ஓபிஎஸ் டெல்லி பயணம்! ஆடிட்டர் குருமூர்த்தியுடன் பாஜகவிடம் பேச்சு..! தனிக்கட்சி தொடங்கும் திட்டம் என்னவாகும்?
அதிரடி ஆட்டத்துக்குத் தயாராகி உள்ள முன்னாள் முதல்வர் ஓபிஎஸ், டெல்லி பாஜக தலைமை தரும் நம்பிக்கையில் புதுக் கட்சி தொடங்குகிறார். இதை என்.டி.ஏ.வில் சேர்ப்போம் என்ற உறுதிமொழியை பெறும் பொருட்டு, டெல்லிக்கு திடீரென பயணம் மேற்கொண்டுள்ளார். இதற்கான ஏற்பாடுகளை துக்ளக் ஆசிரியரான ஆடிட்டர் குருமூர்த்தி செய்துள்ளதாக கூறப்படுகிறது.
அதிமுகவின் முன்னாள் ‘காவலர்’ ஓ.பன்னீர்செல்வத்தின் அரசியல் வியூகம், தற்போது டெல்லியை நோக்கித் திரும்பி இருக்கிறது. “மீண்டும் அதிமுக-வில் இணைவது” என்ற நீண்ட நாள் கனவு கலைந்து போகும் நிலையில், தனிக்கட்சி தொடங்கும் முடிவுக்கு அவர் வந்துள்ளதன் பின்னணியில், பல சுவாரஸ்யமான அரசியல் கணக்குகள் அடங்கியுள்ளன.
“அண்ணன்” என்று ஓபிஎஸ்ஸால் அன்புடன் அழைக்கப்பட்ட எடப்பாடி பழனிசாமி வசம் கட்சியின் தலைமை முழுவதுமாகச் சென்றுவிட்ட பிறகு, ஓபிஎஸ்-ஸும், அவரது ஆதரவாளர்களும், “எப்படியாவது பாஜக தலையிட்டு, தங்களை மீண்டும் கட்சியில் இணைத்துவிடும்” என்ற அசைக்க முடியாத நம்பிக்கையில் இருந்தனர். ‘பாஜக மேலிடம் ஏதாவது ஒரு நெருக்கடி கொடுத்து, டிசம்பர் 10-ஆம் தேதி ஈபிஎஸ் கூட்டியுள்ள பொதுக்குழுவில் சாதகமான முடிவை எடுக்க வைக்கும்’ என்று கடைசிவரை நம்பி வந்திருக்கிறார் ஓபிஎஸ்.
ஆனால், பாஜக தரப்பிலிருந்து எந்தவொரு ‘பிடி கொடுக்கிற மாதிரி’ பதிலும் வராதது, ஓபிஎஸ்-க்கு நெருக்கமானவர்களைக் கவலையில் ஆழ்த்தியது. ஏற்கெனவே, மைத்ரேயன், ஓபிஎஸ்-ஸின் தீவிர ஆதரவாளர்களான மனோஜ் பாண்டியன் போன்றவர்கள் திமுக பக்கம் சாய்ந்தனர். “நீங்க தனிக்கட்சி தொடங்குற மாதிரி இல்லை, நானும் அரசியலில் இருந்து விலகிக்கிறேன்” என்று பண்ருட்டி ராமச்சந்திரனும் சலிப்புடன் சொன்ன பிறகுதான், ‘இனி காத்திருப்பதில் அர்த்தமில்லை’ என்று ஓபிஎஸ் தரப்பு முடிவுக்கு வந்துள்ளது.
ஓபிஎஸ் தனி கட்சி தொடங்க தயங்கியதற்குப் பிரதான காரணமாக இருந்தது, செலவுப் பயம்தான்! “தனி ஆபீஸ், ரெகுலர் செலவுகள்” என நிதிச்சுமையைக் கூட்டி கழித்துப் பார்த்தே, தனிக்கட்சித் திட்டத்தை அவர் கிடப்பில் போட்டிருந்தார். ஆனால், இத்தனை தாமதத்துக்குப் பிறகு, “எந்தக் கதவும் திறக்கவில்லை” என்ற இறுதியான முடிவுக்கு வந்த ஓபிஎஸ், டிசம்பர் 15-ஆம் தேதியன்று தனிக்கட்சியை அறிவிக்கத் திட்டமிட்டுள்ளார்.
ஓபிஎஸ் தரப்பு ஒருவழியாக தனிக்கட்சி தொடங்க முடிவெடுத்த நிலையில், அதற்கு “அம்மா எம்ஜிஆர் திமுக” என்ற பெயரை வைக்க முடிவெடுத்திருப்பதாக கூறப்பட்டுகிறது. ஆனால், காஞ்சிபுரத்தில் ‘அம்மா எம்ஜிஆர் திமுக’ என்ற பெயரில் ஒரு கட்சியைப் பதிவு செய்து வைத்திருப்பது தெரிய வரவே, அந்த நபரிடம் கூட ஓபிஎஸ் தரப்பு பேசியுள்ளது.
கட்சி தொடங்கும் முடிவை எடுத்த பிறகு, ஓபிஎஸ்-ஸின் முழு கவனமும் இப்போது பாஜக கூட்டணியை நோக்கித் திரும்பியுள்ளது. இதற்காகவே, அவர் டெல்லிக்கு விரைந்துள்ளார். பிரபல ஆடிட்டர் குருமூர்த்தியின் உதவியுடன், பாஜக-வின் டெல்லி தலைவர்களைச் சந்தித்துப் பேச்சு நடத்தி உள்ளார்.
வரும் 15-ஆம் தேதி தனிக்கட்சியை அறிவிக்கவுள்ள நிலையில், ‘தேசிய ஜனநாயகக் கூட்டணியில் தங்கள் கட்சிக்குக் கதவு திறக்கப்படும்’ என்ற உறுதிமொழியை பாஜக தலைவர்களிடம் இருந்து பெறுவதுதான் ஓபிஎஸ்-ஸின் பிரதான நோக்கம்.
ஓபிஎஸ்-ஸின் முதல் சாய்ஸ் இப்போதும் பாஜக கூட்டணியே! அவர்களின் கணக்கு இதுதான்: ஓபிஎஸ் கட்சி, பாஜக கூட்டணியில் இருக்கும். அதே நேரத்தில், அதிமுக-வும் பாஜக கூட்டணியில் இருக்கும். இதனால், சிராக் பாஸ்வான்-நிதிஷ் குமார் ஃபார்முலா பீகாரில் வெற்றி பெற்றதைப் போல, தமிழகத்திலும் அது ஒர்க் அவுட் ஆகும் என்று நம்புகிறார் ஓபிஎஸ்.
ஒருவேளை, அதிமுக எதிர்ப்பு தெரிவித்து, பாஜக கூட்டணிக்குள் ஓபிஎஸ் கட்சியை நுழைய விடாமல் தடுத்தால், அடுத்த கட்டமாக திமுக கூட்டணி அல்லது டிடிவி தினகரனின் அமமுக உடன் இணைந்து தவெக கூட்டணியில் இணைவது பற்றி பரிசீலிக்கலாம் என்றும் ஓ.பன்னீர்செல்வம் திட்டமிட்டுள்ளார். நீண்ட காலமாக அரசியலில் குழப்பமான நிலையில் இருந்த ஓபிஎஸ்-ஸின் இந்த நகர்வு, தமிழக அரசியல் களத்தில் மீண்டும் ஒரு புதிய அத்தியாயத்தைத் திறந்துவிட்டுள்ளது.
டெல்லியில் ஓபிஎஸ்-ஸின் காய்கள் நகருமா, இல்லை ஈபிஎஸ்-ஸின் கரங்கள் இன்னும் வலுப்பெறுமா என்பதை, வரும் அதிமுக பொதுக்குழு கூட்டமும், டிசம்பர் 15-ஆம் தேதி ஓபிஎஸ் வெளியிடும் அறிவிப்பும் சொல்லும்! ஒட்டு மொத்தமாகச் சொன்னால், அரசியல் ஆட்டம் சூடுபிடிக்க ஆரம்பித்துவிட்டது.
