அதிகாரிகள் அதிரடி மாற்றம்..! தேர்தல் ஆணைய கிடுக்கிப்பிடி… வெளிவராத பின்னணித் தகவல்!

தமிழக அரசியல் களம் 2026 சட்டமன்றத் தேர்தல் ஜுரத்தில் தகித்துக் கொண்டிருக்கும் வேளையில், தலைமைச் செயலகத்தின் ‘கோட்டை’ முதல் டிஜிபி அலுவலகமான ‘டிஜிபி ஹெட் குவார்ட்டர்ஸ்’ வரை அதிரடி மாற்றங்களால் ஆடிப்போயிருக்கிறது.

“சீப்பை ஒளித்து வைத்தால் கல்யாணம் நின்றுவிடுமா?” என்று முதல்வர் ஸ்டாலின் ஆவேசப்படும் அளவுக்கு, தேர்தல் ஆணையம் தன் அதிகார மட்டையைச் சுழற்றத் தொடங்கியிருக்கிறது. இந்தப் பதவி மாற்றங்களுக்குப் பின்னால் இருக்கும் ‘பவர் பாலிடிக்ஸ்’ மற்றும் டெல்லி லாபிகள் இருப்பதாக அரசியல் வட்டாரங்களில் கிசுகிசுக்கப்படுகிறது.

கோட்டையில் நிகழ்ந்த அதிரடி மாற்றம்!

தமிழகத்தின் நிர்வாகத் தூணாகக் கருதப்படும் தலைமைச் செயலாளர் முருகானந்தம் மாற்றப்பட்டிருப்பதுதான் தற்போதைய ஹாட் டாபிக். தேர்தல் நேரங்களில் அதிகாரிகளை மாற்றுவது வழக்கமான நடைமுறைதான் என்றாலும், முருகானந்தத்தின் இடமாற்றம் ஆளுங்க தரப்பை ஏகத்துக்கும் அப்செட் ஆக்கியிருக்கிறது.

அவருக்குப் பதிலாகப் பொறுப்பேற்றுள்ள சாய்குமார் ஐ.ஏ.எஸ் சாதாரணமானவர் அல்ல. 1990 பேட்ச் அதிகாரியான இவர், எடப்பாடி பழனிசாமி முதல்வராக இருந்த காலத்தில் அவரது நிழலாகச் செயல்பட்டவர். “எடப்பாடியாரின் குட்-புக்கில் இருந்த ஒருவரை, தற்போதைய தேர்தல் நேரத்தில் மிக முக்கியமான இடத்தில் அமர வைத்திருப்பதன் மூலம் டெல்லி இரட்டை லாபம் பார்க்கிறதோ?” என அறிவாலய வட்டாரங்கள் முணுமுணுக்கின்றன.

குறிப்பாக மின்சார வாரியம் மற்றும் டி.என்.பி.எல் போன்ற துறைகளில் இவருக்கு இருக்கும் அனுபவம், தேர்தல் நேரத்தில் நிர்வாகத்தை இறுக்கிப் பிடிக்க உதவும் என்பது ஆணையத்தின் கணக்காக இருக்கிறது.

லஞ்ச ஒழிப்புத் துறையில் ‘சைபர்’ வேகம்!

அடுத்ததாக, லஞ்ச ஒழிப்புத் துறை டிஜிபி பொறுப்பில் இருந்த டேவிட்சன் தேவாசீர்வாதம் மாற்றப்பட்டு, அந்த இடத்திற்குச் சந்தீப் மிட்டல் கொண்டு வரப்பட்டிருப்பதுதான் ‘க்ளைமாக்ஸ்’ திருப்பம். டேவிட்சன் அந்தப் பொறுப்பிற்கு வந்து வெறும் 39 நாட்களே ஆன நிலையில், அவரைத் தூக்கி அடித்திருப்பது தேர்தல் ஆணையத்தின் அசுர வேகத்தைக் காட்டுகிறது.

புதிய டிஜிபியாக வந்துள்ள சந்தீப் மிட்டல் 1995 பேட்ச் ஐபிஎஸ் அதிகாரி. ‘சைபர் செக்யூரிட்டி’ துறையில் கில்லாடி என்று பெயர் பெற்றவர். கடந்த அதிமுக ஆட்சியின்போது டெல்லி டெபுடேஷனில் இருந்த இவரை, அப்போதைய முதல்வர் எடப்பாடி பழனிசாமிதான் பெரும் பிரயத்தனம் செய்து தமிழகத்திற்கு அழைத்து வந்தார் என்பது குறிப்பிடத்தக்கது. “டிஜிட்டல் யுகத் தேர்தலில் பணப் பரிமாற்றங்களைச் சைபர் ரீதியாகக் கண்காணிக்க மிட்டல் தான் சரியான சாய்ஸ்” என டெல்லி தரப்பு கருதுவதாகத் தெரிகிறது.

ஏன் இந்தத் திடீர் ‘கிடுக்கிப்பிடி’?

மதுரை கமிஷனர் லோகநாதன் தொடங்கி மேற்கு மண்டல ஐஜி சரவண சுந்தர் வரை அடுத்தடுத்து மாற்றப்பட்டிருப்பது ஏதோ எதேச்சையாக நடந்ததாகத் தெரியவில்லை. எதிர்க்கட்சிகள் அளிக்கும் புகார்கள் ஒருபுறம் இருந்தாலும், மாநில உளவுத்துறையின் கட்டுப்பாட்டில் இருக்கும் அதிகாரிகளைத் தேர்தல் பணிக்குத் தள்ளி வைப்பதுதான் ஆணையத்தின் வியூகம்.

“ஆளுங்கட்சியின் கை ஓங்கிவிடக் கூடாது என்பதில் தேர்தல் ஆணையம் மிகத் தெளிவாக இருக்கிறது” என்கிறார்கள் அரசியல் நோக்கர்கள். தமிழகத்தின் மேற்கு மண்டலம் எப்போதுமே தேர்தல் களத்தில் ‘சென்சிட்டிவ்’ ஏரியா. அங்கு ஐஜி அந்தஸ்தில் இருப்பவரை மாற்றியிருப்பது அதிமுக – பாஜக கூட்டணிக்குச் சாதகமான சூழலை உருவாக்கும் முயற்சி என திமுக தரப்பு குற்றம் சாட்டுகிறது.

பாஜக கேம்- ஸ்டாலினின் ஆவேசம்!

தேர்தல் ஆணையத்தின் இந்த நடவடிக்கையை ‘காவிமயமாக்கல்’ என்று முதல்வர் ஸ்டாலின் கடுமையாக விமர்சித்துள்ளார். பாஜக ஆளும் மாநிலங்களான அசாம் மற்றும் பீகாரில் (கூட்டணி ஆட்சி) இல்லாத கெடுபிடி தமிழகத்தில் மட்டும் ஏன்? என்ற அவரது கேள்வி சமூக வலைதளங்களில் விவாதத்தைக் கிளப்பியுள்ளது.

எடப்பாடி பழனிசாமி
“அரசியல் சட்டம் தந்த பாதுகாப்பைப் பயன்படுத்தி பாஜகவுக்குத் தேர்தல் வேலை பார்க்கிறது ஆணையம்” என்ற முதல்வரின் அறிக்கை, வரும் தேர்தல் பிரச்சாரத்தில் இந்த அதிகார மாற்றங்கள் ஒரு முக்கிய ஆயுதமாக மாறும் என்பதை உணர்த்துகிறது. அதேசமயம், “நிர்வாகம் நடுநிலையாக இருக்க வேண்டும் என்பதற்காகவே அனுபவம் வாய்ந்த அதிகாரிகளைத் தேர்தல் ஆணையம் நியமிக்கிறது” என பாஜக தரப்பு பதிலடி கொடுத்து வருகிறது.

மாற்றத்தின் பின்னணி இதுவா?

சென்னை தலைமைச் செயலக வட்டாரங்களில் பேசப்படும் தகவலின்படி, மாற்றப்பட்ட அதிகாரிகள் பலரும் கடந்த சில மாதங்களாகவே மத்திய உளவு அமைப்புகளின் கண்காணிப்பில் இருந்ததாகக் கூறப்படுகிறது. தேர்தல் நேரத்தில் பணப் புழக்கத்தைக் கட்டுப்படுத்தவும், லோக்கல் பாலிடிக்ஸில் அதிகாரிகள் தலையிடாமல் இருக்கவும் இன்னும் பல அதிரடி மாற்றங்கள் வரக்கூடும் என எதிர்பார்க்கப்படுகிறது. குறிப்பாக, மாவட்ட ஆட்சியர்கள் மட்டத்திலும் ஒரு ‘க்ளீன் ஸ்வீப்’ நடக்க வாய்ப்புள்ளதாகக் கோட்டை வட்டாரங்கள் தெரிவிக்கின்றன.

தமிழகத்தைப் பொறுத்தவரை இது வெறும் அதிகாரிகள் இடமாற்றம் மட்டுமல்ல; 2026-ன் அதிகாரப் போர் யாருக்குச் சாதகமாக அமையப்போகிறது என்பதற்கான முன்னோட்டம். தேர்தல் ஆணையத்தின் ‘கிடுக்கிப்பிடி’ பிடியில் இருந்து தமிழக அரசு எப்படித் தப்பிக்கப் போகிறது, அல்லது இந்த மாற்றங்கள் தேர்தலின் முடிவை எப்படி மாற்றப்போகிறது என்பதைப் பொறுத்திருந்துதான் பார்க்க வேண்டும். ‘யானை வரும் பின்னே, மணியோசை வரும் முன்னே’ என்பது போல, இந்த அதிரடி மாற்றங்கள் வரப்போகும் பெரும் அரசியல் மாற்றத்திற்கான அறிகுறியாகவே பார்க்கப்படுகிறது.