லாரி, கனரக வாகனங்களுக்கு எஃப்.சி கட்டண உயர்வு 3 மாதங்களுக்கு நிறுத்திவைப்பு

தமிழகத்தில் லாரி உள்ளிட்ட கனரக வாகனங்களுக்கான தகுதிச் சான்றிதழ் (எஃப்.சி) கட்டண உயர்வை அடுத்த மூன்று மாதங்களுக்கு ஒத்திவைத்து மாநில அரசு அதிரடி உத்தரவு பிறப்பித்துள்ளது. இதனால் லாரி உரிமையாளர்கள் அறிவித்திருந்த வேலைநிறுத்தப் போராட்டம் முடிவுக்கு வந்துள்ளது.

மத்திய சாலை போக்குவரத்து அமைச்சகம் கடந்த 2023-ம் ஆண்டு நவம்பர் மாதம், இருசக்கர வாகனங்கள் முதல் கனரக வாகனங்கள் வரை அனைத்திற்கும் தகுதிச் சான்றிதழ் புதுப்பிப்பதற்கான கட்டணத்தை உயர்த்தியது. குறிப்பாக, கனரக வாகனங்களுக்கான கட்டணம் ரூ.850-லிருந்து பலமடங்கு உயர்த்தப்பட்டு ரூ.28,200 ஆக நிர்ணயிக்கப்பட்டது. மேலும், வாகனங்களின் பதிவு காலத்தை அடிப்படையாகக் கொண்டு அபராதக் கட்டணங்களும் நடைமுறைக்கு வந்தன.

இந்தக் கட்டண உயர்வு தங்களுக்குப் பெரும் நிதிச் சுமையை ஏற்படுத்துவதாக லாரி உரிமையாளர்கள் சங்கம் குற்றம் சாட்டியது. இது தொடர்பாக அமைச்சர்கள் மற்றும் அதிகாரிகளிடம் பலமுறை மனு அளித்தும், நீண்ட நாட்களாக எந்தத் தீர்வும் எட்டப்படவில்லை. இதனால் ஆவேசமடைந்த உரிமையாளர்கள், தங்களது கோரிக்கையை வலியுறுத்தி வரும் 25-ம் தேதி முதல் காலவரையற்ற வேலைநிறுத்தப் போராட்டத்தில் ஈடுபடப்போவதாக அறிவித்தனர்.

லாரி உரிமையாளர்களின் வாழ்வாதாரத்தைக் கருத்தில் கொண்டும், போராட்டத்தால் அத்தியாவசியப் பொருட்கள் விநியோகம் பாதிக்கப்படக் கூடாது என்பதற்காகவும் தமிழக அரசு இந்தப் பிரச்சினையில் தலையிட்டது.

அதன்படி, தற்போது உயர்த்தப்பட்டுள்ள தகுதிச் சான்றிதழ் கட்டணத்தை அடுத்த 3 மாதங்களுக்கு ஒத்திவைப்பதாக அரசு அறிவித்துள்ளது. இந்தக் காலகட்டத்தில் பழைய கட்டணமே வசூலிக்கப்படும் என்றும் உறுதி அளிக்கப்பட்டுள்ளது. அரசின் இந்த அறிவிப்பால் லாரி உரிமையாளர்கள் நிம்மதி அடைந்துள்ளனர்.