12-ஆம் வகுப்பு பொதுத்தேர்வு நேரத்தில் ஜே.இ.இ பயிற்சி..!

2026-ஆம் ஆண்டிற்கான பன்னிரண்டாம் வகுப்பு பொதுத்தேர்வுகள் தற்போது நடைபெற்று வரும் சூழலில், ஜே.இ.இ நுழைவுத் தேர்வுக்குத் தயாராகும் மாணவர்கள் தங்களது பயிற்சியைத் தற்காலிகமாக நிறுத்த வேண்டுமா அல்லது தொடர வேண்டுமா என்ற குழப்பம் பலரிடையே உள்ளது. பொதுத்தேர்வு மற்றும் போட்டித்தேர்வு இரண்டையும் சமநிலையில் கையாள்வதே இந்த நேரத்தில் மிக முக்கியமானது.

பொதுத்தேர்வு நடைபெறும் நாட்களில், மாணவர்கள் தங்களது முழு கவனத்தையும் அடுத்த தேர்வுக்கான பாடத்திலேயே செலுத்த வேண்டும். என்.சி.இ.ஆர்.டி பாடப்புத்தகங்களை முழுமையாகப் படிப்பதும், முந்தைய ஆண்டுகளின் வினாத்தாள்களைப் பயிற்சி செய்வதும் அவசியம். பொதுத்தேர்வில் எடுக்கும் மதிப்பெண்கள் ஜே.இ.இ முதன்மைத் தேர்வுக்கான தகுதிக்கு உதவுவது மட்டுமல்லாமல், பிற கல்வி நிறுவனங்களில் சேரவும், ஒருவேளை ஜே.இ.இ தேர்வில் வெற்றி பெறாத பட்சத்தில் ஒரு சிறந்த மாற்றாகவும் அமையும். குறிப்பாக, இயற்பியல் மற்றும் வேதியியல் பாடங்களை பொதுத்தேர்விற்காக ஆழமாகப் படிப்பது ஜே.இ.இ தேர்விற்கான அடிப்படை அறிவை மேலும் வலுப்படுத்தும்.

இருப்பினும், மார்ச் மாத இறுதி வரை ஜே.இ.இ பயிற்சியை முழுமையாக நிறுத்திவிடுவது புத்திசாலித்தனமல்ல. மூளைக்கு அதிக அழுத்தம் தராத வகையில், தினமும் 45 முதல் 60 நிமிடங்கள் வரை மிக லேசான பயிற்சியை மேற்கொள்ளலாம். இதில் சூத்திரங்களை நினைவுபடுத்துவது, முக்கியமான குறிப்புகளைத் திருப்புதல் செய்வது போன்றவற்றைச் செய்யலாம். இது ஜே.இ.இ தொடர்பான புரிதலைத் தக்கவைக்க உதவும்.

தேர்வு நேரங்களில் முழு நீள மாதிரித் தேர்வுகளைத் தவிர்ப்பது நல்லது. பொதுத்தேர்வு எழுதிவிட்டு வரும் மாணவர்களுக்கு அது மிகுந்த சோர்வைத் தரும் என்பதால், அத்தகைய தேர்வுகள் பலன் அளிக்காது. மாறாக, வார இறுதி நாட்களிலோ அல்லது தேர்வுகளுக்கு இடையே போதிய இடைவெளி இருக்கும் போதோ மட்டும் ஒரு குறிப்பிட்ட பகுதியை மட்டும் கொண்ட மாதிரித் தேர்வுகளை எழுதலாம். இந்த நேரத்தில் அதிக மதிப்பெண் எடுப்பதை விட, வேகத்தையும் துல்லியத்தையும் பராமரிப்பதிலேயே கவனம் இருக்க வேண்டும்.

நேர மேலாண்மை மற்றும் உடல் நலனில் மாணவர்கள் மிகுந்த அக்கறை காட்ட வேண்டும். பொதுத்தேர்வுக்கு முந்தைய நாட்களில் ஒரு குறிப்பிட்ட நேரத்தை பொதுத்தேர்விற்கும், ஒரு சிறிய பகுதியை ஜே.இ.இ தேர்விற்கும் ஒதுக்கலாம். ஆனால், பொதுத்தேர்வு நடக்கும் நாட்களில் ஜே.இ.இ பயிற்சியை முழுமையாகத் தவிர்த்துவிட்டு மனத்தெளிவுடன் தேர்வை அணுகுவது சிறந்தது. தூக்கத்தைத் தியாகம் செய்து இரவு நேரங்களில் படிப்பது பதற்றத்தையும் சோர்வையும் மட்டுமே உண்டாக்கும். மூளை சீராகச் செயல்படத் தேவையான அளவு உறக்கம் மிக அவசியம். அதேபோல், சமூக வலைதளங்களில் மற்ற மாணவர்களின் தயாரிப்பு முறையோடு உங்களை ஒப்பிட்டுப் பார்த்து மன அழுத்தத்திற்கு உள்ளாகக் கூடாது.

பொதுத்தேர்வுகள் மார்ச் அல்லது ஏப்ரல் மாதத்தில் முடிவடைந்தவுடன், மாணவர்கள் உடனடியாக ஏப்ரல் மாத ஜே.இ.இ முதன்மைத் தேர்விற்கான தீவிரப் பயிற்சியில் இறங்க வேண்டும். அப்போது ஒரு நாள் விட்டு ஒரு நாள் முழு நீள மாதிரித் தேர்வுகளை எழுதி, அவற்றை முழுமையாகப் பகுப்பாய்வு செய்ய வேண்டும். பலவீனமான பகுதிகளைக் கண்டறிந்து பயிற்சி செய்வது மற்றும் முக்கியமான தலைப்புகளில் அதிக கவனம் செலுத்துவது தேர்வை எதிர்கொள்ளும் துணிச்சலைத் தரும்.

சுருக்கமாகச் சொன்னால், பொதுத்தேர்வு காலத்தில் ஜே.இ.இ பயிற்சியை முழுமையாக நிறுத்தாமல், மிகக் குறைந்த அளவில் தொடர்வதே சரியான அணுகுமுறை. பொதுத்தேர்விற்கு முன்னுரிமை அளித்து, அதே சமயம் லேசான ஜே.இ.இ பயிற்சியையும் மேற்கொண்டு, மனநலனைப் பாதுகாப்பதன் மூலம் மாணவர்கள் பொதுத்தேர்வு மற்றும் ஏப்ரல் மாத ஜே.இ.இ தேர்வு என இரண்டிலும் சிறப்பான முடிவுகளைப் பெற முடியும்.