இனி பொது இடத்தில் மது அருந்த முடியாது!

கோவை மாவட்டத்தில் பொது இடங்களில் மது அருந்துவோர் மற்றும் பொதுமக்களுக்கு இடையூறு ஏற்படுத்தும் வகையில் செயல்படுவோரைக் கட்டுப்படுத்த காவல்துறையினர் ட்ரோன் கேமராக்கள் மூலம் தீவிர கண்காணிப்பில் ஈடுபட்டு வருகின்றனர். குறிப்பாக, பொதுமக்கள் அதிகம் நடமாடும் பகுதிகள், குடியிருப்புப் பகுதிகள் மற்றும் ஆள் நடமாட்டம் குறைவாக உள்ள இடங்களில் சட்டவிரோத செயல்கள் நடைபெறுவதைத் தடுக்க இந்த நடவடிக்கை மேற்கொள்ளப்பட்டு வருகிறது.

இதன் ஒரு பகுதியாக, கோவை மாநகரின் பல்வேறு பகுதிகளில் போலீசார் அவ்வப்போது ட்ரோன் கேமராக்களைப் பறக்கவிட்டு கண்காணிப்புப் பணிகளை மேற்கொண்டு வருகின்றனர். அந்த வகையில், சிங்காநல்லூர் காவல் நிலைய எல்லைக்குட்பட்ட எஸ்.ஏ.எஸ். காலனி மற்றும் இருகூர் பகுதிகளில் மாலை நேரங்களில் ட்ரோன் மூலம் போலீசார் கண்காணிப்பில் ஈடுபட்டனர். அப்போது, புதிதாக உருவாக்கப்பட்ட குடியிருப்புப் பகுதியில் ஒரு கும்பல் அமர்ந்து மது அருந்திக் கொண்டிருப்பது ட்ரோன் கேமராவில் பதிவானது.

இதையடுத்து, உடனடியாக அந்த இடத்திற்குச் சென்ற போலீசார், அங்கு மது அருந்திக் கொண்டிருந்தவர்களைப் பிடிக்க முயன்றனர். காவல்துறையினரைக் கண்டதும் அதிர்ச்சியடைந்த அவர்கள், அங்கிருந்து தப்பிச் செல்ல முயன்றனர். இருப்பினும், போலீசார் அவர்களை மடக்கிப் பிடித்து விசாரணை மேற்கொண்டனர். பின்னர், பொது இடங்களில் மது அருந்துவதால் ஏற்படும் பாதிப்புகள் குறித்தும், குடியிருப்புப் பகுதிகளில் இதுபோன்ற செயல்களில் ஈடுபடுவதால் பொதுமக்களுக்கு ஏற்படும் சிரமங்கள் குறித்தும் அறிவுரை வழங்கி அனுப்பி வைத்தனர். இந்த நடவடிக்கை தொடர்பான ட்ரோன் வீடியோ காட்சிகளை கோவை காவல்துறையினர் தற்போது வெளியிட்டுள்ளனர்.

இதுமட்டுமின்றி, கோவை மாவட்டத்தின் புறநகர்ப் பகுதிகளான வால்பாறை, பெரியநாயக்கன்பாளையம் உள்ளிட்ட இடங்களிலும் ட்ரோன் கேமராக்கள் மூலம் கண்காணிப்புப் பணிகள் மேற்கொள்ளப்பட்டு வருகின்றன. மலைப்பகுதிகள், ஒதுக்குப்புறமான இடங்கள் மற்றும் பொதுமக்கள் அதிகம் கூடும் பகுதிகளில் சட்டம் ஒழுங்கைப் பாதுகாக்கும் நோக்கில் இந்தக் கண்காணிப்பு தீவிரப்படுத்தப்பட்டுள்ளது.

குறிப்பாக, பொது இடங்களில் மது அருந்துதல், தேவையற்ற கூட்டமாகச் சேர்ந்து பொதுமக்களுக்கு இடையூறு ஏற்படுத்துதல் உள்ளிட்ட செயல்களைத் தடுக்க போலீசார் இந்தத் தொழில்நுட்பத்தைப் பயன்படுத்துகின்றனர். ட்ரோன் கேமராக்கள் மூலம் மேலிருந்து கண்காணிப்பதால், மறைவான இடங்களில் நடைபெறும் செயல்பாடுகளையும் எளிதில் கண்டறிய முடிகிறது.

மேலும், காவல்துறையினர் நேரடியாகச் செல்ல முடியாத பகுதிகளிலும் கண்காணிப்பை மேற்கொள்ள முடிவதால் இந்த நடவடிக்கை பயனுள்ளதாக இருப்பதாகக் கருதப்படுகிறது. இந்நிலையில், கோவை மாவட்டத்தில் பல்வேறு பகுதிகளில் மேற்கொள்ளப்பட்ட ட்ரோன் கண்காணிப்பு தொடர்பான வீடியோ காட்சிகளையும் மாவட்ட காவல் கண்காணிப்பாளர் அலுவலகம் வெளியிட்டுள்ளது. பொதுமக்களின் பாதுகாப்பையும், பொது அமைதியையும் உறுதி செய்யும் வகையில் இந்தக் கண்காணிப்பு நடவடிக்கைகள் தொடர்ந்து மேற்கொள்ளப்படும் என எதிர்பார்க்கப்படுகிறது. பொது இடங்களைத் தனிப்பட்ட பயன்பாட்டிற்காக ஆக்கிரமிப்பதும், அங்கு மது அருந்தி மற்றவர்களுக்கு இடையூறு ஏற்படுத்துவதும் தவிர்க்கப்பட வேண்டும் என்பதே காவல்துறையினரின் இந்த நடவடிக்கையின் முக்கிய நோக்கமாக உள்ளது.