குழந்தைகள் தின விழாவில் வழங்கப்படும் கேக் எண்ணிக்கையை சரிபார்க்க வேண்டும்!

நாடு முழுவதும் ஆண்டுதோறும் நவம்பர் 14 அன்று குழந்தைகள் தினம் கொண்டாடப்பட்டு வருகிறது. எனினும், அன்றைய தினம் விடுமுறை நாளாக அறிவிக்கப்பட்டுள்ளதால், அரசுப் பள்ளிகளில் நவம்பர் 13-ஆம் தேதியன்றே குழந்தைகள் தினத்தைக் கொண்டாட வேண்டும் என்று பள்ளிக் கல்வித்துறை உத்தரவிட்டுள்ளது. இந்த விழாவைக் கோலாகலமாகக் கொண்டாடும் வகையில், அரசுப் பள்ளிகளில் பயிலும் மாணவ-மாணவிகள், ஆசிரியர்கள் மற்றும் ஆசிரியரல்லாத பணியாளர்கள் உட்பட மொத்தம் 61 லட்சம் பேருக்கு கேக் வழங்க அரசுப் பள்ளி நிர்வாகங்கள் நடவடிக்கை எடுத்து வருகின்றன.

இந்நிகழ்ச்சியை எவ்வித தடங்கலுமின்றி சிறப்பாக நடத்தி முடிக்க வசதியாக, மாவட்ட வாரியாக கண்காணிப்பு அலுவலர்கள் நியமிக்கப்பட்டு பணிகள் முடுக்கிவிடப்பட்டுள்ளன. மேலும், கேக் விநியோகம் தொடர்பான ஒருங்கிணைப்புப் பணிகளை மாவட்ட முதன்மை கல்வி அலுவலர்களும் ஏனைய அதிகாரிகளும் இணைந்து தீவிரமாகக் கண்காணிக்க அறிவுறுத்தப்பட்டுள்ளனர்.

குறிப்பாக, பள்ளிகளுக்குக் கொண்டுவரப்படும் கேக் பெட்டிகளைப் பெற்றுக்கொள்ளும்போது, அவற்றைத் திறந்து பார்த்து கேக்குகளின் சரியான எண்ணிக்கையை முன்கூட்டியே உறுதி செய்யுமாறு பள்ளி நிர்வாகங்களுக்கு அறிவுறுத்தப்பட்டுள்ளது. கடைசி நேரத்தில் கேக் எண்ணிக்கையில் ஏதேனும் குறைபாடுகள் அல்லது புகார்கள் எழுவதைத் தவிர்க்கும் பொருட்டே இத்தகைய முன்னெச்சரிக்கை நடவடிக்கைகள் மேற்கொள்ளப்பட்டு வருகின்றன.

நவம்பர் 13 அன்று அனைத்துக் குழந்தைகளுக்கும் தவறாமல் இனிப்பான கேக்குகளை வழங்கி, குழந்தைகள் தினத்தை மகிழ்ச்சியோடு கொண்டாடுவதற்கான அனைத்துக் கட்ட முன்னேற்பாடுகளும் தற்போது விறுவிறுப்பாக நடைபெற்று வருகின்றன.