இந்தியாவில் 56% வாகனங்களுக்கு காப்பீடு இல்லை..!

இந்தியச் சாலைகளில் செல்லும் வாகனங்களில் சுமார் 56% வாகனங்களுக்கு (அதாவது 16.54 கோடி வாகனங்களுக்கு) காப்பீடு இல்லை என்ற தகவல் “அதிர்ச்சியளிக்கிறது” என்று கூறிய உச்ச நீதிமன்றம், காப்பீடு இல்லாத வாகனங்களின் எண்ணிக்கையைக் குறைக்கவும், மோட்டார் விபத்து இழப்பீட்டுக் கோரல் நடைமுறைகளை எளிமைப்படுத்தவும் செவ்வாய்க்கிழமை (ஆகஸ்ட் 4) பல வழிகாட்டுதல்களைப் பிறப்பித்துள்ளது. காப்பீட்டுத் தகவல்களைத் தொழில்நுட்ப ரீதியாகத் போக்குவரத்துச் சட்ட அமலாக்கத்துடன் இணைக்கவும், மோட்டார் காப்பீடு விற்பனை செய்யப்படும் முறையை மறுசீரமைக்கவும் நீதிமன்றம் உத்தரவிட்டுள்ளது.

மூன்றாம் நபர் காப்பீட்டை கட்டாயமாக்கியதன் பின்னணியில் உள்ள நோக்கம், விபத்தில் பாதிக்கப்பட்டவர்களுக்கு இழப்பீடு கிடைப்பது மட்டுமல்லாமல், அவர்கள் நீண்டகால நீதிமன்றப் போராட்டங்களில் சிக்காமல் இருப்பதை உறுதி செய்வதும் தான் என்று நீதிமன்றம் சுட்டிக்காட்டியுள்ளது. மூன்றாம் நபர் காப்பீடு என்பது விபத்தின் போது பிறருக்கு ஏற்படும் காயம், உயிரிழப்பு அல்லது சொத்துச் சேதத்திற்கான வாகன உரிமையாளரின் நிதிப் பொறுப்பை ஏற்கும்; ஆனால், உரிமையாளரின் சொந்த வாகனத்திற்கு ஏற்படும் சேதத்தைச் ஈடுசெய்யாது.

நீதிபதிகள் சஞ்சய் கரோல் மற்றும் பி.கே. மிஸ்ரா ஆகியோர் அடங்கிய அமர்வின் சார்பில் தீர்ப்பை எழுதிய நீதிபதி சஞ்சய் கரோல், “வாகனங்களுக்குக் காப்பீடு இல்லாதபோது, பாதிக்கப்பட்டவர்களுக்கும் அவர்களின் குடும்பத்தினருக்கும் நியாயமான காலத்தில் போதிய இழப்பீடு கிடைக்காமல் போகிறது. பாதிக்கப்பட்டவர் உயிரிழந்தாலோ அல்லது நிரந்தர ஊனம் அடைந்தாலோ, குடும்பத்தின் நிதி நிலைமை கடுமையாகப் பாதிக்கப்பட்டு நிலைமை இன்னும் மோசமாகிறது,” என்று குறிப்பிட்டுள்ளார்.