ஸ்விகி, சுமாட்டோ, செப்டோ… டெலிவரி நிறுவனங்களுக்கு புதிய கட்டுப்பாடுகள்..!

மகாராஷ்டிராவில் ஸ்விகி, சுமாட்டோ, செப்டோ உள்ளிட்ட உணவு டெலிவரி மற்றும் இ-காமர்ஸ் நிறுவனங்களும் விரைவில் பைக் டாக்சி விதிமுறைகளின் கீழ் கொண்டுவரப்பட உள்ளதாகத் தகவல் வெளியாகியுள்ளது. இதன்படி, இந்த நிறுவனங்கள் மின்சார வாகனங்களை மட்டுமே கொண்ட வாகனப் படையைப் பராமரிக்க வேண்டும். மேலும், ஒவ்வொரு பயணத்திற்கான கட்டணத்தில் 2 சதவீதத்தை ஓட்டுநர் நல நிதிக்கு வழங்க வேண்டும் என விதிமுறைகள் கொண்டுவரப்பட உள்ளன.

தற்போது இதுபோன்ற தளங்கள் நுகர்வோர் பாதுகாப்புச் சட்டம், 2019, நுகர்வோர் பாதுகாப்பு (இ-காமர்ஸ்) விதிகள், 2020 மற்றும் சமூகப் பாதுகாப்புச் சட்டம், 2020 உள்ளிட்ட மத்திய அரசின் சட்டங்களின் கீழ் செயல்பட்டு வருகின்றன. ஓலா, உபர், ரேபிடோ போன்ற பயண முன்பதிவு செயலிகளைக் கட்டுப்படுத்தும் வகையில் மகாராஷ்டிராவில் 2026-ம் ஆண்டுக்கான தனிப்பட்ட ஒருங்கிணைப்பாளர் விதிமுறைகள் அமலில் உள்ளன. ஆனால், உணவு டெலிவரி மற்றும் இ-காமர்ஸ் சேவைகளுக்கு தனியான மாநில ஒழுங்குமுறை கட்டமைப்பு தற்போது இல்லை.

இந்நிலையில், போக்குவரத்துத் துறை அமைச்சர் பிரதாப் சர்நாயக் தலைமையிலான மகாராஷ்டிர மாநில போக்குவரத்துத் துறை, 2025-ம் ஆண்டின் மகாராஷ்டிரா பைக்-டாக்சி விதிகளில் திருத்தங்களை முன்மொழிந்துள்ளதாகத் தெரிகிறது. இந்தத் திருத்தங்களின் மூலம் டெலிவரி சேவை தளங்கள் மற்றும் இ-காமர்ஸ் நிறுவனங்களும் விதிமுறைகளின் கீழ் கொண்டுவரப்பட உள்ளன. தற்போது இந்த விதிகள் பயண முன்பதிவு சேவை வழங்கும் நிறுவனங்களுக்கு மட்டுமே பொருந்துகின்றன.

முன்மொழியப்பட்டுள்ள திருத்தங்களில், பொருட்கள், பார்சல்கள் மற்றும் பேக்கேஜ்களை டெலிவரி செய்வதற்காக வாகனங்களை சொந்தமாக வைத்திருக்கும் அல்லது வாகனப் படையை இயக்கும் நிறுவனங்கள் “டெலிவரி சேவை வழங்குநர்கள்” என வரையறுக்கப்பட உள்ளன. இதன் மூலம் ஸ்விகி, பிளிங்கிட், சுமாட்டோ, செப்டோ உள்ளிட்ட நிறுவனங்கள் முதல்முறையாக இந்த ஒழுங்குமுறை கட்டமைப்புக்குள் கொண்டுவரப்பட உள்ளன.

இந்தத் திருத்தங்கள் அமல்படுத்தப்பட்டால், சம்பந்தப்பட்ட நிறுவனங்கள் மின்சார வாகனங்களை மட்டுமே கொண்ட வாகனப் படையை இயக்க வேண்டியிருக்கும். மேலும், ஓட்டுநர் மற்றும் வாகனத்தைக் கண்காணிக்க ஜி.பி.எஸ் (GPS) வசதியை ஏற்படுத்த வேண்டும். ஓட்டுநர்களுக்கு காப்பீட்டுப் பாதுகாப்பு வழங்க வேண்டும். மண்டல போக்குவரத்து ஆணையம் நிர்ணயிக்கும் கட்டண விதிமுறைகளைப் பின்பற்ற வேண்டும். அதோடு, தனித்துவமான உரிம அடையாள எண்ணையும் பெற வேண்டும்.

குறிப்பாக, டெலிவரி பணியாளர்களின் நலனையும் கருத்தில் கொண்டு இந்தத் திருத்தங்கள் வடிவமைக்கப்பட்டுள்ளன. ஒவ்வொரு பயணத்திற்கான கட்டணத்தில் 2 சதவீதத்தை ஓட்டுநர் நல நிதிக்கு சம்பந்தப்பட்ட தளங்கள் வழங்க வேண்டும். இந்த நிதி மூலம் ஓட்டுநர்களுக்கான ஓய்வூதியப் பலன்கள், விபத்துக் காப்பீடு, மின்சார வாகனங்களை வாங்குவதற்கான கடன்கள் மற்றும் அவர்களின் குழந்தைகளுக்கான கல்வி உதவி உள்ளிட்ட பல்வேறு நலத்திட்டங்கள் செயல்படுத்தப்பட உள்ளன.

இதுகுறித்து போக்குவரத்துத் துறை அமைச்சர் பிரதாப் சர்நாயக் இந்த நடவடிக்கையை உறுதிப்படுத்தியுள்ளார். அவர் கூறுகையில், “பரிந்துரைக்கப்பட்டுள்ள புதிய விதிமுறைகளின்படி, 15 கிலோமீட்டருக்கும் குறைவான தூரத்திற்கு இயக்கப்படும் அனைத்து பைக்குகளும் இந்தக் கொள்கையின் கீழ் கொண்டுவரப்படும். மேலும், திருத்தங்கள் இறுதி செய்யப்பட்டு ஒப்புதல் அளிக்கப்பட்டால், மின்சார வாகனப் படையைப் பராமரிப்பது உள்ளிட்ட பிற விதிமுறைகளும் சம்பந்தப்பட்ட நிறுவனங்களுக்குப் பொருந்தும் என்று தெரிவித்தார்.

இந்தத் திருத்தங்கள் ஆய்வுக்காக மாநில சட்டம் மற்றும் நீதித்துறைத் துறைக்கு அனுப்பப்பட்டுள்ளன. கடந்த மாதம் மகாராஷ்டிர சட்டப்பேரவையில், மாநிலத்தில் பைக் டாக்சி ஓட்டுநர்கள் கட்டாயம் குடியிருப்பு சான்றிதழையும், அரசு வழங்கும் பொது சேவை வாகன ஓட்டுநர் பேட்ஜையும் வைத்திருக்க வேண்டும் என்று அமைச்சர் சர்நாயக் அறிவித்திருந்தார். இந்த மாற்றங்கள் மூலம் உள்ளூர் இளைஞர்களுக்கு வேலைவாய்ப்புகளை உருவாக்குவதே நோக்கம் என்றும் தெரிவித்துள்ளார்.

தற்போது மாநிலத்தில் செயல்பட்டு வரும் இ-காமர்ஸ் மற்றும் டிஜிட்டல் டெலிவரி தளங்கள் பைக் டாக்சி ஒழுங்குமுறை கட்டமைப்பின் கீழ் வராததால், அவற்றையும் கட்டுப்படுத்தும் நோக்கில் இந்தத் திருத்தங்கள் முன்மொழியப்பட்டுள்ளதாக போக்குவரத்துத் துறை அதிகாரிகள் தெரிவித்துள்ளனர்.