச்சரிக்கை மணியாகவே ஒலிக்கிறது. ‘மாஸ்டர்’ படத்தில் விஜய் சொல்வது போல, “எதற்கும் கலங்காதே” என்று அவர் தொண்டர்களுக்குச் சொன்ன மந்திரம், தேர்தல் களத்தில் விசிலாக மாறி ஒலிக்கத் தொடங்கியது. திமுகவின் கோட்டையாகக் கருதப்பட்ட ஆலந்தூரில் தா.மோ. அன்பரசன், திருவெறும்பூரில் அன்பில் மகேஷ், தூத்துக்குடியில் கீதா ஜீவன், மதுரை மத்தியில் பிடிஆர் பழனிவேல் தியாகராஜன் என 16 அமைச்சர்கள் வீழ்ந்ததெல்லாம், எந்தத் திரைக்கதைக்கும் கட்டுப்படாத அரசியல் திருப்பம்.

இதே நிலைதான் அதிமுகவிலும். முன்னாள் அமைச்சர்கள் செல்லூர் ராஜூ, ஆர்.பி. உதயகுமார், ஜெயக்குமார், தங்கமணி என சீனியர் தலைகள் பலரும் தவெகவின் அலைக்கு ஈடுகொடுக்க முடியாமல் காணாமல் போயினர். அதிமுகவில் இருந்த சீனியர்கள் பலரே விஜய்யின் பக்கம் காற்று வீசுவதை உணர்ந்து ‘ஷிப்ட்’ ஆனது, அந்தப் படத்தின் ‘கிளைமாக்ஸ்’ திருப்பத்தைப் போல சுவாரஸ்யமானது.

விசில் புரட்சியின் பின்னணி

விஜய்யின் இந்த வெற்றிக்குக் காரணம் வெறும் ரசிகர் மன்றம் மட்டுமல்ல; அந்த ‘விசில்’ சத்தம். பிரசார மேடைகளில் அவர் பேசியதைக் காட்டிலும், சமூக வலைதளங்களில் அவர் சின்னம் கொண்டு சேர்த்த வேகம், ஒரு மாஸ் படத்தின் டீசர் ரிலீஸ் போல மக்களைச் சென்றடைந்தது. பிரசாரத்தின் போது கரூர் உள்ளிட்ட இடங்களில் நடந்த அசம்பாவிதங்களால் அவருக்குக் கட்டுப்பாடு விதிக்கப்பட்டது, ஒருவகையில் அவருக்கு ‘சிம்பதி’ அலையை உருவாக்கியது. ‘சர்க்கார்’ படத்தில் அவர் எதிர்த்த அதே சிஸ்டத்திற்கு எதிராக, நிஜ வாழ்க்கையில் அவர் களம் இறங்கியபோது, மக்கள் அவரை ஒரு மீட்பராகப் பார்த்தனர்.

கடந்த ஐம்பது ஆண்டுகளாக திராவிடக் கட்சிகளையே பார்த்துப் பழகிய மக்களுக்கு, ஒரு மாற்றத்தை நோக்கித் தாகம் இருந்தது. நாம் தமிழர் கட்சியின் சீமான், மக்கள் நீதி மய்யத்தின் கமல்ஹாசன் எனப் பலரும் முயன்றும் எட்டாத அந்த வெற்றிக்கனியை, விஜய் மிக லாவகமாகப் பறித்துள்ளார். இவருடைய பேச்சுக்களில் இருந்த யதார்த்தம், எவ்விதமான அரசியல் காழ்ப்புணர்ச்சியும் இல்லாத தொனி, சாதியச் சாயங்கள் பூசப்படாத அடையாளம் ஆகியவை அவரை ‘நம்பகமான மாற்றாக’ மாற்றியது. திராவிடக் கட்சிகளின் பாணி அரசியலைச் செய்யாமல், ஒரு ‘லென்ஸ்’ வழியே சமூகத்தை அணுகிய விஜய்யின் ஸ்டைல், இன்று அரசியல் வகுப்பறையில் புதிய பாடமாக மாறியிருக்கிறது.

காங். ஆதரவில் மலரும் கூட்டணி ஆட்சி!

234 தொகுதிகளில் 108 இடங்களைக் கைப்பற்றிய தவெக, தனிப்பெரும் கட்சியாக உருவெடுத்தாலும், ஆட்சி அமைக்க காங்கிரஸ் உள்ளிட்ட கட்சிகளின் கரம் பிடிப்பது தவிர்க்க முடியாததாகிவிட்டது. திருமாவளவன் சுட்டிக்காட்டியது போல, தமிழக மக்கள் ஒரு நுட்பமான முடிவை எடுத்திருக்கிறார்கள். “யாருக்கும் முழு அதிகாரத்தை மட்டும் தந்துவிடாதீர்கள்!” என்று அவர்கள் கட்டளையிட்டிருக்கிறார்கள். இது ஒரு தொங்கு நிலையும் அல்ல, அதே சமயம் ஒரு சவாலான கூட்டணி ஆட்சிக்கான தொடக்கமும் கூட.

திமுக கூட்டணியின் 73 இடங்களும், அதிமுக கூட்டணியின் 52 இடங்களும், விஜய்யின் 108 இடங்களும் பெற்றுள்ள திமுக கூட்டணியில் காங்கிரஸ் 5 இடங்கள், கம்யூனிஸ்டுகள் 4 இடங்கள், விசிக 2 இடங்கள் என்று ஆதரவை பெற்று கூட்டணி ஆட்சி அமையும் வாய்ப்பு உள்ளது. இந்தச் சூழல், தமிழக அரசியலில் ஒரு புதிய பரிமாணத்தை உருவாக்கியிருக்கிறது.

எதிர்க்கட்சிகளின் கூர்மையான கேள்விகளுக்குப் பதில் சொல்ல வேண்டிய கட்டாயம் மட்டுமல்ல, கூட்டணிக் கட்சிகளின் கொள்கை முடிவுகளையும் அரவணைத்துச் செல்ல வேண்டிய ‘அரசியல் முதிர்ச்சியை’ விஜய் நிரூபிக்க வேண்டிய காலமிது. எம்.ஜி.ஆருக்குப் பிறகு ஒரு சினிமா நடிகர், முதல் தேர்தலிலேயே இமாலய வெற்றியைப் பெற்று, அரியணையை அலங்கரிப்பது என்பது சாதாரணமான விஷயமல்ல.

விஜயின் இந்த ‘விசில் புரட்சி’ வெறும் வெற்றிதானா அல்லது நீண்டகால மாற்றமா என்பது, அவர் அமைக்கும் அமைச்சரவையும், அவர் நிறைவேற்றும் வாக்குறுதிகளுமே சொல்லும். ‘கத்தி’ படத்தில் அவர் கேட்டது போல, விவசாயிக்கும் சாதாரண மக்களுக்கும் அவர் என்ன செய்யப் போகிறார்?

திராவிடப் பெரும்புள்ளிகளை வீழ்த்திவிட்டு, மக்கள் கொடுத்த இந்த அரியணையில் விஜய் எப்படிச் செயல்படப் போகிறார்? இது ஒரு மெகா ஹிட் படமா அல்லது இடைவேளைக்குப் பின் திருப்பம் வரப்போகும் கதையா? காலம் தான் பதில் சொல்ல வேண்டும். ஆனால் ஒன்று மட்டும் நிச்சயம், தமிழக அரசியல் இனி ‘தளபதி’யைச் சுற்றித்தான் சுழலப்