அதிகாரத் திமிருக்கு அடி! *சமூக ஆர்வலருக்கு ஆதரவாக கோர்ட் தீர்ப்பு! * புகாரை அவிநாசி டிஎஸ்பி விசாரிக்க ஆணை!

திருப்பூர் மாவட்டம் அவிநாசியே சேர்ந்தவர் அதிமுக பிரமுகர் மோகன். இவரைச் சுற்றி எப்போதும் ஒருவித அதிகார ஆதிக்கம் இருந்ததாகப் பேசப்படும் நிலையில், அதே பகுதியைச் சேர்ந்த வழக்கறிஞரும், சமூக ஆர்வலருமான சத்தியமூர்த்தியை தகாத வார்த்தைகளால் வசைபாடியதாக, சில ஆண்டுகளுக்கு முன் ஒரு விவகாரம் வெடித்தது. பாதிக்கப்பட்ட வழக்கறிஞர் சத்தியமூர்த்தி, மோகனை சும்மா விடக்கூடாது என்று எஸ்சி/எஸ்டி வன்கொடுமை சட்டத்தின் கீழ் அவிநாசி டிஎஸ்பி அலுவலகத்தில் புகார் கொடுத்தார்.

ஆனால், அன்று அந்த இருக்கையில் அமர்ந்திருந்த டிஎஸ்பி ரகுபதியோ, அந்தப் புகாரை எட்டிப் பார்க்கக்கூடத் தயாராக இல்லை. அன்று நடந்த அந்த மர்மமான மெத்தனத்திற்குப் பின்னால் ஏதோ பெரிய அரசியல் ‘டீலிங்’ இருப்பதாக சத்தியமூர்த்தி தரப்பு அப்போதே சந்தேகித்தது. அதிகார வர்க்கமும், ஆளுங்கட்சி அல்லாத செல்வாக்குள்ள பிரமுகர்களும் கைகோர்த்துக்கொண்டு, பாதிக்கப்பட்டவரின் குரலை நசுக்கப் பார்த்த அந்தச் சூழல், அவிநாசி காவல் வட்டாரத்தில் பெரும் சர்ச்சையைக் கிளப்பியது.

நீதிக்காகப் போராடிய வழக்கறிஞருக்குக் கிடைத்ததோ அலட்சியம் மட்டுமே. புகாரைப் பதிவு செய்து நடவடிக்கை எடுப்பதை விட, அந்த அதிமுக பிரமுகருடன் ரகசிய இணக்கம் காட்டியதாக எழுந்த குற்றச்சாட்டு, காக்கிச்சட்டையின் மாண்பையே கேள்விக்குள்ளாக்கியது.

நீதிமன்றத்தின் அதிரடி உத்தரவு!

காவல் துறையின் கதவுகள் அடைக்கப்பட்டபோது, நீதித்துறையின் கதவைத் தட்டினார் சத்தியமூர்த்தி. தனது புகாரை அவிநாசி டிஎஸ்பி முறையாக விசாரிக்கவில்லை என்று கூறி, நீதிமன்றத்தில் வழக்கு தொடர்ந்தார். மாதங்கள் உருண்டன, காலம் கனிய, திருப்பூர் மாவட்ட எஸ்சி எஸ்டி வழக்குகளை விசாரிக்கும் சிறப்பு நீதிமன்றம் இப்போது ஒரு அதிரடியான தீர்ப்பை வழங்கியிருக்கிறது.

அந்தத் தீர்ப்பின் சாராம்சம் இதுதான்… “தற்போதைய டிஎஸ்பி, அந்த அதிமுக பிரமுகர் மோகனுக்கு எதிரான வன்கொடுமைப் புகாரை உடனடியாகத் தூசி தட்டி மீண்டும் விசாரிக்க வேண்டும்” என்பதுதான். இது வெறும் உத்தரவு மட்டுமல்ல, புகார் மனுவை கிடப்பில் போட்டுவிட்டு அதிகார வர்க்கத்துடன் ‘கும்மாளம்’ போட்ட காவல் துறைக்கு விழுந்த பலமான சவுக்கடி.

சமூக ஆர்வலர்களுக்குக் கிடைத்த நம்பிக்கை!

இந்தத் தீர்ப்பு  திருப்பூா் மாவட்டத்தில் உள்ள ஒட்டுமொத்த சமூக ஆர்வலர்களுக்கும் பெரும் உற்சாகத்தைத் தந்துள்ளது. அதிகாரத்தில் இருப்பவர்கள் என்ன செய்தாலும் தப்பித்துவிடலாம் என்ற பிம்பத்தை நீதிமன்றத்தின் இந்த உத்தரவு சுக்குநூறாக உடைத்திருக்கிறது. காக்கிகள் தங்களுக்குப் பிடித்தமானவர்களுக்கு வக்காலத்து வாங்கினால், நீதிமன்றம் வேடிக்கை பார்த்துக் கொண்டிருக்காது என்பதை இந்தச் சம்பவம் உரக்கச் சொல்கிறது.

பொதுமக்கள் ஒரு புகாரை அளிக்கிறார்கள் என்றால், அது வெறும் காகிதமல்ல; அவர்களின் உரிமை. அதை பாரபட்சமின்றி விசாரித்து நீதியை நிலைநாட்ட வேண்டியது காவல் துறையின் கடமை. அந்தத் தர்மத்தை மறந்த காக்கி அதிகாரிகளுக்கு, நீதிமன்றம் பாடம் புகட்டியிருக்கிறது.

சமூகத்தின் குரலாய் ஒலிக்கும் சத்தியமூர்த்தி போன்றவர்களின் போராட்டம், அநீதிக்கு எதிராகச் சட்டப் போராட்டம் நடத்தும் ஒவ்வொருவருக்கும் ஒரு வலுவான நம்பிக்கையை வழங்கியிருக்கிறது. இனிமேலாவது காவல் துறை நேர்மையின் பாதையில் செல்லுமா?  சிறப்பு நீதிமன்றம்  அதிரடி தீர்ப்பு, அனைவரையும் அந்த கேள்விக்கு விடை தேடத் தூண்டுகிறது.