--- --:--:-- --

நோயாளிகளை கடத்தியதாக மருத்துவர் மீது புகார்! புகார் அளித்த பெண்ணுக்கு எதிராக மருத்துவர் தீட்டிய சதி!

7

தமிழகத்தில் கொரொனா நோய் எந்த அளவிற்கு வேகமாக பரவுகிறதோ அதே அளவுக்கு சிகிச்சைக்கு அனுமதிக்கப்பட்ட கொரொனா நோயாளிகள் குணமடைந்து வீட்டிற்கு திரும்புவது அதிகரித்து வருகிறது. நமது அரசு மருத்துவர்கள் மற்றும் செவிலியர்களின் மகத்தான சேவையால் நோயாளிகள் விரைவில் குணம் பெற்று வருகின்றன.

 

அல்லும் பகலும் மக்கள் நலனில் அக்கறை கொண்ட அரசு மருத்துவர்கள் மத்தியில் அரசு காப்பீட்டு பணத்துக்காக தர்மபுரி மாவட்டம் பென்னாகரம் அரசு மருத்துவமனையில் இருந்து நோயாளிகளை கடத்திய புகாரில் சிக்கி பணியிட மாற்றம் செய்யப்பட்டுள்ளார் ஒரு மருத்துவர்.

 

இங்கு ஆர்த்தோ மருத்துவராக பணிபுரிந்து வந்த சிவகுமார் செந்தில் முருகன் என்பவர் சொந்தமாக ஆர்த்தோ கிளினிக் நடத்தி வரும் நிலையில் பென்னாகரம் அரசு மருத்துவமனைக்கு வரும் நோயாளிகள் அறுவை சிகிச்சைக்காக தனது கிளினிக்கிற்கு தனியார் ஆம்புலன்ஸ்களிலும் சில சமயம் 108 ஆம்புலன்ஸ் மூலம் கடத்தி சென்று விடுவார் என்று கூறப்படுகிறது.

 

கிளினிக்கில் சிகிச்சை பெற்றது போல காப்பீடு பணத்தை பெற்றுக்கொண்டு நோயாளியை மீண்டும் அரசு மருத்துவமனைக்கு அழைத்து வந்து அட்மிஷன் போட்டு சிகிச்சை அளித்து வந்ததாக கூறப்படுகிறது. இதற்கு அங்குள்ள செவிலியர்கள், கம்பவுண்டர்கள் துணையாக இருந்துள்ளனர். சிவகுமாரின் முறைகேடு குறித்து இளம் மகப்பேறு மருத்துவர் கனிமொழி என்பவர் தர்மபுரி தலைமை மருத்துவருக்கு புகார் அளித்துள்ளார்.

 

தலைமை மருத்துவர் , மாவட்ட நலப்பணிகள் இயக்குனருக்கு புகார் மனுவை அனுப்பி வைத்துள்ளார்.ஆர்த்தோ மருத்துவர் சிவக்குமார் செந்தூர் முருகனின் முறைகேடு குறித்து விரிவான புகார் ஒன்றை அளித்துள்ளார். இதனால் சிவகுமார் செந்தி முருகனுக்கும், கனிமொழிக்கும் மோதல் ஏற்பட்டுள்ளது.

 

இது தொடர்பாக புகார் நிலுவையில் இருந்த நிலையில் பென்னாகரம் அரசு மருத்துவமனையில் பிரசவத்திற்காக அனுமதிக்கப்பட்ட பெண் ஒருவருக்கு இறந்த நிலையில் குழந்தை பிறந்துள்ளது. இரவில் நோயாளிகள் வந்து இருக்கும் விவரத்தை தன்னிடம் தெரிவிக்கவில்லை என்று இளம் மருத்துவர் கனிமொழி செவிலியரை திட்டியதாக கூறப்படுகிறது.

 

இதையடுத்து ஆர்த்தோ மருத்துவர் சிவக்குமார் தூண்டுதலின்பேரில் அங்குள்ள செவிலியர்கள் மற்றும் கம்பவுண்டர்கள் கனிமொழி செவிலியரை தாக்கியதாக கூறி போராட்டம் நடத்தியுள்ளனர். இது தொடர்பான விசாரணையின் போது செவிலியர் போராட்டத்தின் பின்னணியில் ஆர்த்தோ மருத்துவர் சிவகுமாரின் தூண்டுதல் இருப்பதை கண்டறிந்துள்ளனர்.

 

மேலும் கனிமொழிக்கு செவிலியர்களால் வீணாக பிரச்சனை உருவாகும் என்பதை சுட்டிக்காட்டி தர்மபுரி மாவட்ட நிலவரம் நலப்பணிகள் இணை இயக்குனரிடம் அறிக்கை தாக்கல் செய்யப்பட்டது. அந்த அறிக்கை தலைமைக்கும் அனுப்பி வைக்கப்பட்டது. இதையடுத்து காப்பீடு திட்ட முறைகேட்டில் ஈடுபட்ட ஆர்த்தோ டாக்டர் சிவகுமார், கிருஷ்ணகிரி அரசு மருத்துவமனைக்கு இடமாற்றம் செய்யப்பட்டார்.

 

அதேபோல இளம் மருத்துவர் கனிமொழி அரசு அரூர் மருத்துவமனைக்கு இடமாற்றம் செய்யப்பட்டார். நாடே கொரொனாவுக்கு எதிராக போராடி வரும் நிலையில் பென்னாகரத்தில் நோயாளிகளின் நலனை மறந்த ஆர்த்தோ மருத்துவர் சிவக்குமார் தனது முறைகேட்டை காட்டிக் கொடுத்ததால் சக பெண் மருத்துவருக்கு எதிராக செவிலியர்களை தூண்டிவிட்டு மருத்துவமனை வளாகத்தில் போராட்டம் நடத்த வைத்திருப்பது குறிப்பிடத்தக்கது.

📱 Share on WhatsApp 𝕏 Share on X

Leave a Reply

Right Menu Icon