1 லிட்டர் நந்தினி நெய்யை 4 லிட்டராக மாற்றிய தம்பதி கைது..!

பெங்களூருவில் போலி நந்தினி நெய் கும்பலை காவல்துறை சில நாட்களுக்கு முன்பு கண்டுபிடித்த நிலையில், இந்தக் குற்றச்சாட்டுகளுக்குப் பின்னால் உள்ள முக்கிய சூத்திரதாரிகளாகச் சந்தேகிக்கப்படும் ஒரு தம்பதியை புதன்கிழமை கைது செய்தனர்.

கர்நாடகா பால் கூட்டமைப்பின் (கே.எம்.எஃப்) நந்தினி பிராண்டின் கீழ் கலப்படம் செய்யப்பட்ட நெய் விற்பனையை விசாரித்து வரும் மத்திய குற்றப்பிரிவு (சி.சி.பி), கைது செய்யப்பட்ட அந்தத் தம்பதியினர் மைசூருவைச் சேர்ந்த சிவகுமார் மற்றும் ரம்யா என்று தெரிவித்தது. போலி நெய்யைத் தயாரிக்கவும், அடைக்கவும் பயன்படுத்தப்பட்ட தொழில்துறை தர இயந்திரங்கள் மற்றும் கருவிகள், 8,136 லிட்டர் கலப்பட நெய், அதிக அளவில் தேங்காய் எண்ணெய், பாமாயில், ரூ.1.19 லட்சம் ரொக்கம், மற்றும் போக்குவரத்துக்காகப் பயன்படுத்தப்பட்ட 4 சரக்கு வாகனங்கள் உட்பட, சுமார் ரூ.1.27 கோடி மதிப்புள்ள பொருட்களை சி.சி.பி பறிமுதல் செய்து இந்த மோசடியை அம்பலப்படுத்திய பிறகு, இந்தத் தம்பதியினர் தலைமறைவாக இருந்ததாக அவர்கள் தெரிவித்தனர்.

இந்தத் தம்பதியினரை 10 நாட்கள் காவலில் எடுத்துள்ளதாக காவல்துறை தெரிவித்துள்ளது. ரம்யா மற்றும் சிவகுமார் கைது செய்யப்பட்டதைத் தொடர்ந்து, அவர்களின் வங்கிக் கணக்குகளில் இருந்த ரூ.60 லட்சம் தொகையையும் காவல்துறை முடக்கியுள்ளது. மாநில அரசுக்குச் சொந்தமான கே.எம்.எஃப்-ன் தயாரிப்பு என்று கூறி, இந்தக் கலப்பட நந்தினி நெய் கர்நாடகா மற்றும் தமிழ்நாட்டில் விநியோகிக்கப்பட்டு வந்தது சி.சி.பி விசாரணையில் தெரியவந்துள்ளது.

இந்தச் செயல்பாட்டிற்கு உதவிய கே.எம்.எஃப்-ல் உள்ள சில ‘உள் நபர்கள்’ இந்தத் தம்பதியினருக்கு துணையாக இருந்தனர் என்று ஒரு காவல்துறை அதிகாரி தெரிவித்தார். அவர்கள் நெய்யை அதிக அளவில் தயாரிக்கத் தொழிற்சாலை தர இயந்திரங்களைப் பயன்படுத்தியதுடன், அதை அசல் நந்தினி நெய் போலவே தோற்றமளிக்க மறுபடியும் பேக்கேஜ் செய்து (Repackaging) விற்பனை செய்துள்ளனர்.

இந்த சூத்திரதாரிகளைக் கைது செய்வதற்கு முன்பு, இந்த மோசடிக் கும்பலின் விநியோக வலையமைப்பு தொடர்பாக, கே.எம்.எஃப்-ன் அங்கீகரிக்கப்பட்ட விநியோகஸ்தர் மகேந்திரா, அவரது மகன் தீபக் மற்றும் முனிராஜு உட்பட 4 பேரை சி.சி.பி கைது செய்தது.

கே.எம்.எஃப் கண்காணிப்புக் குழு விநியோகத்தில் ஏற்பட்ட வித்தியாசத்தைக் கண்டறிந்த பின்னரே இந்தச் சம்பவம் வெளிச்சத்திற்கு வந்தது. அதிகாரிகள் உடனடியாக பெங்களூரு நகர காவல்துறைக்குத் தகவல் அளித்தனர். அதைத் தொடர்ந்து காவல்துறை பல கடைகள், கிடங்குகள் மற்றும் பிற இடங்களில் சோதனை நடத்தியதில் மகேந்திரா கைது செய்யப்பட்டார்.

சி.சி.பி-ன் கூற்றுப்படி, அசல் நெய் தமிழ்நாட்டின் திருப்பூருக்குக் கொண்டு செல்லப்பட்டு, அங்கே பாமாயில், தேங்காய் எண்ணெய் மற்றும் ஹைட்ரஜனேற்றப்பட்ட தாவர எண்ணெயுடன் கலப்படம் செய்யப்பட்டது. அசல் நந்தினி நெய்யின் ஒவ்வொரு லிட்டரையும் பயன்படுத்தி, நான்கு லிட்டர் போலி நெய்யைத் தயாரித்துள்ளனர். பின்னர் இந்தக் கலப்பட “நெய்” கடத்தப்பட்டு, பெங்களூரு மற்றும் தமிழ்நாட்டில் உள்ள நந்தினி விற்பனை நிலையங்கள் மற்றும் மளிகைக் கடைகளுக்கு விநியோகிக்கப்பட்டுள்ளது. கைது செய்யப்பட்டவர்கள் மீது இதேபோன்ற வழக்குகள் உள்ளன என்றும், அவர்கள் பல ஆண்டுகளாக நெய்யில் கலப்படம் செய்து வந்துள்ளனர் என்றும் மைசூருவில் உள்ள ஒரு காவல்துறை அதிகாரி தெரிவித்தார்.