“எய்ம்ஸ் செங்கல் எடுத்து வரும் உதயநிதியால் கச்சத்தீவு மண்ணை எடுக்க முடியுமா?”

மதுரை எய்ம்ஸ் மருத்துவமனை வளாகத்தில் இருந்த செங்கலை எடுத்துக்காட்டும் உதயநிதி ஸ்டாலினால், கச்சத்தீவில் இருந்து ஒரு பிடி மண்ணை எடுத்து வர முடியுமா என்று தேமுதிக தலைவர் விஜயகாந்த் மகன் விஜயபிரபாகரன் கேள்வி எழுப்பி இருக்கிறார்.

 

மதுரையில் எய்ம்ஸ் மருத்துவமனை கட்டப்படும் என்று மத்திய அரசு அறிவித்தது. அதற்கான அடிக்கல் நாட்டப்பட்டது; நிலம் கையகப்படுத்தும் பணிகள் நிறைவடைந்து சுற்றுச்சுவர் எழுப்பும்பணி நடைபெற்று வருகிறது. இதனிடையே, மதுரையில் எய்ம்ஸ் மருத்துவமனை கட்ட பணிகள் எதுவும் நடக்கவில்லை என்று குற்றம்சாட்டி வரும் திமுக இளைரணி செயலாளர் உதயநிதி, அங்கிருந்த செங்கல் ஒன்றை தன்னுடன் எடுத்துச் சென்று போகுமிடம் எல்லாம் பிரசாரத்தில் காட்டி வருகிறார்.

 

இதனிடையே, மணப்பாறை சட்டப்பேரவை தொகுதியில் போட்டியிடும் தே.மு.தி.க. வேட்பாளர் கிருஷ்ணகோபாலை ஆதரித்து, விஜயகாந்த் மகன் விஜயபிரபாகரன் நேற்று துவரங்குறிச்சி பகுதியில் பிரசாரம் மேற்கொண்டார். அப்போது அவர் கூறியதாவது:

 

இந்த மணப்பாறை மண் எனக்கு முக்கியமானது. ஏனென்றால், நான் முதன்முதலில் அரசியலை தொடங்கிய இடம் இதுதான். முதலாவது சட்டமன்றத் தேர்தலில் நான் பிரசாரம் செய்கின்றேன். எய்ம்ஸ் மருத்துவமனை கட்டவில்லை என்று கூறி, அங்குள்ள செங்கலை எடுத்து அ.தி.மு.க.விடம் அருமையான கேள்வியை உதயநிதி ஸ்டாலின் கேட்டு வருகிறார். இது உண்மையில் நல்ல கேள்விதான்.

 

ஆனால் உதயநிதியை பார்த்து நான் கேட்கிறேன். உங்கள் கட்சியால் இலங்கைக்கு தாரைவார்க்கப்பட்ட கச்சத்தீவில் இருந்து ஒருபிடி மண்ணை உங்களால் எடுத்து வரமுடியுமா? அவர்கள் மீது குறையை வைத்துக் கொண்டு அடுத்தவர்களை பற்றி திமுகவினர் கேள்வி கேட்கிறார்கள். அ.ம.மு.க.வில் அ.தி.மு.க.வின் உண்மையான தொண்டர்கள் இருக்கிறார்கள். இந்த தேர்தலில் நம் கூட்டணி தான் மகத்தான வெற்றியை பெறும் என்று அவர் பேசினார்.


எடப்பாடியில் அதிமுக மண்ணை கவ்வும்… இலவசம் தந்து ஏமாற்றுகிறார்கள்… விஜய பிரபாகரன் ஆவேசம்!

இனி அதிமுகவுக்கு இறங்குமுகம் தான். எடப்பாடி தொகுதியில் அதிமுக மண்ணைக் கவ்வும் என்று, விஜயகாந்தின் மகன் விஜயபிரபாகரன் ஆவேசமாக குறிப்பிட்டுள்ளார்.

 

தமிழக அரசியலில் திடீர் திருப்பமாக, அதிமுக கூட்டணியில் இருந்து தேமுதிக விலகியுள்ளது. தொகுதி ஒதுக்கீடு எண்ணிக்கையில் இரு கட்சிகளிடையே உடன்பாடு ஏற்படாததால், தேமுதிக வெளியேறியது. அதிமுகவில் இருந்து தேமுதிக வெளியேறிய நாள், தங்களுக்கு தீபாவளி என்று எல்.கே. சுதீஷ் தெரிவித்தார்.

 

இந்த சூழலில், கடலூர் மாவட்டம் பண்ருட்டியில் நடந்த தேமுதிக பொதுக்கூட்டத்தில், விஜயகாந்தின் மகன் விஜயபிரபாகரன் ஆவேசமாக பேசி, அதிமுக – திமுகவை சாடினார். அவர் பேசியதாவது:

 

இலவசங்களை கொடுத்து தமிழக மக்களை சீரழிக்கின்றனர். மக்களுக்கு கொடுப்பது போல் கொடுத்து, பிறகு அவர்களிடம் இருந்து சுரண்டுகின்றனர். ரூ.1000, ரூ.1500 வருமானம் கூட கிடைக்காத நிலையிலா தமிழக மக்கள் உள்ளனர்? ஆனால், மக்களின் நன்மைக்காக பாடுபட்டவர் கேப்டன் விஜயகாந்த் மட்டும்தான். கொடுத்து கொடுத்து சிவந்து போனது அவரது கரங்கள்.

 

அதிமுகவில் இருந்து வெளியேறிவிட்டோம். குகையில் இருந்து சிங்கம் வெளியேறிவிட்டது; இனி வேட்டை தான். அதிமுகவின் தலைமைதான் சரி இல்லை. நாங்கள் கேட்கிற சீட் கொடுக்க முடியவில்லை என்றால் ஒவ்வொரு தொகுதியிலும் சீட் பறிக்கப்படும். தலையே போனாலும் தன்மானத்தை இழக்க மாட்டோம். யாருக்கும் தேமுதிகவினர் சளைத்தவர்கள் அல்ல.

 

எடப்பாடி தொகுதியில் முதல்வர் பழனிசாமி தோல்வி அடைவார். சாதியை பற்றி எனக்கு தெரியாது. சாதியைப்பற்றி பேசுவதில் நான் முட்டாளாகவே இருப்பேன். ஒவ்வொரு தொகுதியிலும் அதிமுக சீட்டை தேமுதிகவினர் பறிப்பார்கள். இதுவரை சாணக்கியன் ஆக இருந்தது போதும், இனி தேமுதிக சத்திரியன் ஆக இருக்க வேண்டிய நேரம் வந்துவிட்டது. இவ்வாறு அவர் பேசினார்.