திருவாடானை அருகே விபத்து: கும்மிப் பாடகரான கல்லூரி மாணவர் பரிதாப மரணம்!
திருவாடானை அருகே நிகழ்ந்த சாலை விபத்தில், கும்மிப் பாடகரான கல்லூரி மாணவர் ஒருவர் சிகிச்சை பலனின்றி பரிதாபமாக உயிரிழந்தார். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.
விபத்து நடந்தது எப்படி?
சிவகங்கை மாவட்டம், புலியால் பகுதியைச் சேர்ந்தவர் பாண்டி. இவருடைய மகன் முகேஷ் (21). இவர் தேவகோட்டையில் உள்ள ஒரு கல்லூரியில் மூன்றாம் ஆண்டு படித்து வந்தார். சிறந்த கும்மிப் பாடகரான முகேஷ், நேற்று இரவு ஆவுடையார் கோவில் அருகே, நன்னியூரில் நடைபெற்ற ஒரு கோயில் திருவிழாவில் கும்மிப் பாட்டு பாடியுள்ளார்.
நிகழ்ச்சியை முடித்துவிட்டு, இன்று அதிகாலை 5 மணியளவில் அவர் தனது இருசக்கர வாகனத்தில் வீட்டிற்குத் திரும்பிக் கொண்டிருந்தார். திருவாடானை எல்.கே. நகர் அருகே வந்தபோது, எதிர்பாராதவிதமாக சாலையோரம் நின்றுகொண்டிருந்த டாடா ஏஸ் (Tata Ace) வாகனத்தின் மீது முகேஷின் இருசக்கர வாகனம் நிலைதடுமாறி மோதியது.
இந்த பயங்கர மோதலில் முகேஷின் தலையில் பலத்த காயம் ஏற்பட்டது. இதைப் பார்த்த அருகில் இருந்தவர்கள், உடனடியாக 108 ஆம்புலன்ஸ் மூலம் அவரை மீட்டு திருவாடானை அரசு மருத்துவமனைக்கு சிகிச்சைக்கு அனுப்பி வைத்தனர். எனினும், அங்கு அளிக்கப்பட்ட சிகிச்சை பலனின்றி முகேஷ் பரிதாபமாக உயிரிழந்தார்.
இளைஞர் முகேஷின் மரணச் செய்தியைக் கேட்டு, மருத்துவமனையில் கூடிய அவரது பெற்றோர் மற்றும் உறவினர்கள் கதறி அழுதது பார்ப்போரின் நெஞ்சைக் உலுக்குவதாக இருந்தது. இந்த விபத்து குறித்து திருவாடானை போலீஸார் வழக்குப் பதிவு செய்து விசாரணை நடத்தி வருகின்றனர்.
