யோகா மேட்களை போட்டிப்போட்டு அள்ளிச் சென்ற மக்கள்..!

உத்தரப் பிரதேச மாநிலம் மீரட்டில் உள்ள கைலாஷ் பிரகாஷ் மைதானத்தில், ஞாயிற்றுக்கிழமை நடைபெற்ற சர்வதேச யோகா தின விழாவின் தொடக்கத்திற்கு முன்பாக, அங்கே விநியோகிக்கக் கொண்டுவரப்பட்ட யோகா மேட்களை (பாய்களை) பங்கேற்பாளர்கள் போட்டிப்போட்டு அள்ளிச் சென்ற அதிர்ச்சி வீடியோ சமூக வலைத்தளங்களில் வைரலாகி வருகிறது.

இந்த யோகா தின சிறப்பு நிகழ்ச்சியானது, மீரட் மாவட்ட நிர்வாகம் மற்றும் ஆயுஷ் அமைச்சகம் ஆகியவற்றால் கூட்டாக இணைந்து ஏற்பாடு செய்யப்பட்டிருந்தது. இந்த யோகா அமர்வில் கலந்துகொள்வதற்காக சுமார் 2,500-க்கும் மேற்பட்ட பொதுமக்கள் மற்றும் மாணவர்கள் இந்த மைதானத்தில் திரண்டிருந்ததாக ‘இந்தியா டிவி ஹிந்தி’ ஊடகம் செய்தி வெளியிட்டுள்ளது.

இருப்பினும், நிகழ்ச்சி தொடங்குவதற்குச் சற்று முன்பாக, பங்கேற்பாளர்களுக்காக யோகா மேட்கள் நிகழ்ச்சி நடைபெறும் இடத்திற்குக் கொண்டு வரப்பட்டபோது அங்கே திடீரெனக் குழப்பம் வெடித்தது. அங்கிருந்த மாணவர்கள் மற்றும் பிற பங்கேற்பாளர்கள் எனப் பலரும் அந்த மேட்களை முண்டியடித்துக் கொண்டு, கைகளில் கிடைத்தவற்றை அள்ளிச் சென்றதாக நேரில் பார்த்தவர்கள் தெரிவித்துள்ளனர். இந்தத் தள்ளுமுள்ளு காரணமாக, யோகா செய்ய வந்த சில பங்கேற்பாளர்களுக்கு யோகா மேட்களே கிடைக்கவில்லை என்றும் அந்த அறிக்கையில் கூறப்பட்டுள்ளது.

இந்தச் சம்பவத்தின் வீடியோ சமூக ஊடகங்களில் வேகமாகப் பரவி, பலரது விமர்சனங்களைப் பெற்று வருகிறது. இது குறித்து சமூக வலைத்தளப் பயனர் ஒருவர், “திருடிய பிறகு அவர்களின் முகத்தில் இருக்கும் அந்த அசிங்கமான சிரிப்பைப் பாருங்கள். ரயில்களில் பெட்ஷீட் மற்றும் லைட்டுகளைத் திருடுபவர்கள், சாலையோரங்களில் உள்ள செடிகள் மற்றும் தொட்டிகளைத் திருடுபவர்கள், பொது இடங்கள் மற்றும் அலுவலகங்களில் உள்ள குழாய்களைத் திருடுபவர்கள் எல்லாம் இவர்கள்தான்… பிறகு இவர்களே வசதிகள் மற்றும் சேவைகளைப் பற்றி குறை கூறுவார்கள். வெட்கக்கேடு!” என்று பதிவிட்டுள்ளார்.

மற்றொரு பயனர், “இவர்கள் வீட்டிற்குச் சென்று தங்களது குழந்தைகளுக்கு எப்படி நல்ல மனிதனாக இருக்க வேண்டும் என்று பாடம் எடுப்பார்கள்” என்று கிண்டலாகக் கமெண்ட் செய்துள்ளார். மூன்றாவது நபர், “இது எல்லா கல்லூரிகளிலும் நடப்பதுதான்… மக்கள் இதற்காகவே வருகிறார்கள்” என்று எதிர்வினையாற்றியுள்ளார்.

யோகாவின் உடல், மன மற்றும் ஆன்மீக நலன்களைப் பரப்புவதற்காக ஆண்டுதோறும் ஜூன் 21 அன்று சர்வதேச யோகா தினம் கொண்டாடப்படுகிறது. இந்த ஆண்டின் கருப்பொருள் ‘ஆரோக்கியமான முதுமைக்கான யோகா’ என்பதாகும். இது உடல் தகுதி, மன வலிமை, நல்வாழ்வு மற்றும் ஆரோக்கியமான முதுமைக்கு யோகா அளிக்கும் பங்களிப்பை வெளிப்படுத்துகிறது.

கொல்கத்தாவின் ரெட் ரோடில் நடைபெற்ற கூட்டத்தில் பேசிய பிரதமர் நரேந்திர மோடி, யோகா என்பது “உலகின் மிகப்பெரிய சமூகக் கொண்டாட்டமாக” உருவெடுத்துள்ளது என்று குறிப்பிட்டதோடு, இந்த ஆண்டின் கருப்பொருளான “ஆரோக்கியமான முதுமைக்கான யோகா” என்பதன் முக்கியத்துவத்தையும் அடிக்கோடிட்டுக் காட்டினார்.