உத்தரப்பிரதேசத்தில் பாஜக வேட்பாளர் மாரடைப்பால் மரணம்..!

உத்தரப்பிரதேச மாநிலத்தின் மொர்தாபாத் மக்களவைத் தொகுதியின் பாஜக வேட்பாளர் குன்வர் சர்வேஸ் சிங் உடல்நலக்குறைவால் காலமானார். அவருக்கு வயது 72.

தொழிலதிபரும், மாநில பாஜக தலைவர்களில் ஒருவருமான குன்வர்சர்வேஸ் சிங், வெள்ளிக்கிழமை நடந்து முடிந்த தேர்தலில், மொர்தாபாத் தொகுதியில் பாஜக வேட்பாளராக போட்டியிட்டார்.

இந்த நிலையில், தொண்டை பிரச்னை காரணமாக அறுவை சிகிச்சை செய்து கொண்ட குன்வர்சர்வேஸ் சிங், மருத்துவ பரிசோதனைக்காக எய்ம்ஸ் மருத்துவமனைக்கு நேற்று சென்றிருந்தார். அப்போது, திடீரென உடல்நலக் குறைவு ஏற்பட்டு அவர் உயிரிழந்தார்.

உத்தரப்பிரதேசத்தின் தகுர்த்வாரா தொகுதியில் இருந்து பாஜக சார்பில் 4 முறை பாஜக சட்டப்பேரவை உறுப்பினராக தேர்ந்தெடுக்கப்பட்ட குன்வர் சர்வேஸ் சிங், உடல் நலக்குறைவு காரணமாக இந்த மக்களவை தேர்தலில் பரப்புரையில் கூட பங்கேற்காமல் இருந்து வந்தார்.

இவரது மறைவுக்கு பிரதமர் மோடி இரங்கல் தெரிவித்துள்ளார். எக்ஸ் தளத்தில் பதிவிட்டுள்ள பிரதமர், கடைசி வரை கட்சிப் பணியிலும் சமூகப் பணியிலும் அர்ப்பணிப்புடன் செயல்பட்டு வந்த குன்வர்சர்வேஸ் சிங் மறைவு, பாஜகவுக்கு ஈடு செய்ய முடியாத இழப்பு என குறிப்பிட்டுள்ளார்.