அமைச்சர் நேரு மீது முதல் கட்ட விசாரணை தொடக்கம்..!

தமிழக அரசியல் களத்தில் பரபரப்பை ஏற்படுத்தியுள்ள நகராட்சி நிர்வாகத் துறை பணி நியமன முறைகேடு புகார்கள் தொடர்பாக, லஞ்ச ஒழிப்புத்துறை தற்போது முதல்கட்ட விசாரணையைத் தொடங்கியுள்ளது. அமலாக்கத்துறை அளித்த ஆதாரங்களின் அடிப்படையில் இந்த நடவடிக்கை எடுக்கப்பட்டுள்ளதாகத் தமிழக அரசு சென்னை உயர் நீதிமன்றத்தில் அதிகாரப்பூர்வமாகத் தெரிவித்துள்ளது.

நீதிமன்ற விசாரணை பின்னணி தமிழக நகராட்சி நிர்வாகம் மற்றும் குடிநீர் வழங்கல் துறையில் உதவிப் பொறியாளர், இளநிலைப் பொறியாளர் மற்றும் சுகாதார ஆய்வாளர் உள்ளிட்ட 2,538 பணியிடங்களை நிரப்புவதில் பல கோடி ரூபாய் லஞ்சம் கைமாறியதாகப் புகார் எழுந்தது.

இது தொடர்பாக மதுரை திருமங்கலத்தைச் சேர்ந்த ஆதிநாராயணன் மற்றும் அதிமுக முன்னாள் எம்.எல்.ஏ இன்பத்துரை ஆகியோர் சென்னை உயர் நீதிமன்றத்தில் மனுத் தாக்கல் செய்திருந்தனர். அந்த மனுவில், அமைச்சர் கே.என்.நேரு மற்றும் அவரது குடும்பத்தினர் மீது வழக்குப் பதிவு செய்து முறையான விசாரணை நடத்த வேண்டும் என வலியுறுத்தப்பட்டிருந்தது.

இந்த மனுக்கள் தலைமை நீதிபதி எம்.எம்.ஸ்ரீவஸ்தவா மற்றும் நீதிபதி ஜி.அருள்முருகன் ஆகியோர் அடங்கிய அமர்வில் விசாரணைக்கு வந்தன. அப்போது தமிழக அரசு சார்பில் ஆஜரான தலைமை வழக்கறிஞர் பி.எஸ்.ராமன், அமலாக்கத்துறை அனுப்பிய கடிதத்தின் அடிப்படையில் லஞ்ச ஒழிப்புத்துறை ஏற்கனவே விசாரணையைத் தொடங்கிவிட்டதாகக் கூறி, அது தொடர்பான அறிக்கையைத் தாக்கல் செய்தார். மேலும், இது குறித்து விரிவான பதில் மனுவைத் தாக்கல் செய்ய டிஜிபி தரப்பில் கால அவகாசம் கோரப்பட்டதையடுத்து, விசாரணையை ஜனவரி 28-ஆம் தேதிக்கு நீதிபதிகள் தள்ளி வைத்தனர்.

திமுகவின் அரசியல் குற்றச்சாட்டு இந்த சட்டப்பூர்வ நடவடிக்கைகளுக்குப் பின்னால் மிகப்பெரிய அரசியல் உள்நோக்கம் இருப்பதாக திமுக தரப்பில் கடும் விமர்சனங்கள் எழுந்துள்ளன. குறிப்பாக, 2026 சட்டமன்றத் தேர்தலை முன்னிறுத்தி இந்த நடவடிக்கைகள் திட்டமிடப்படுவதாக திமுக வட்டாரங்கள் தெரிவிக்கின்றன. டெல்டா மண்டலத்தின் அசைக்க முடியாத சக்தியாகவும், கட்சியின் தேர்தல் பணிகளை ஒருங்கிணைப்பதில் முக்கியத் தூணாகவும் விளங்கும் அமைச்சர் கே.என்.நேருவை முடக்குவதன் மூலம், அந்தப் பகுதியில் திமுகவின் செல்வாக்கைச் சரி செய்ய மத்திய அரசு முயல்வதாகக் கூறப்படுகிறது.

அமைச்சர் நேரு மற்றும் மூத்த அமைச்சர்களை குறிவைப்பதன் மூலம் 2026 தேர்தலில் திமுகவின் களப்பணிகளைத் தடுத்து, அதன் மூலம் என்.டி.ஏ (NDA) கூட்டணி எளிதாக வெற்றி பெற வழிவகுக்கும் தந்திரமே இது என நேருவின் ஆதரவாளர்கள் குற்றம் சாட்டுகின்றனர். தேர்தல் நெருங்கும் வேளையில் இத்தகைய சோதனைகளும் விசாரணைகளும் அரசியல் பழிவாங்கும் நடவடிக்கைகளே தவிர, இதில் உண்மைத் தன்மை இல்லை என்பது அவர்களின் வாதமாக உள்ளது. நீதிமன்றத்தில் தாக்கல் செய்யப்படவுள்ள அடுத்தக்கட்ட அறிக்கைகள் மற்றும் ஜனவரி 28-ல் நடைபெறவுள்ள விசாரணை, தமிழக அரசியலில் மேலும் பல திருப்பங்களை ஏற்படுத்தும் என எதிர்பார்க்கப்படுகிறது.