பொதுத்தேர்வு வினாத்தாள் பிழைகள் – புகார்களை உடனே தெரிவிக்க புதிய நடைமுறை அமல்
தமிழக அரசுத் தேர்வுகள் இயக்ககம் (DGE) தற்போது நடைபெற்று வரும் பொதுத்தேர்வுகள் குறித்து மிக முக்கியமான அறிவிப்பு ஒன்றை வெளியிட்டுள்ளது. இதன்படி, 10, 11 மற்றும் 12-ஆம் வகுப்பு பொதுத்தேர்வு வினாத்தாள்களில் ஏதேனும் பிழைகள் அல்லது தெளிவற்ற வினாக்கள் இருந்தால், அவற்றை முறைப்படி தெரிவிப்பதற்கான புதிய வழிமுறைகள் வகுக்கப்பட்டுள்ளன.
பொதுவாக பொதுத்தேர்வு வினாத்தாள்களில் குளறுபடிகள் ஏற்படும்போது, அது குறித்து பல்வேறு தரப்பிலிருந்தும் புகார்கள் எழுவது வழக்கம். இனிவரும் காலங்களில் இத்தகைய புகார்களைத் தன்னிச்சையாகவோ அல்லது சமூக ஊடகங்கள் வாயிலாகவோ தெரிவிப்பதைத் தவிர்த்து, முறையான ஆவணங்களுடன் சமர்ப்பிக்க வேண்டும் என்று அரசு அறிவுறுத்தியுள்ளது.
மார்ச் 2 முதல் ஏப்ரல் 6 வரை நடைபெறவுள்ள இந்தத் தேர்வுகளில், வினாத்தாளில் தவறு அல்லது முரண்பாடு இருப்பதாக மாணவர்கள் அல்லது ஆசிரியர்கள் கருதினால், அதனை உடனடியாக அந்தந்த பள்ளித் தலைமையாசிரியரின் கவனத்திற்கு கொண்டு செல்ல வேண்டும்.
இவ்வாறு பெறப்படும் புகார்கள் மற்றும் கருத்துகளை பள்ளித் தலைமையாசிரியர்கள் ஒருங்கிணைத்து, dgequestionpaperqueries@gmail.com என்ற அதிகாரப்பூர்வ மின்னஞ்சல் முகவரிக்கு அனுப்ப வேண்டும். இதில் மிக முக்கியமான அம்சம் என்னவென்றால், குறிப்பிட்ட பாடத்தேர்வு நடைபெற்ற அதே நாளிலேயே இந்த மின்னஞ்சலை அனுப்புவது கட்டாயமாக்கப்பட்டுள்ளது.
காலதாமதமாக வரும் புகார்கள் எக்காரணம் கொண்டும் பரிசீலனைக்கு எடுத்துக்கொள்ளப்பட மாட்டாது எனத் தேர்வுகள் இயக்ககம் திட்டவட்டமாகத் தெரிவித்துள்ளது. மேலும், புகாரைப் பதிவு செய்யும்போது எந்த வினா எண், வினாத்தாளின் எந்தப் பகுதி மற்றும் அதில் உள்ள பிழை என்ன என்பது குறித்த துல்லியமான விளக்கத்தை அளிக்க வேண்டியது அவசியமாகும். ஆதாரமற்ற அல்லது தெளிவற்ற முறையில் மொட்டையாகத் தெரிவிக்கப்படும் குற்றச்சாட்டுகள் நிராகரிக்கப்படும்.
மின்னஞ்சல் வழியாக மட்டுமே இத்தகைய கோரிக்கைகளை ஏற்க முடியும் என்பதால், மற்ற வழிகளில் அனுப்பப்படும் கடிதங்கள் செல்லுபடியாகாது. இந்த புதிய நடைமுறையை அனைத்து உயர்நிலை மற்றும் மேல்நிலைப் பள்ளித் தலைமையாசிரியர்களும் பின்பற்றுவதை உறுதி செய்யுமாறு அறிவுறுத்தப்பட்டுள்ளது. இதன் மூலம் வினாத்தாள் பிழைகள் குறித்த குழப்பங்களுக்கு விரைவான மற்றும் முறையான தீர்வு கிடைக்கும் என எதிர்பார்க்கப்படுகிறது.
Education
