தமிழ்நாட்டில் வைத்து விசாரிக்க சி.பி.ஐ-யிடம் விஜய் கோரிக்கை..!

தமிழக வெற்றி கழகத்தின் தலைவரும் நடிகருமான விஜய், கரூர் நெரிசல் தொடர்பான வழக்கில் அடுத்தகட்ட விசாரணைகளை டெல்லிக்கு பதிலாக தமிழ்நாட்டிலேயே நடத்த வேண்டும் என்று மத்திய புலனாய்வு அமைப்பான சிபிஐ-யிடம் கோரிக்கை விடுத்துள்ளார். கடந்த ஆண்டு கரூர் மாவட்டம் வேலுசாமிபுரத்தில் நடைபெற்ற த.வெ.க பிரச்சாரக் கூட்டத்தில் ஏற்பட்ட எதிர்பாராத நெரிசலில் 41 பேர் உயிரிழந்தனர்.

பெரும் சோகத்தை ஏற்படுத்திய இந்தச் சம்பவம் குறித்து உச்ச நீதிமன்றத்தின் மேற்பார்வையில் சி.பி.ஐ அதிகாரிகள் தீவிர விசாரணை நடத்தி வருகின்றனர். இந்த வழக்கின் ஒரு பகுதியாக, த.வெ.க தலைவர் விஜய் ஏற்கனவே ஜனவரி மாதம் இரண்டு முறையும், கடந்த மார்ச் 15-ஆம் தேதி ஒருமுறையும் என மொத்தம் மூன்று முறை டெல்லியில் உள்ள சி.பி.ஐ அலுவலகத்தில் நேரில் ஆஜராகி விளக்கம் அளித்துள்ளார்.

நேற்று நடைபெற்ற மூன்றாம் கட்ட விசாரணையில் சுமார் 7 மணி நேரம் அவரிடம் அதிகாரிகள் விசாரணை நடத்தினர். சட்டத்தை மதிக்கும் குடிமகனாக விசாரணைக்கு முழு ஒத்துழைப்பு வழங்கி வரும் விஜய், தற்போதைய சூழலில் தனக்கு இருக்கும் பணிச்சுமைகளைக் கருத்தில் கொண்டு சி.பி.ஐ அதிகாரிகளிடம் ஒரு மனுவை அளித்துள்ளார்.

அந்த மனுவில், எதிர்வரும் ஏப்ரல் 23-ஆம் தேதி நடைபெறவுள்ள தமிழக சட்டப்பேரவை பொதுத்தேர்தலுக்காக வேட்பாளர் தேர்வு, தேர்தல் அறிக்கை தயாரித்தல் மற்றும் பொதுக்கூட்டங்கள் எனத் தீவிரமான அரசியல் பணிகளில் ஈடுபட்டுள்ளதை அவர் குறிப்பிட்டுள்ளார். இத்தகைய இக்கட்டான சூழலில், ஒவ்வொரு முறையும் விசாரணைக்காக டெல்லிக்கு வந்து செல்வது மிகுந்த சிரமத்தை ஏற்படுத்துவதாகவும், எனவே இனிவரும் விசாரணைகளைச் சென்னை அல்லது தமிழ்நாட்டின் ஏதேனும் ஒரு பகுதியில் நடத்த அனுமதிக்குமாறும் அவர் கேட்டுக் கொண்டுள்ளார்.

மேலும், கரூர் சம்பவத்தில் உயிரிழந்தவர்களின் குடும்பங்களைப் போலவே தானும் தனது கட்சியினரும் பெரும் மனவேதனையில் இருப்பதாகவும், அந்தத் துயரமான நேரத்தில் தகுந்த முன்னெச்சரிக்கை நடவடிக்கைகளை எடுத்திருந்தும் இத்தகைய உயிரிழப்புகள் ஏற்பட்டது தங்களுக்கு ஆறாத வடுவாக இருப்பதாகவும் அவர் உருக்கத்துடன் தெரிவித்துள்ளார்.

இதற்கிடையில், இதே கரூர் விவகாரம் தொடர்பாக முன்னாள் அமைச்சர் செந்தில் பாலாஜிக்கும் சி.பி.ஐ தரப்பில் சம்மன் அனுப்பப்பட்டுள்ளது. அவர் மார்ச் 17-ஆம் தேதி விசாரணைக்கு ஆஜராக உத்தரவிடப்பட்டுள்ள நிலையில், இந்த வழக்கு தமிழக அரசியலில் பெரும் பரபரப்பை ஏற்படுத்தியுள்ளது. விஜய்யின் இந்த கோரிக்கையை ஏற்று சி.பி.ஐ அதிகாரிகள் அடுத்தகட்ட விசாரணையைத் தமிழகத்தில் நடத்துவார்களா என்பதைப் பொறுத்திருந்துதான் பார்க்க வேண்டும்.