தொகுதி மறுவரையறையில் முதலில் தடுமாறினாலும் பிறகு சரியான முடிவெடுத்தது தி.மு.க!

மக்களவை மற்றும் மாநிலங்களவை தொகுதிகள் மறுவரையறை (Delimitation) விவகாரத்தில், தொடக்கத்தில் திமுக சற்று தடுமாறிய போதிலும், பின்னர் சரியான நிலைப்பாட்டை எடுத்துள்ளதாகவும், இதன் மூலம் வலுவான கூட்டணி உருவெடுத்துள்ளதாகவும் காங்கிரஸ் மூத்த தலைவரும் முன்னாள் மத்திய அமைச்சருமான ப. சிதம்பரம் தெரிவித்துள்ளார்.

இது குறித்து பேசிய அவர், தொகுதி மறுவரையறை தொடர்பாக “நீதியான மறுவரையறை” (Fair Delimitation) என்ற சொற்றொடரை முன்வைத்து சிலர் பேசியபோது, திமுக தொடக்கத்தில் ஒரு வாரம் தடுமாறியதாக சுட்டிக்காட்டினார். மேலும், முதலமைச்சர் விஜய் கூட்டிய நாடாளுமன்ற உறுப்பினர்கள் கூட்டத்தில் திமுக பங்கேற்காதது தனக்கு அதிர்ச்சியையும் வருத்தத்தையும் அளித்ததாகத் தெரிவித்தார்.

இருப்பினும், சட்டமன்றத்தில் மறுவரையறைக்கு எதிரான தீர்மானம் நிறைவேற்றப்பட்டபோது, திமுக அதற்கு ஆதரவாக வாக்களித்து சரியான நிலைப்பாட்டை எடுத்ததை சுட்டிக்காட்டிய ப. சிதம்பரம், ஸ்டாலினின் இந்த நடவடிக்கையைப் பாராட்டினார்.

தொகுதி மறுவரையறைக்குப் பிறகு நாட்டின் மொத்த மக்களவைத் தொகுதிகளின் எண்ணிக்கை 543 ஆகவும், அதில் தமிழ்நாட்டின் பங்களிப்பு 39 ஆகவும் தொடர்ந்து நீடிக்க வேண்டும் என்பதே காங்கிரஸ் மற்றும் அதன் கூட்டணி கட்சிகளின் உறுதியான நிலைப்பாடாகும். இதையே காங்கிரஸ் காரியக் கமிட்டியும் தீர்மானமாக நிறைவேற்றியுள்ளது.

தற்போது திமுக, காங்கிரஸ், கம்யூனிஸ்ட் கட்சிகள், இந்திய யூனியன் முஸ்லிம் லீக் மற்றும் விடுதலைச் சிறுத்தைகள் உள்ளிட்ட அனைத்து கூட்டணி கட்சிகளும் இதில் ஒரே நேர்கோட்டில் உறுதியாக நிற்கின்றன. தொகுதி மறுவரையறை தொடர்பான அரசியலமைப்பு திருத்த மசோதா மீண்டும் கொண்டுவரப்பட்டால், அதை அனைவரும் ஒன்றுபட்டு நின்று எதிர்த்துத் தோற்கடிப்போம் என்றும் ப.சிதம்பரம் மிகத் தெளிவாக உறுதிபடத் தெரிவித்துள்ளார்.