நாடு முழுவதும் மூன்றாம் கட்ட ஊரடங்கு தொடக்கம்..! தளர்வுகள் என்னென்ன?

கொரொனா பரவலை கட்டுபடுத்த கடந்த மார்ச் 25-ஆம் தேதி பிறப்பிக்கப்பட்ட ஊரடங்கு தற்போது மூன்றாம் கட்டமாக மே 17 வரை நீட்டிக்கப்பட்டுள்ளது. கொரொனா நோய் கட்டுப்பாட்டு பகுதிகளில் தற்போது உள்ள நடைமுறைகளின் படி எந்தவிதமான தளர்வுகளும் இல்லாமல் ஊரடங்கு முழுமையாக கடைபிடிக்கப்படும். மத்திய அரசு அறிவித்தபடி விமானம், ரயில், பேருந்து போன்ற பொது போக்குவரத்துக்கான தடையுடன் டாக்ஸி. ஆட்டோ, சைக்கிள், ரிக்ஷாக்கள் போன்றவை இயங்குவதற்கும் தடை நீடிக்கிறது.

பள்ளிகள் மற்றும் இதர கல்வி நிறுவனங்கள் செயல்படுவதில் ஏற்கனவே நடைமுறையில் இருந்த வழிபாட்டு தலங்கள், திரையரங்குகள், கேளிக்கை கூடங்கள், உயிரியல் பூங்காக்கள், தங்கும் விடுதிகள் போன்றவை இயங்குவதற்கான தடையும் முழுமையாக தொடர்கிறது. திருமண நிகழ்ச்சி, இறுதி ஊர்வலம் போன்றவற்றுக்கு ஏற்கனவே இருந்த நடைமுறைகள் தொடர்கிறது.

கட்டுப்படுத்தப்பட்ட பகுதிகளை தவிர்த்து அனைத்து இடங்களிலும் அத்தியாவசிய பொருட்கள் விற்பனை செய்யும் கடைகள் காலை 6 மணி முதல் மாலை 5 மணி வரை செயல்படும். உணவகங்களில் காலை 6 மணி முதல் இரவு 9 மணி வரை பார்சல் மட்டும் வழங்கவும் அனுமதிக்கப்பட்டுள்ளது. தொழில்நுட்ப நிறுவனங்கள் 10 சதவீத பணியாளர்களை கொண்டு செயல்படவும் மாநகராட்சி மற்றும் நகராட்சிக்கு வெளியில் உள்ள அனைத்து தொழிற்சாலைகளும் 50 சதவீத ஊழியர்களுடன் இயங்கவும் கிராமப்புறங்களில் நூறு நாள் வேலைத்திட்டத்தை தொடரவும் அனுமதி வழங்கப்பட்டுள்ளது.

கட்டுமானப் பணி நடைபெறும் இடத்திலேயே கட்டுமான தொழிலாளர்கள் தங்கியிருந்தால் அப்பணிகள் அனுமதிக்கப்பட்டிருக்கலாம். நகர்ப்புறங்களில் உள்ள முடி திருத்தங்கள், அழகு நிலையங்கள் தவிர ஹார்வர்ட், சிமெண்ட், கட்டுமானப் பொருட்கள், எலெக்ட்ரிக்கல் பொருட்கள் விற்பனை செய்யும் கடைகள், மொபைல்போன், கணிப்பொறி, வீட்டு உபயோகப்பொருள், மின்மோட்டார், கண்ணாடி விற்பனை மற்றும் பழுது நீக்குதல் உள்ளிட்ட தனிக் கடைகள் கொரொனா முன்னெச்சரிக்கையுடன் காலை 11 மணி முதல் மாலை 5 மணி வரை செயல்பட அனுமதி அளிக்கப்பட்டுள்ளது.

பிளம்பர், எலெக்ட்ரீஷியன், ஏசி மெக்கானிக், பஞ்சர் உள்ளிட்ட சுய திறன் பணியாளர்கள் சிறப்பு தேவைகள் உள்ளோருக்கான உதவியாளர்கள், வீட்டுவேலை பணியாளர்கள் ஆகியோர் உரிய அனுமதி பெற்ற பின்னர் பணிபுரியவும் தமிழக அரசு அறிவித்துள்ளது. மருத்துவமனைகள், மருந்தகங்கள் போன்றவை முன்பு போலவே கட்டுப்பாடு இன்றி முழு நேரமும் செயல்பட அனுமதிக்கப்பட்டுள்ளது. இதனிடைய அத்தியாவசிய தேவைகளுக்காக வெளியே வரும்போது பொதுமக்கள் கட்டாயம் மாஸ்க் அணிய வும் தமிழக அரசு வலியுறுத்தியுள்ளது.