--- --:--:-- --

விரைவில் நம்முடைய ஆட்சி உதயமாகத்தான் போகிறது – திமுக தலைவர் மு.க.ஸ்டாலின் பேச்சு

2

தமிழ்நாட்டில் மோசமான ஆட்சி நடைபெறுவதாக விமர்சித்த திமுக தலைவர் மு.க.ஸ்டாலின், விரைவில் திமுக ஆட்சி அமையும் என்றும் தெரிவித்தார். திமுக முதன்மைச் செயலாளர் கே.என். நேருவின் சகோதரர் இல்லத் திருமண விழா சென்னை நீலாங்கரையில் நடைபெற்றது. இதில், திமுக தலைவர் மு.க.ஸ்டாலின், பொதுச்செயலாளர் துரைமுருகன், துணைப் பொதுச்செயலாளர் கனிமொழி உள்ளிட்டோர் கலந்து கொண்டு மணமக்களை வாழ்த்தினர்.

 

இந்நிகழ்ச்சியில் பேசிய மு.க.ஸ்டாலின், “விரைவில் திருச்சி கிழக்கில் இடைத்தேர்தல் வரப்போகிறது. ஆறு மாத காலமாக தமிழ்நாட்டில் ஒரு ஆட்சி நடந்து கொண்டிருக்கிறது. மன்னிக்கவும், ஆட்சி என்று சொல்லக்கூடாது; அது ஒரு காட்சியாகத்தான் நடந்து கொண்டிருக்கிறது. அது சும்மா வெத்து வேட்டாகத்தான், ஒரு சீன் காட்டிக் கொண்டிருப்பதைபோல, ஒரு ஆட்சி நடந்து கொண்டிருக்கிறது.

 

 

‘மாற்றம், மாற்றம்’ என்று சொன்னார்கள். அது தமிழ்நாட்டு மக்களைப் பொறுத்த அளவில், மிகப்பெரிய ஏமாற்றம்தான் உருவாகி இருக்கிறது. திரையில் கதாநாயகனாக நடித்து, நிஜத்தில் ஒரு வில்லனாக உலா வந்து கொண்டிருப்பவர்தான், இன்றைக்கு தமிழ்நாட்டின் முதலமைச்சராக இருக்கிறார். எங்கு பார்த்தாலும், பாலியல் கொடுமைகள், வன்கொடுமைகள்தான் தொடர்ந்து நடந்து கொண்டிருக்கிறது. அந்த வன்கொடுமைகளுக்கு ஆளாகக்கூடியவர்கள் எல்லாம் எப்படிப்பட்ட மக்கள் என்பது உங்களுக்குத் தெரியும்.

 

 

அந்தப் பாலியல் கொடுமைகளுக்கு எல்லாம் காரணமாக இருப்பவர்கள் யார் என்பதைப் பற்றியும் உங்களுக்குத் தெரியும். அதில் பெரும்பாலும் ஆளுங்கட்சியைச் சார்ந்தவர்கள்தான் அதிகமாக இருந்து கொண்டிருக்கிறார்கள். அண்மையில்கூட, நீங்கள் செய்தியில் பார்த்திருக்கலாம். காரமடைப் பகுதியில் ஒன்றியச் செயலாளர் தலைமறைவாகி இருக்கிறார். இன்றைக்கு இருக்கும் த.வெ.க. கட்சியின் பெயரை மாற்றிகூட, அவர்களுக்கு என்ன பெயர் வைக்க வேண்டும் என்று சொன்னால், ‘பாலியல் சுரண்டல் கழகம்’ என்றுதான் பெயர் வைக்க வேண்டும் என்ற சூழ்நிலைகூட உருவாகும்.

 

‘தூய சக்தி, தூய சக்தி’ என்று சொல்லி, இன்றைக்கு ஒரு கொடுமையான ஆட்சியை நடத்திக் கொண்டிருக்கிறது. ஒரு மனு கொடுக்க வந்த தோழரையே, மக்கள் பிரதிநிதியையே, துணை சபாநாயகர் தாக்கி இருக்கிறார் என்ற வீடியோ காட்சிகள் எல்லாம் பார்த்தீர்கள். அதுமட்டுமல்ல, கள்ளக்குறிச்சி மாவட்டத்தைச் சேர்ந்த ஒரு பெண் ஆட்சித் தலைவருக்கே என்ன நிலை ஏற்பட்டிருக்கிறது என்று சொன்னால், இங்கு அமர்ந்திருக்கும் நம்முடைய கனிமொழிதான் அந்தச் செய்தியை முதன்முதலில் வெளிப்படுத்தி, மக்களிடத்தில் எடுத்துச் சொன்னார். அதற்குப் பிறகுதான், அது தெரிய வந்தது.

 

அதைப்பற்றிகூட கேட்டால், முதலமைச்சர் வாய் திறக்க மறுக்கிறார். ஆனால் சட்டத்துறை அமைச்சர் என்ன சொல்கிறார், “அப்படி ஒரு சம்பவமே நடக்கவில்லை” என்று சொல்கிறார். ஆனால் இன்னும் சில அமைச்சர்கள் என்ன சொல்கிறார்கள், “புகார் முறையாக கொடுத்தால், நடவடிக்கை எடுக்கப்படும்” என்று சொல்கிறார்கள். இப்படித்தான் நடந்து கொண்டிருக்கிறது என விமர்சித்தார்.
விரைவில் இதற்கெல்லாம் முடிவு கட்ட நல்ல சூழ்நிலை அமைந்துகொண்டிருக்கிறது எனவும் விரைவில் நம்முடைய ஆட்சி உதயமாக தான் போகிறது. எனவே அதை பற்றி யாரும் கவலைப்பட தேவையில்லை.” எனவும் திமுக தலைவர் மு.க.ஸ்டாலின், தெரிவித்தார்.மேலும் தமிழ்நாட்டில் மாற்றம் என்று கூறிய நிலையில் மக்கள் மத்தியில் ஏமாற்றமே இருப்பதாக மு.க.ஸ்டாலின் விமர்சித்தார்.

📱 Share on WhatsApp 𝕏 Share on X

Leave a Reply

Right Menu Icon