யாருடைய நம்பிக்கைக்கும் திராவிட மாடல் ஆட்சியில் தடை இல்லை – முதலமைச்சர்

தமிழ் கடவுள் முருகனைப் போற்றும் வகையில் பழனியில் அனைத்துலக முத்தமிழ் முருகன் மாநாடு விமரிசையாக நடைபெறும் நிலையில், ஆன்மீக வரலாற்றில் அனைத்துலக முத்தமிழ் முருகன் மாநாடு இடம்பெறும் என்று முதலமைச்சர் மு.க.ஸ்டாலின் புகழாரம் சூட்டியுள்ளார்.

அழகன் முருகனை தெய்வமாய், தந்தையாய், குழந்தையாய் கொண்டாடும் ஆன்மீக பற்றாளர்களுக்கு இது திருவிழாக் காலம். அதற்கு மகுடம் சேர்க்கும் விதமாக அறுபடைகளில் மூன்றாம் வீடாக போற்றப்படும் பழனியில் அனைத்துலக முத்தமிழ் முருகன் மாநாடு கோலாகலமாக தொடங்கியது.

தமிழ்க்கடவுளான முருகப் பெருமானின் பெருமையை உலகில் உள்ள முருக பக்தர்கள் அறிந்து கொள்ளும் வகையில் தமிழ்நாடு அரசின் சார்பில் இந்த மாநாடு நடைபெறுகிறது.

மாநாட்டையொட்டி காலை 8.30 மணிக்கு திருவிளக்கு ஏற்றுதல் நடைபெற்றது. அதைத் தொடர்ந்து, பழனியாண்டவர் கல்லூரி வளாகத்தில் 100 அடி கம்பத்தில் மாநாட்டு இலச்சினை பொறிக்கப்பட்ட கொடியை நாதஸ்வர தவில் இசையுடன் இரத்தினகிரி பாலமுருகனடிமை சுவாமிகள் ஏற்றி வைத்தார்.

காலை 9 மணிக்கு மாநாட்டு கண்காட்சியை ஊரக வளர்ச்சித்துறை அமைச்சர் ஐ.பெரியசாமி, உணவுத்துறை அமைச்சர் அர.சக்கரபாணி, அறநிலையத்துறை அமைச்சர் பி.கே.சேகர்பாபு ஆகியோர் தொடங்கி வைத்தனர்.

வேல்கோட்டத்தை, சச்சிதானந்தம் எம்.பி., செந்தில்குமார் எம்எல்ஏ ஆகியோர் தொடங்கி வைத்தனர். இதனைத் தொடர்ந்து, காணொலி வாயிலாக பங்கேற்ற முதலமைச்சர் மு.க.ஸ்டாலின் மாநாட்டை தொடங்கி வைத்தார். அப்போது, இறை வணக்கப் பாடலை சீர்காழி சிவ.சிதம்பரம் பாடியபோது, முதலமைச்சர் மு.க.ஸ்டாலின் எழுந்து நின்று மரியாதை செலுத்தினார்.

பின்னர் வாழ்த்துறை வழங்கிய முதலமைச்சர் மு.க.ஸ்டாலின், தமிழ்நாடு வரலாறு மட்டுமின்றி ஆன்மீக வரலாற்றிலேயே அனைத்துலக முத்தமிழ் முருகன் மாநாடு இடம்பெறும் என்று தெரிவித்தார். ஆலய வழிபாடுகளில் தமிழ்மொழி முதன்மை பெற வேண்டும் என்றும், கோயில் கருவறைகளில் சமத்துவம் நிலவ வேண்டும் என்றும் முதலமைச்சர் கூறினார்.