பொங்கல் பரிசு: தமிழக மக்களுக்கு இந்த முறை என்ன கிடைக்கும்?

தமிழ்நாடு அரசு, பொங்கல் பண்டிகையை முன்னிட்டு ஒவ்வொரு ஆண்டும் சிறப்புப் பரிசுத் தொகுப்பு மற்றும் பணப் பரிசை வழங்குவது வழக்கம். இந்த பாரம்பரியத்தின்படி, அரிசி ரேஷன் அட்டைதாரர்களுக்கும் மற்றும் இலங்கைத் தமிழர் மறுவாழ்வு முகாம்களில் வசிக்கும் குடும்பங்களுக்கும் பொங்கல் பரிசு வழங்கப்படுகிறது.

இந்த ஆண்டு (2025) பொங்கல் பண்டிகையின்போது ரொக்கப் பணம் வழங்கப்படவில்லை. அதற்குப் பதிலாக, குடும்பங்களுக்கு ஒரு கிலோ பச்சரிசி, ஒரு கிலோ சர்க்கரை மற்றும் முழு நீளக் கரும்பு ஆகியவை அடங்கிய தொகுப்பு மட்டுமே வழங்கப்பட்டது. அரசின் இந்த முடிவு பல்வேறு தரப்பிலும் விமர்சனங்களைச் சந்தித்தது.

2026 சட்டமன்றத் தேர்தலை மனதில் வைத்து, வரவிருக்கும் பொங்கல் பரிசுத் தொகுப்பில் ரொக்கப் பணம் மீண்டும் அறிவிக்கப்படலாம் என்ற எதிர்பார்ப்பு தற்போது அதிகரித்துள்ளது. அதுமட்டுமின்றி, இந்த முறை பரிசுத் தொகையின் அளவு முன்பைவிட அதிகமாக இருக்கலாம் என்றும் பரவலாக யூகங்கள் எழுந்துள்ளன.

கடந்த 2021 ஆம் ஆண்டில், அ.தி.மு.க. ஆட்சியின்போது, பொங்கல் பரிசாக அதிகபட்சமாக ₹2,500 ரொக்கப் பணம் வழங்கப்பட்டது குறிப்பிடத்தக்கது. இந்த முறை, ரொக்கப் பணம் ₹5,000 ஆக இருக்கலாம் என்று சமூக வலைத்தளங்களில் செய்திகள் பரவி வருகின்றன. கடந்த ஆண்டு கணக்கின்படி, தமிழகத்தில் 2.21 கோடி குடும்ப அட்டைதாரர்கள் உள்ளனர். இந்தக் குடும்பங்களுக்கு ₹5,000 வழங்க வேண்டுமெனில், அரசுக்கு சுமார் ₹11,000 கோடி தேவைப்படும் என மதிப்பிடப்பட்டுள்ளது.

மாநிலத்தின் தற்போதைய நிதி நெருக்கடியைக் கருத்தில் கொண்டு பார்க்கும்போது, இவ்வளவு பெரிய தொகையை ஒதுக்கீடு செய்வது சாத்தியமா என்ற கேள்வி எழுந்துள்ளது.

இந்த ஆண்டு பொங்கல் பரிசுத் தொகுப்பில் ₹5,000 ரொக்கப் பணத்திற்கான கோரிக்கையை அரசு நிறைவேற்றுமா இல்லையா என்பது அடுத்த மாதம் தெளிவாகத் தெரிய வரும். அரசு என்ன முடிவெடுக்கப் போகிறது என்று ஒட்டுமொத்த தமிழக மக்களும் ஆவலுடன் காத்துக் கொண்டிருக்கின்றனர்.