ரயிலில் அதிக சத்தத்துடன் பாட்டு கேட்டால் ஜெயில் – தெற்கு ரயில்வே

ரயில் பயணத்தின்போது அதிக சத்தத்துடன் பாட்டு கேட்பது, செல்போனில் சத்தமாகப் பேசுவது உள்ளிட்ட செயல்களால் சக பயணிகளுக்கு ஏற்படும் இடையூறுகளைத் தடுக்க பயணிகளுக்கு புதிய கட்டுப்பாடுகள் விதித்து தெற்கு ரயில்வே நிர்வாகம் எச்சரிக்கை விடுத்துள்ளது. ரயில்களில் பயணம் செய்யும்போது சிலர் செல்போனில் சத்தமாகப் பேசுவது, அதிக சத்தத்துடன் பாடல்களைக் கேட்பது, வீடியோ பார்ப்பது போன்ற செயல்களில் ஈடுபடுகின்றனர்.

இதனால் அருகில் பயணம் செய்யும் மற்ற பயணிகளுக்கு தொந்தரவு ஏற்படுவதுடன், ரயில் பெட்டிகளில் அமைதியான பயணச் சூழலும் பாதிக்கப்படுகிறது. குறிப்பாக, இரவு நேரங்களில் பயணிகள் ஓய்வெடுக்கும்போது இதுபோன்ற செயல்கள் மற்றவர்களின் தூக்கத்தையும் பாதிக்கின்றன. இதைக் கருத்தில் கொண்டு, ரயில் பயணத்தின்போது சக பயணிகளுக்கு இடையூறு ஏற்படுத்தும் வகையில் நடந்து கொள்ளக் கூடாது என அறிவுறுத்தப்பட்டுள்ளது.

ரயிலில் அதிக சத்தத்துடன் பாடல்களைக் கேட்பது, பிற பயணிகளுக்கு இடையூறு ஏற்படுத்துவது போன்ற செயல்களில் ஈடுபடுவோருக்கு எதிராக நடவடிக்கை எடுக்கப்படும் என்றும், விதிமீறல்களுக்கு ஆறு மாதங்கள் வரை சிறைத் தண்டனை விதிக்கப்படலாம் என்றும் செய்தியில் குறிப்பிடப்பட்டுள்ளது.

மேலும், ரயிலில் பயணம் செய்யும் அனைவரும் பிற பயணிகளின் வசதியையும், அமைதியையும் கருத்தில் கொண்டு நடந்து கொள்ள வேண்டும் என ரயில்வே நிர்வாகம் வலியுறுத்தியுள்ளது. எனவே, ரயில்களில் செல்போன் பயன்படுத்தும்போதும், இசை கேட்கும்போதும் பிற பயணிகளுக்கு இடையூறு ஏற்படாத வகையில் நடந்து கொள்ள வேண்டும் என அறிவுறுத்தப்பட்டுள்ளது.