ரூ.1,628 கோடி மதிப்பிலான ரயில் பாதை திறப்பு!

சுதந்திரத்திற்குப் பிறகு முதன்முறையாக சத்தீஸ்கர் மாநிலத்தின் தொலைதூரப் பகுதியான ரோஹாட் பகுதி இந்திய ரயில்வேயின் தேசிய நெட்வொர்க்குடன் இணைக்கப்பட்டுள்ளது. அம்மாநிலத்தின் கிராமப்புற மற்றும் வனப் பகுதிகளுக்கான போக்குவரத்து வசதியை மேம்படுத்தும் வகையில் இந்த வரலாற்றுச் சிறப்புமிக்க ரயில் சேவை தொடங்கப்பட்டுள்ளது.

செவ்வாய்க்கிழமை நடைபெற்ற விழாவில், தடோகி – ரோஹாட் அகல ரயில் பாதை மற்றும் அபான்பூர் – குருத் ரயில் பாதை ஆகியவற்றை சத்தீஸ்கர் முதலமைச்சர் விஷ்ணு தியோ சாய் மற்றும் மத்திய ரயில்வே அமைச்சர் அஸ்வினி வைஷ்ணவ் ஆகியோர் காணொலி வாயிலாக இணைந்து தொடங்கி வைத்தனர். மேலும், ராய்ப்பூரில் மின்சார ரயில் எஞ்சின் பராமரிப்பு மையத்திற்கான அடிக்கல்லும் நாட்டப்பட்டுள்ளது.

டல்லி – ராஜஹாரா – ரோஹாட் இடையிலான 95 கி.மீ நீளப் பாதையின் இறுதிப் பகுதியான தடோகி – ரோஹாட் (17.5 கி.மீ) பணிகள் ரூ.1,628 கோடி செலவில் நிறைவடைந்ததன் மூலம் இத்திட்டம் முழுமையடைந்துள்ளது. பல தசாப்தங்களாக போக்குவரத்து வசதியின்றி தவித்த தெற்கு சத்தீஸ்கர் மக்களுக்கு இந்த ரயில் சேவை கல்வி, மருத்துவம், வேலைவாய்ப்பு மற்றும் வணிகச் சந்தைகளுக்கான கதவுகளைத் திறந்துவிட்டுள்ளது.

சத்தீஸ்கர் மாநிலத்தில் ரயில்வே உள்கட்டமைப்பை மேம்படுத்த நடப்பு நிதியாண்டில் ரூ.7,000 கோடிக்கும் அதிகமான நிதி ஒதுக்கப்பட்டுள்ளது என முதலமைச்சர் தெரிவித்தார். விழாவின் போது இரு புதிய பயணிகள் ரயில் சேவைகள் கொடியசைத்துத் தொடங்கி வைக்கப்பட்டன. ரோஹாட் – ராய்ப்பூர், ராய்ப்பூர் – குருத் இந்த ரயில் சேவைகள் மாநிலத் தலைநகரான ராய்ப்பூரை கிராமப்புற மக்களுடன் நேரடியாக இணைப்பதுடன், தினசரிப் பயணிகள் மற்றும் சிறு வியாபாரிகளுக்குப் பெரிதும் உதவியாக இருக்கும். பயணிகள் போக்குவரத்தைத் தாண்டி, ரோஹாட் பகுதியில் உள்ள இரும்புத் தாது வளங்களை நாட்டின் பிற பகுதிகளுக்குக் கொண்டு செல்ல இந்த ரயில் பாதை மிகவும் அத்தியாவசியமானது.

குறிப்பாக, இந்தியாவின் புகழ்பெற்ற பிலாய் எஃகு ஆலைக்கு தேவையான மூலப்பொருட்களை விரைவாகவும் குறைந்த செலவிலும் கொண்டு செல்ல இச்சேவை வழிவகுக்கும். இது உள்ளூர் பொருளாதாரத்தை உயர்த்துவதுடன் ஏராளமான வேலைவாய்ப்புகளையும் உருவாக்கும். அபான்பூர் – தாம்டரி திட்டத்தின் ஒரு பகுதியாக, 22 கி.மீ நீளமுள்ள அபான்பூர் – குருத் அகல ரயில் பாதையும் பயணிகளின் பயன்பாட்டிற்கு திறக்கப்பட்டுள்ளது. இதரப் பகுதிகளான குருத் – தாம்டரி இடையிலான எஞ்சிய கட்டுமானப் பணிகளும் விரைவில் முடிவடையும் எனத் தெரிவிக்கப்பட்டுள்ளது.

சத்தீஸ்கர் மாநிலத்தில் தடோகி – ரோஹாட் தவிர, கர்சியா – பர்மல்காசா இரட்டைப் பாதை பணிகள் மற்றும் பெண்ட்ரா ரோடு – பிலாஸ்பூர் – உஸ்லாபூர் இடையிலான 3-வது ரயில் பாதை திட்டங்களுக்கும் மத்திய அரசு ஒப்புதல் அளித்து பணிகளைத் தீவிரப்படுத்தியுள்ளது.