திமுகவுக்கு காங்கிரஸ் டாடா? அதிக சீட் தராவிட்டால் ‘கை’ கழுவத் திட்டம்.. ஓபிஎஸ், டிடிவியும் விஜய் உடன் ரகசிய பேச்சு!

2026-ஆம் ஆண்டு தமிழக சட்டமன்றத் தேர்தலுக்கு இன்னும் வெறும் ஏழு மாசங்கள்தான் இருக்கு. தேர்தல் களத்துல திமுக, அதிமுக, தேமுதிக, பாமக என எல்லா கட்சிகளும் மும்முரமா வேலை பார்க்குறாங்க. இப்போதைக்கு தேர்தல் களத்துல திமுக கூட்டணிதான் வலுவா இருக்குன்னு பலரும் சொல்றாங்க.

ஏன்னா, திமுகவோட கைகோர்த்திருக்கிற விசிக, கம்யூனிஸ்ட் கட்சிகள், மதிமுக எல்லாரும் வரும் தேர்தல்ல திமுக அணியிலதான் போட்டியிடுவோம்னு திட்டவட்டமா சொல்லிட்டாங்க. திமுககிட்ட அதிகார பலம், பண பலம் இருக்கு. தேர்தல் பிரசாரம் பண்றதுக்கு இந்த கட்சிகள் எல்லாம் திமுககிட்டதான் நிதியை எதிர்பார்க்குறாங்க.

ஆனா, அகில இந்திய கட்சியான காங்கிரஸ் கட்சி வேற மாதிரி சிந்திக்கிறதா, சத்தியமூர்த்தி பவன் வட்டாரங்கள்ல பேசிக்கிட்டா சொல்றாங்க. தேர்தல் நெருங்குற நேரத்துல திமுகவுக்கு நெருக்கடி கொடுக்க காங்கிரஸ் திட்டம் போட்டிருக்கறதா கதர்ச்சட்டைக்காரங்க சொல்றாங்க.

வரப்போற சட்டமன்றத் தேர்தல்ல, அதிக தொகுதிகளை ஒதுக்கணும்னு திமுககிட்ட காங்கிரஸ் கேக்கப் போகுது. குறைந்தபட்சம் 25 தொகுதிகளாவது கொடுக்கணும்னு காங்கிரஸ் கட்சியினர் எதிர்பார்க்குறாங்க. அதோட, தேர்தல் சூழலைப் பொறுத்து, ஆட்சியில் பங்கு தரணும்ங்கிற கோரிக்கையையும் வைக்கலாம்னு யோசிச்சிட்டு இருக்காங்க.

இது சம்பந்தமா, காங்கிரஸ் கட்சியின் சட்டமன்றத் தலைவர் ராஜேஷ்குமார் நாகர்கோவில்ல கொடுத்த பேட்டி, திமுக வட்டாரத்துல அதிர்ச்சியோட பார்க்கப்படுது. ராஜேஷ்குமார் எம்.எல்.ஏ தன்னோட பேட்டியில, “முதல்ல காங்கிரஸில் சேர்ற திட்டத்துலதான் நடிகர் விஜய் இருந்தார். அதனாலதான் ராகுல் காந்தியை அவர் டெல்லியில சந்திச்சுப் பேசினாரு. காங்கிரஸில் சேர்ற விஜய்க்கு உடனே இளைஞர் காங்கிரஸ் தலைவர் பதவி கொடுக்கலாம்னு ராகுல் முடிவு செஞ்சிருந்தாரு.

ஆனா, காங்கிரஸ் கட்சியின் விதிகள், விஜய்யோட வருகைக்கு தடையா அமைஞ்சிடுச்சு. காங்கிரஸ் கட்சியோட விதிமுறைகளால, விஜய்க்கு பதவி கொடுக்க முடியாத நிலை ஏற்பட்டது. விஜய்யோட வயசு காரணமா, காங்கிரஸில் சேர்ற திட்டமும் கைவிடப்பட்டது. ஆனாலும் ராகுல் காந்தி மேல விஜய்க்கு மரியாதை இருக்கு. அவரை அவர் ரொம்பப் பாராட்டுறாரு. காங்கிரஸ் மேல எந்த விமர்சனத்தையும் விஜய் வெச்சதில்ல. ராகுல் காந்தி கைதானப்போ முதல்ல குரல் கொடுத்தது விஜய் தான்.

2026 சட்டமன்றத் தேர்தல், தமிழ்நாடு காங்கிரஸ் கட்சிக்கு ரொம்ப முக்கியமான தேர்தல். இதுல, எங்க கூட்டணி கட்சியான திமுக எங்க மேல உரிய மரியாதையை காட்டும்னு நாங்க எதிர்பார்க்கிறோம். தொகுதி ஒதுக்கீட்டுல கடந்த காலங்கள்ல இருந்த மாதிரி காங்கிரஸ் தொடர்ந்து இருக்க முடியாது. காங்கிரஸுக்கு குறைந்தபட்சம் 25 தொகுதிகளையாவது திமுக கொடுக்கணும்.

கடந்த 1967-ஆம் ஆண்டுக்கு அப்புறம், தமிழகத்துல காங்கிரஸ் கட்சி அதிகாரத்துல இருந்தது கிடையாது. அதனால, வரப்போற தேர்தல்ல ஜெயிச்சதுக்கு அப்புறம் ஆட்சியில் பங்கு வேணும்ங்கிறது ஒவ்வொரு காங்கிரஸ் தொண்டரோட ஆசையா இருக்கு.

திமுககிட்ட கூட்டணி பத்தி பேசும்போது, கூடுதலா தொகுதிகள் வேணும்; ஆட்சி அதிகாரத்துல பங்கு வேணும்னு நாங்க கட்டாயம் வலியுறுத்துவோம். ஆனாலும், இதுல டெல்லியில இருக்கிற காங்கிரஸ் மேலிடம் எடுக்கிற முடிவே இறுதியானது” அப்படின்னு ராஜேஷ்குமார் எம்.எல்.ஏ சொன்னார்.

இதை தவிர, விஜய் நடத்துற கூட்டங்கள்ல வர்ற கூட்டம் பத்தி தமிழகத் தலைவர்கள்கிட்ட ராகுல் காந்தி விசாரிச்சு கேட்டிருக்காராம். விஜய்க்கு குறைந்தபட்சம் 15%க்கு மேல வாக்குகள் கிடைக்கலாம்; விஜய்யோட காங்கிரஸ் சேர்ந்தா அது இன்னும் அதிகமாகும்னு, ராகுல் காந்திகிட்ட தமிழக காங்கிரஸ் தலைவர்கள் சில பேரு சொல்லிருக்காங்க.

அதுமட்டுமில்லாம, விஜய்யோட கூட்டணி சேர ஓ.பன்னீர்செல்வம் டீம், டிடிவி தினகரன், புதிய தமிழகம் கிருஷ்ணசாமி தரப்பு ரகசியமாப் பேசிக்கிட்டு வர்றதா சொல்லப்படுது. இவங்க எல்லாரும் விஜய் பக்கம் வந்துட்டா, அதிமுகவுல இருந்து பிரியற வாக்குகளும் சேரும்போது, ‘தமிழக வெற்றிக் கழக’ அணிக்கு ஆட்சி அமைக்கிற வாய்ப்பு பிரகாசமா இருக்கும்னு தமிழக காங்கிரஸ் கட்சியினர் நம்புறாங்க.

இதே மாதிரி, தேமுதிக, பாரிவேந்தரோட ஐ.ஜே.கே. மாதிரியான வேற சில கட்சிகளை விஜய் பக்கம் இழுக்கவும் பேச்சுவார்த்தை நடப்பதா தெரியுது. இவங்களும் விஜய் தலைமையில அணி திரண்டா, வரப்போற தேர்தல்ல பெரிய அதிசயத்தை நிகழ்த்த முடியும்னு காங்கிரஸ் தலைவர்கள் நம்புறாங்க.

முதல்வர் மு.க. ஸ்டாலினுக்கும், ராகுல் காந்திக்கும் இடையில சுமூகமான உறவு இருக்கிறப்போ, இதெல்லாம் நடக்குமான்னு கேள்விகள் எழாம இல்லை. அதோட, தமிழக காங்கிரஸ் தலைவர் செல்வப்பெருந்தகை கூட திமுக ஆதரவாளராதான இருக்காருன்னு காங்கிரஸ் தலைவர்கள்ட்ட கேட்டப்போ, காங்கிரஸ் நிர்வாகிகள் அதை மறுக்கிறாங்க.

“சட்டமன்றத் தேர்தலுக்கு இன்னும் ஏழு மாசங்கள் இருக்கு. அதுக்குள்ள எது வேணாலும் நடக்கலாம். அரசியல்ல நிரந்தரமான எதிரியும் கிடையாது, நண்பனும் கிடையாது. செல்வப்பெருந்தகை மேல வழக்குகள் இருக்கிறதால, அவர் மேல ராகுல் காந்திக்கு அதிருப்தி இருக்கு. அதனால, ‘தமிழக வெற்றிக் கழகம்’ பக்கம் காங்கிரஸ் போறதுல தயக்கம் இல்ல. ஆனா, திமுக தன்னோட பிடிவாதத்தை விட்டுட்டு, அதிக இடம் கொடுக்க முன்வந்தாலோ, காங்கிரஸ் கட்சி கேட்ட தொகுதிகளை ‘தமிழக வெற்றிக் கழகம்’ கொடுக்க மறுத்தாலோ, இந்த கூட்டணி வியூகம் நடக்காம கூட போகலாம்” அப்படின்னு காங்கிரஸ் தரப்புல சொல்றாங்க.

அதனால, தங்கள் கூட்டணி பலமா இருக்குன்னு நினைச்சுக்கிட்டு இருக்கிற ஆளும் திமுக கூட்டணிக்கு அடுத்த சில மாசங்கள்ல சில அதிர்ச்சிகள் காத்துக்கிட்டிருக்கலாம்னு தெரியுது. கூட்டணிய பலவீனமாகாம இருக்க திமுக தலைவர் மு.க. ஸ்டாலின் என்ன மாதிரி திட்டம் போடுவார்ங்கிறத பொறுத்திருந்துதான் பார்க்கணும்.