நிலம் அளவீடு செய்ய முட்டுக்கட்டை! சின்னேரிபாளையம் குப்பம்மாள் கோயிலில்.. சுவாமி காரியத்திற்கு தடை போடலாமா?

அவிநாசி அருகே சின்னேரிபாளையத்தில் உள்ள குப்பம்மாள் கோயில் கிணறு உள்ள இடம் தங்களுக்கானது என்று இருவர் உரிமை கோரும் நிலையில், கோயில் நிலத்தை அளவீடு செய்யவும் அவர்கள் முட்டுக்கட்டை போடுகின்றனர். ஆட்சேபனையை அவர்கள் திரும்பப்பெற்று, கோயில் நிலம் அளவீடு செய்ய ஒத்துழைக்க வேண்டும் என்று கோரிக்கை எழுந்துள்ளது.

திருப்பூர் மாவட்டம் அவிநாசி அருகே அமைந்திருக்கிறது சின்னேரிபாளையம் கிராமம். ஊருக்கே காவல் தெய்வம் போல வீற்றிருக்கும் அங்கே, காலாகாலமாக உள்ளது குப்பம்மாள் கோயில். பொதுவாக, கோயில் காரியங்கள் என்றால் ஊரே திரண்டு நின்று துணை நிற்கும். ஆனால், இப்போது அந்தக் கோயிலின் மிக முக்கியமான ஒரு விஷயத்திற்கே, சொந்த ஊர்க்காரர்கள் இருவர் முட்டுக்கட்டை போடுவதுதான் பெரும் பரபரப்பைக் கிளப்பியுள்ளது.

விஷயம் என்னவென்றால், கோயிலுக்குச் சொந்தமான நிலத்தை அளவீடு செய்யவிடாமல், இரு சகோதரர்கள் உரிமை கோரி பிரச்சனை செய்கிறார்கள். அதுவும், கோயில் பூஜைகளுக்காகக் கிடைத்த நீராதாரமான கிணறு உள்ள இடத்திற்கு உரிமை கோருவதுதான் பக்தர்களிடையே பெரும் ஆதங்கத்தை ஏற்படுத்தியுள்ளது.

35-வருடத்துச் சம்பவம்!

சின்னேரிபாளையம் கிராமத்தில், சுமார் 35 ஆண்டுகளுக்கு முன்பு கடும் தண்ணீர் தட்டுப்பாடு நிலவியது. இதனால், குப்பம்மாள் கோயிலின் அன்றாட பூஜைகள் மற்றும் புனஸ்காரங்கள் தடைபடும் சூழல் ஏற்பட்டது. இதைப் பார்த்த ஊர் மக்கள் துடித்தனர்.

உடனே, ஊர் பொதுமக்கள் சார்பாகவும், சிலரின் நன்கொடையாலும் ஒரு தீர்வு எட்டப்பட்டது. கிராமத்தில் உள்ள நத்தம் புல எண் 298/23 என்ற இடத்தில், ஊர் மக்கள் செலவில் ஆழ்துளைக் கிணறு ஒன்று அமைக்கப்பட்டு, மோட்டார் பொருத்தப்பட்டது. சரியாக 1993ஆம் ஆண்டு பிப்ரவரி 28ஆம் தேதி, அந்தக் கிணறு குப்பம்மாள் கோயிலின் பயன்பாட்டுக்காகத் திறந்து வைக்கப்பட்டது.

அன்று முதல் இன்று வரை அந்தக் கிணறுதான் குப்பம்மாள் கோயிலின் நீர்த்தேவையைத் தீர்த்து வருகிறது. ஊரின் நலனுக்காகக் கோயிலுக்குக் கொடுக்கப்பட்ட நிலம் அது.

இருவர் திடீர் முட்டுக்கட்டை!

 

இவ்வளவு முக்கியத்துவம் வாய்ந்த அந்தக் கிணறு உள்ள நிலத்தை, இப்போது கே.என். ராமமூர்த்தி மற்றும் பாலச்சந்தர் ஆகிய இரு சகோதரர்கள் உரிமை கோருகின்றனர். நடராஜன் என்பவரின் மகன்களான இவர்கள், “புல எண். 298/23-இல் வருவாய் ஆவணங்களில் கோயில் என்று குறிப்பிடப்பட்டுள்ள அந்த இடம் எங்களுக்குத்தான் சொந்தம். சம்பந்தப்பட்ட இடத்தில் நீதிமன்ற வழக்கு நிலுவையில் உள்ளது” என்று கூறி, கோயில் நிலத்தை நில அளவை செய்ய அதிகாரிகள் வருவதை எதிர்த்து வருகின்றனர்.

 

இதில் வேடிக்கை என்னவென்றால், இவர்கள் தரப்பில் நீதிமன்றத்தில் தாக்கல் செய்யப்பட்ட மனுவில், அந்தக் கிணறு ‘பாழடைந்த இடத்தில்’ இருப்பதாகவும், தங்கள் பெயரில் வழக்கு எண். 5842-இல் மேல்முறையீடு செய்யப்பட்டிருப்பதாகவும் சுட்டிக்காட்டப்பட்டுள்ளது. ஆனால், ஊர் மக்கள் ஒருமித்த கருத்துடன் கோயில் பயன்பாட்டிற்காகக் கொடுத்த நிலத்தை, ‘தங்களுக்குப் பாத்தியப்பட்டது’ என்று சொந்தம் கொண்டாடுவது ஏன் என்பதுதான் பலரின் கேள்வியாக இருக்கிறது.

 

அலைக்கழியும் கிராம மக்கள்!

கோயிலுக்கு ஒதுக்கப்பட்ட நிலத்தை அளக்கவிடாமல் பங்காளிகள் இருவரும் முட்டுக்கட்டை போடுவதைக் கண்ட சின்னேரிபாளையம் கிராமத்தினர் சும்மா இருக்கவில்லை.

முதலில் அவிநாசி வட்டாட்சியரிடம் (தாசில்தார்) சென்று நிலத்தை அளக்கக் கோரிக்கை வைத்தனர். அவரும் ஒப்புதல் அளித்துள்ளார். அதன்பின், மாவட்ட அளவில் உள்ள உயர் அதிகாரியான டி.ஆர்.ஓ. (மாவட்ட வருவாய் அலுவலர்)-இடம் மனு அளித்தனர்.

ஆனாலும், விசாரணையில் தாமதம் நீடிக்கவே, கடந்த அக்டோபர் 27-ஆம் தேதி, ஒட்டுமொத்த கிராம மக்கள் சார்பாகத் திருப்பூர் மாவட்ட ஆட்சியரைச் சந்தித்து, டி.ஆர்.ஓ. விசாரணையை விரைந்து முடிக்குமாறு மீண்டும் மனு அளித்துள்ளனர். டி.ஆர்.ஓ. அலுவலகத்தில் விசாரித்தபோது, இதுவரை எந்தவிதமான பதிலும் வரவில்லை என்று அதிகாரிகள் கூறியுள்ளனர்.

அதனால், கிராம மக்களும் நில அளவையாளர், கிராம நிர்வாக அலுவலர் ஆகியோரைத் தொடர்புகொண்டு இந்த விவகாரத்தின் முக்கியத்துவத்தை எடுத்துரைத்துள்ளனர். மேலும், அளவீட்டுப் பணிக்கு பாதுகாப்பு கேட்டு அவிநாசி காவல் ஆய்வாளர் இடமும் ஊர் பொதுமக்கள் சார்பாக மனு கொடுக்கப்பட்டுள்ளது.

இறுதியில் டி.ஆர்.ஓ. விசாரணையில் கோயில் நிலத்தை அளவீடு செய்ய ஒப்புதல் நிச்சயம் கிடைக்கும் என்பதில் யாருக்கும் சந்தேகமில்லை. ஆனால், ஒரு நல்ல காரியத்திற்காக முட்டுக்கட்டை போடுவது எந்தவிதத்தில் நியாயம்?

கிராம மக்களின் ஆதங்கம்!

கோயில் திருப்பணிகளுக்கு அல்லது இறை காரியங்களுக்கு குறுக்கே நின்றால், அது வருங்காலத்தில் சம்பந்தப்பட்டவர்களுக்கு மட்டுமல்லாமல் அவர்களின் வாரிசுகளுக்கும், அடுத்த தலைமுறையினருக்கும் தெய்வக் குற்றமாகி, பாதிப்பை ஏற்படுத்தலாம் அல்லவா?

கோயிலுக்குச் சொந்தமான இடத்தில் அளவீடு செய்ய ஆட்சேபனை தெரிவிக்கும் அந்தச் சகோதரர்கள் இருவரும், இந்த விஷயத்தின் தீவிரத்தை உணர வேண்டும். தங்கள் முட்டுக்கட்டையை விலக்கி, இறைப்பணிக்குத் துணை நிற்க வேண்டும் என்பதே ஒட்டுமொத்த சின்னேரிபாளையம் கிராம மக்களின் எதிர்பார்ப்பாகும். அந்த குப்பம்மாள் கோயில் தெய்வத்தின் அருள் அவர்களுக்குக் கிடைத்து, அனைவரும் சிறப்புடன் வாழட்டும்.