பிரதமர் மோடி வீடு மீது பறந்த ட்ரோன்..அதிர்ச்சியில் அதிகாரிகள்..!

டெல்லியில் பிரதமர் நரேந்திர மோடியின் இல்லத்திற்கு மேல் மர்ம டிரோன் பறந்ததாக கூறப்படும் விவகாரம் தொடர்பாக டெல்லி போலீசார் விசாரணை மேற்கொண்டுள்ளனர்.

பிரதமரின் அதிகாரப்பூர்வ இல்லம் மற்றும் அதனை சுற்றியுள்ள பகுதிகளில் விமானங்கள் பறக்க தடை விதிக்கப்பட்டுள்ளது. இந்த நிலையில் பிரதமர் இல்லத்தின் மேல் இன்று அதிகாலை 5 மணி அளவில் டிரோன் காணப்பட்டதாக கூறப்படுகிறது.

இது குறித்து டெல்லி காவல்துறை வெளியிட்டுள்ள அறிக்கையில் பிரதமரின் இல்லத்திற்கு அருகே மர்ம ட்ரோன் பறக்க விடப்பட்டது. இது தொடர்பாக பிரதமரின் சிறப்பு காவல் அதிகாரி அதிகாலை 5.30 மணிக்கு டெல்லி காவல்துறையை தொடர்பு கொண்டதாக தெரிவிக்கப்பட்டுள்ளது.

பிரதமரின் இல்லத்திற்கு அருகே உள்ள பகுதிகளில் முழுமையான தேடுதல் நடத்தப்பட்ட போதிலும் சந்தேகத்திற்கு இடமான பொருள் எதுவும் கண்டறியப்படவில்லை எனவும் விசாரணை நிறைவடைந்த பிறகு முழு விவரம் தெரிய வரும் எனவும் குறிப்பிடப்பட்டுள்ளது.