ஆக்ரோஷமான நாய்களுக்குத் தடை?

பொதுமக்களின் பாதுகாப்பைக் கருத்தில் கொண்டு, ஆக்ரோஷமான மற்றும் அபாயகரமான நாய் இனங்களை முறைப்படுத்துவது அல்லது தடை செய்வது குறித்து பரிந்துரைகளை வழங்க தமிழக அரசு உயர்மட்ட நிபுணர் குழு ஒன்றை அமைத்துள்ளது. மாநிலத்தின் விலங்கு பராமரிப்பு மற்றும் கால்நடை பராமரிப்புத் துறை மற்றும் சென்னை மாநகராட்சி அளித்த முன்மொழிவுகளின் அடிப்படையில் இந்த நடவடிக்கை எடுக்கப்பட்டுள்ளது.

மத்திய அரசு ஏற்கனவே சில நாய் இனங்களை மனித உயிருக்கு ஆபத்தானவை என அடையாளம் கண்டு, அவற்றின் இறக்குமதி, இனப்பெருக்கம் மற்றும் விற்பனைக்குத் தடை விதிக்க பரிந்துரைத்திருந்தது.

இதன் தொடர்ச்சியாக, தமிழக அரசு “செல்லப்பிராணிகள் மற்றும் சமூக நாய்கள் துணை விதிகள்” (Pet and Community Dog Bye-laws) என்ற வரைவு விதிகளை உருவாக்கத் திட்டமிட்டுள்ளது. இந்த விதிகளை வடிவமைக்கும் பொறுப்பு தற்போது அமைக்கப்பட்டுள்ள குழுவிடம் ஒப்படைக்கப்பட்டுள்ளது.

சென்னை மாநகராட்சி ஆணையர் அரசுக்கு அளித்துள்ள கடிதத்தில், குறிப்பிட்ட சில நாய் இனங்கள் பொதுமக்களுக்கு அதிக தீங்கு விளைவிப்பதாகக் குறிப்பிட்டுள்ளார். எனவே, அத்தகைய நாய்களை வளர்ப்பதற்கான உரிமங்களை வழங்குவதை நிறுத்தவும், ஏற்கனவே உள்ள உரிமங்களைப் புதுப்பிக்காமல் தடை செய்யவும் அவர் கோரிக்கை விடுத்துள்ளார். இதையடுத்தே, இந்த விவகாரத்தைப் விரிவாக ஆய்வு செய்து அரசுக்கு வழிகாட்ட ஒரு நிபுணர் குழுவின் அவசியம் உணரப்பட்டது.

இந்த நிபுணர் குழு, ஆக்ரோஷமான நாய்களைக் கையாளுதல், உரிமையாளர்களுக்கான நிலையான செயல்பாட்டு நடைமுறைகள் மற்றும் தற்போதுள்ள விதிகளை மறுஆய்வு செய்தல் ஆகிய பணிகளை மேற்கொள்ளும். நகராட்சி நிர்வாக இயக்குநர் தலைமையிலான இக்குழுவில், தமிழ்நாடு விலங்கு நல வாரியத்தின் தலைமைச் செயல் அதிகாரி மற்றும் ஆறு உறுப்பினர்கள் இடம்பெற்றுள்ளனர்.

முன்னதாக, 2024 மார்ச் மாதம் மத்திய அரசு வெளியிட்ட அறிவிப்பில், ஆக்ரோஷமான நாய் இனங்களுக்கு உள்ளூர் அமைப்புகள் உரிமம் வழங்க வேண்டாம் என்று அறிவுறுத்தியிருந்தது. அதே சமயம், ஏற்கனவே வளர்க்கப்படும் நாய்களுக்குத் தடையின்றி, அவை மேலும் இனப்பெருக்கம் செய்யாத வகையில் கருத்தடை செய்யப்பட வேண்டும் என்றும் குறிப்பிட்டிருந்தது.

இது தொடர்பாக சென்னை உயர்நீதிமன்றமும், ஆக்ரோஷமான நாய்களால் ஏற்படும் ஆபத்துகளைத் தடுக்க முறையான கொள்கை அவசியம் என்றும், நாய் நடத்தை நிபுணர்களைக் கொண்டு குழு அமைக்கப்பட வேண்டும் என்றும் கருத்து தெரிவித்திருந்தது. இதன் அடிப்படையில் தற்போது தமிழக அரசு இந்த துரித நடவடிக்கையை எடுத்துள்ளது.