தமிழ்நாடு அரசு ஊழியர்கள் போராட்டம்..!

தமிழ்நாடு அரசு ஊழியர்கள் சங்கம் 2021 சட்டமன்ற தேர்தல் வாக்குறுதிப் படி, அரசு ஊழியர்களின் நியாயமான கோரிக்கைகளை உடனடியாக நிறைவேற்ற வேண்டும் என்று வலியுறுத்தி பிப்ரவரி 25ஆம் தேதியன்று ஒட்டுமொத்த தற்செயல் விடுப்பு போராட்டம் நடத்துவதாக அறிவித்துள்ளது.

இந்தப் போராட்டத்திற்கு ஆதரவு தெரிவித்து கீழ்க்கண்ட கோரிக்கைகளை வலியுறுத்தி தமிழ்நாடு எய்ட்ஸ் கட்டுப்பாட்டு அனைத்து ஊழியர்கள் நலச் சங்கத்தின் சேலம் மாவட்ட தலைவர் சந்திரசேகரன் தலைமையில் இன்று நேற்று (பிப்ரவரி 20) மாலை 5.30 மணிக்கு சேலம் அரசு மருத்துவமனையில் பிரச்சார இயக்கம் நடைபெற்றது.

திமுக அரசின் தேர்தல் கால வாக்குறுதி எண் 309இன் படி புதிய ஓய்வூதிய திட்டத்தை ரத்து செய்து பழைய ஓய்வூதிய திட்டத்தை அமல்படுத்திட வேண்டும், முடக்கி வைக்கப்பட்டுள்ள ஒப்படைப்பு ஊதியத்தை மீண்டும் வழங்கிட வேண்டும், அரசு ஆரம்ப சுகாதார நிலையத்தில் பணிபுரியும் எய்ட்ஸ் கட்டுப்பாட்டு ஊழியர்களுக்கு நான்கு ஆண்டுகளாக கொடுக்கப்படாமல் உள்ள 20 சதவீத ஊதிய உயர்வை வழங்கிட வேண்டும்.

2021 சட்டமன்ற திமுக தேர்தல் வாக்குறுதி எண் 153இன் படி 10 ஆண்டுகள் பணிபுரிந்த எய்ட்ஸ் கட்டுப்பாட்டு திட்ட ஊழியர்களை பணி நிரந்தரம் செய்திட வேண்டும் உட்பட 20 அம்ச கோரிக்கைகளை வலியுறுத்தி இந்த பிரச்சார இயக்கம் நடைபெற்றது.

இந்தப் பிரச்சார இயக்கத்தில் தமிழ்நாடு அரசு ஊழியர்கள் சங்கத்தின் சேலம் மாவட்டத் துணைத் தலைவர் ஜெகஜோதி, தமிழ்நாடு எய்ட்ஸ் கட்டுப்பாட்டு அனைத்து ஊழியர்கள் நலச் சங்கத்தின் மாநில பொருளாளர் ரமேஷ், மாவட்ட துணைத் தலைவர் ராஜா, இணைச் செயலாளர் மூர்த்தி, அமைப்புச் செயலாளர் ரமேஷ், நிர்வாகிகள் கலைச்செல்வி, சுப்ரமணி ஆகியோர் ஊழியர்களை சந்தித்து பிரச்சார இயக்கத்தில் ஈடுபட்டனர். சேலம் மாவட்ட தமிழ்நாடு எய்ட்ஸ் கட்டுப்பாட்டு அனைத்து ஊழியர்கள் நலச் சங்கத்தினர் அனைவரும் கோரிக்கை அட்டை அணிந்து பணிபுரிவது என்று ஒப்புதல் தெரிவித்தனர்.

தமிழ்நாடு அரசு ஊழியர்கள் நீண்ட காலமாகவே தங்களுடைய உரிமைக்காக போராடி வருகின்றனர். குறிப்பாக, பழைய பென்சன் திட்டத்தை மீண்டும் அமல்படுத்த வேண்டும் என்பது அவர்களுடைய நீண்ட கால கோரிக்கையாக உள்ளது. அதேபோல, பகுதி நேர ஆசிரியர்களும் தங்களுடைய பணி நிரந்தரத்துக்காகப் போராடி வருவது குறிப்பிடத்தக்கது.